Colosenses 3
3
1Nini, shaa upina jinico mayamicalri yuya walriperri shu Cristo inai, yumena irsuwao njaji enolrculjeperri, Cristo yufalri nirse Dios iyekjemjete. 2Iwaupiena nanacu njaji enolriculjeperri, currin jalredauca iyarrupeca. 3Ima mayanperrinshupiaca shaa, njite Dios icadenina ajadalrica yufacautsa Cristo inai. 4Cristo ljiatsa icaolre iminalri. Lripietacauljeutsa lrinuca, shaa tsakjautsa lrinai pakjamiperri melremelredalrishu.
Cuajica narsutsa naufacau njaji Cristo iyarrupe
5Nini, icadena mayami yuyau ljiaji inaiquica jalredauca lricudalri: Curricarru cuca inaitjaca ivilreti macadadalritsa nadakishu, njite curritsakja icada lridee iwupiakje ljiaji iquemica iwaupiakjerrikjuite nadaki, macadatsakja lridee iwaopiakje ljiaji yuumapjaca cucacan irsuwao ima caidalricaniji paacapishu matsiadalri idolonai irsu. 6Lrikjauteutsa ljiaji caidalriji, Dios irrua inuatsa nanacu njaji curriperri shepani; 7njite sha inaitja pia cayu yufacadanacupiatua inaiquica upidalrin nacu. 8Mitsa panaya jitena yuyau pjiumi njaji: irruati, iwaupiakje macadadalritsa, inaitjaca mashi apaana irsu, icuitaca apaana njite imotuitaca yacuti macadadalritsa. 9Macashatacatsau yapiyawaca, ima jitjenina yuyau ljiaji cuanpiaca shaa upi njite pjiumi njaji inaitjanpepia, 10njite shetjenina inacua ljiaji inaiquica walridalri: lriyadenakja ljiaji walridalrina inaiquica, ljiaji icadalrina walriperrishu shaa jaljedauca icuam caiji Dios icapacanaa shu, ljiaji inaitjacaita shaa, itaitacarruatsa yajica ajadalricani pjiumi. 11Curricawetsa cuada ljiaji griegocapja o judio naica, njaji nakjenanatanpe o curriperri nakjenanataca, tekjuiteperri, majicapemcatua cuanca paufaca matsia, nanaikite o curriperri nanaikiteca, mitsadekja apadatsa Cristo ljiaji pjiumidalri njite lriufaca icaolrerricu icuamitsa shaa icadacape icaolreu.
12Dios ipeyuca shaa njite lriniwana shaa lrinaikitacarro shaa. Caishupa shetena inacua ljiaji icuadatacapan machia, kjenaca icapa ikichinda, kjenaperrishutsa, imaudacaperri yapiyawaca, njite tacaaperritsa querruaca. 13Itarrawatena yapiyawaca, njite irsucadaa mashidalri ikjuetewaca imatsietacakena inaiwaca, caiji Waminalri icadacapishupiena ljiyapa yuya ljiaji imashicana, caitsakja irsutsa inaitjaca. 14Mitsa pjiumi nauya njaji irsutsa shetaca inacua ljiaji ipeyukjeti, ima icatsa ljiaji icadalrica apadacarrutsa fa matsia. 15Njite ljiaji imaudacakjeti Cristo nakjuitedalri lrimenacautsa icaolrerricu, ima lrikjaute Dios iniwana shaa apadacarrutsa idaqui. Nini catimena shaa.
16Icadena lriufa inacu caidalritsa ljiaji yacuti pjiumi lrimatsiaca yapiya Cristo nakjuitedalri. Icanantaquenau njite icaiteacau yapiyawaca pjiumi yajikjetirricu. Icaolre catimadalri yapiya icanta Dios irsu salmos njite cancion matsiaperri jirretacape iwaopiakje. 17Njite pjiumi ljiaji inaitjalri o ikaiterri, inaitjenani lripitananacu ljiaji Waminalri Jesucristo, ya matsiadalri Ljinirri Dios irsu lrinakjuite.
Cuajica narsutsa naufacau naapanalricu njaji shepacaperri Cristo
18Shaa cainirriperri, pomenena ikichindataca njaji inirrinai, ima cayu irsutsa inaitjaca shaa shepacaperri icadacapua icaolreo Waminalrinacu. 19Shaa caninaiperri, ipeyu njaji ininai njite maufatsa napiya mashidaitatsa.
20Shaa nenipe, inaitja pjiumi caiji naumacapishu njaji jinirrinai ima catima Waminalri icapaca cayudalri. 21Shaa njanirrinai, makerruatatsa njaji yenipe, wadewatsa iinonatacana.
22Shaa idejicaperri narsu inaitja narsu caiji naumacapishu njaji iminanai jalredaucalricuperritua, ideji matsia currin nacapawerricucatsantja, inaitjani icaolre ajadalri yapiya ifiucapua Waminalri iwana. 23Piumi ljiaji inaitjalri, inaitjani icaolre catimadalri yapiya, caiji idejicapishuntja waminalri irsu currin achianai irsuca. 24Ima yajinina irsucautsa lricuada, waminalri yawatsa irsu ljiaji iyadape lrimatsietanda ipia. Ima shaa idejica Cristo irsu, ljiaji Iminalri ajadalri. 25Mitsa ljiaji inaitjacada mashi, lricapautsa lricuada ljiaji mashidalri lrinatjalri, ima ljiaji Dios lricaiteca pacuaca pacuna pjiumi.
© 2025 CLAN
© 2025 Seed Company