Gálatas 1
1
Memoria
1Njua Pablo, Dios iniwananda icaitecauda lriaco, currin namenacandaca njite curritsakja naniwanandaca njaji atsianai, mitsa ljiatsa icadaca njua ljiaji Jesucristo njite Fanirri Dios jliaji icafietacada mayamicalri yuya Jesús, 2memoria njua irsu, pjiumi naapiya njaji nukitsiñape, irsu shaa icadacape icaolreo Galacialricuperri. 3Fanirri Dios njite Waminalri Jesucristo napakjamitawatsa shaa namatsiaca macadalrishu njite nacadautsa imaudaca. 4Jesucristo lricadacau mayamicarrun wamatsicana ikjaute, ljitacarru faa lriuya ljiaji jalredauca imatsicana panayadalri, caiji Fanirri Dios yumacapishu. 5¡Waa matsiadalri Dios irsu caidalriwetsa! Cayuwatsa.
Taniada Pablo iwaupiakje
6Currim nuajica cuajipiaca shenacau kjeyanaatsa lriuya ljiaji Dios, ljiaji iwanalri shaa lricañjatacarru Cristo-nacu ljiaji lrimatsiaca macadalri, njite cuajica jiyapacau lrinacolje ljiaji teculjedalrinakja lriuya ljiaji yacuti matsiadalri . 7Ajadalri currin pacapacapuaca apada yacuti teculjedalrinakja. Lrikjaute ljiaji ninica apadapena yumacape itekjuljetaca shaa, njite naumacapuatsa nateculjetaca ljiaji yacuti matsiadalri Cristo-nacu. 8Mitsa aape icaitecada irsu yacuti teculjedalritsa lriuya ljiaji wacaitendapiena irsu, Dios icadawatsa mashidalri jiwa lrinaco, curritsa cuadaca njuaca o apada angele inucada enolrikjuite. 9Nucaitjempiena lrinacu, njite panaya nupietatsekja nucaitecan: Niinicada apada icaitecada irsu teculjedalri yacuti lriuya ljiaji icuadatandena, Dios iirrua jiwautsa lrinacu.
Pablo icuadata idejicalreu Jesucristo nakjuitedalri
10Currim nuumaca matsiacarro nacapaca njua njaji inaiki, mitsadekja numa matsiadalrica njua Dios ipjeyalre. Currim nuumaca matsiacarro nacapaca njua njaji inaiki. ¡Numacadantja matsiaca njua inaikinai icapau, curritsantja Cristo irsudalricanjua!
11Yajintsa ljiaji, nukitsiñape: ljiaji yacuti matsiadalri nucanantalri curritsa inaiqui inaitjandaca. 12Currin nucuadatani curritsakja nuajicani apada inakjuite, mitsa ljiatsa ljiaji Jesucristo lricada nuajicarroni.
13Yajinina jimininatsakja cuajidalripiaca nunaikica lrinaco ljiaji njuepandapia naufandapia inaco njaji judionai, njite cuajica nupinietapiaca mashicalrirricu njaji shepacaperri Dios njite nursupia nuwaupiakje nuwayaketacarruna. 14Lrinaco ljiaji feepandapia faa judionai, napjeyaljedalripjapiaca njua nauya njaji nuquichiñape numotocawenai aji nufacawa lricu, ima jurrepjaca caquerriakjedalricanjua lrinacu lriaji nuferrinaipe yufandapia inacu. 15-16Mitsa Dios, ljiaji iniwanalri njua lripjeyatua nomutucau njite lriwana njua kjenacapua lricapaca nursu, matsia lrinaitjaca nursu lricadaa nuajicarru lrinaco ljiaji Lirri, nucaitecarru lriaco walridalri narsu njaji curriperritsa judionaica. Njite currin nua nutatja njumi nuicau apada inaiqui inai; 17currim tsakja nua Jerusalenrse naikjaolre njaji Jesucristo iniwananipe icaitecaupe lriaco nupjeyatua. Mitsadekja, nuawa kjeyacalrin aji jiipai Arabia lriculje, njite nudia tsenakja Damasco lriculje.
Pablo yapia icapa naikjaulre njaji apaana lricanantanipen
18Madalrida años shapudam nuawa Jerusalenrse nuacarru nuaji ljiaji Cefas, ljiaminitsa ljiaji najirri Pedro, ljiaji nufalri inai quince jalredauca. 19Mitsa currim nucapa apada nanakjuite njaji lricanantacalre, icamitsa ljiaji Santiago Waminalri iwerri. 20Nucaite shaa ajadalri Dios ipjeyalje ljiaji nudanalri irsu ajadalrican.
21Ljiapudamjite nuawa jiipai Siria lriculje njite Cilicia lriculje tsakja. 22Mitsadekja, njaji wakitsiñape shepacaperripia Cristo-nacu judealricuperri curripiatsa najinca njua. 23Icamipiatsa njemica nuacunaa: "Ljiajĩ ipinietacadapia faa, panaya lriajicau lricanantaca ljiaji yacuti matsiadalri lriumandapia lriwayaketaca apapiapia jalredauca" 24Njite nacaitepia matsiaperri Dios nacu lrinaikjuite ljiaji nunaitjalri.
© 2025 CLAN
© 2025 Seed Company