Colosenses 2
2
1Nini numa yanjica nudejica kjaida nakjuete inacu, nanacu tsakja njaji Laodicea lricuperri njite pjiumi nanaco njaji curriperri icapanjua natjishu njawaacacatsa. 2Nunaitja pjiumi cuajica nataitacarru narsuca ljiaji ifuivitacadana nacaolrerricu, yemacarruatsau caidalritsa papucutsa lrinacu ljiaji ipayukjeti njite irsucarruatsa pjiumi ljiaji lriajikje mawayacacadalri lrinakjuitedalri ljiaji yajirrina njite icadacapua icaolreu cayuatsa itaita yajica ljiaji yacuti curridalriapia Dios icadaa yaaji inacu, icatsa ljiaji Cristo; 3ima lrinakjuite pacapa pjiumi namatsiaca njaji paajishupa njite yajikjeti lridawanpepia. 4Nucaite irsu ljiaji curricarruatsa cuca imañeta shaa yacuti shu caiperri pjemicaji yacuti ajadalriperri shu ishaticadanatsa. 5Ima ninitsa currica pacau njua inai, mitsa acatsanjuaji inai nuwaupiakjerricu, njite catima njua yufacapuawa cajikjeperrishu njite yemacapua taimiwa lrinacu ljiaji icadaaca icaolreu Cristo-nacu.
6Nini caishupa, icuadatacapuena Iminalriwa ljiaji Jesucristo irsutsa yufacawa cayuji lriyarrupeshu. 7Capalriperricarru shaa tjewaca lrinacu, yemacarru tsakja taimi lrinacu icadacapua icaolreu caiji nacanantacapishupiena shaa, njite yaaca matsiadalri caidalritsa Dios irsu.
8Icapa yuyau: Wade nadeca iwaupiakje njaji yumacape icashataca shaa iwaupiakjetishu njite icanantakjeti midalrishutsa, ima currin nacanantaca caiji Cristo icadacapishu, mitsa nacanantaca ljiaji cuajica naufaaca njaji inaiqui njite njaidashutsakja njaji yaajiicape lrinacu ljiaji jalredauca.
9Ima pjiumi ljiaji Dios inaiquica pauketacani njite pacapacani Cristo-naco. 10Njite lrinakjuite Dios icadaa yaaji pjiumi lriajikje, ima ljiacatsa njevida pjiumi njaji icauljetim italricanatacaperri njite irsucape jidati. 11Lrinakjuite tsakja sha, lrikjenanatjejina shaa, currin nakjenanatacacapishupiawa njaji atsianai, mita nukjenanataca shaa lrishu ljiaji Dios inaitjalri lricadacarru apadatsa sha Cristo yapiya njite ljitacarru yuya ljiaji inaiquica camashicanadalrin. 12Napjuetacadanacupia shaa unirrico, mayanperripiena irrirriricu Cristo inai, njite lricafieta piatsenakja shaa pacuacatsa lrinai, icadacapua icaolreu Dios icafietacani ljiajikje shu. 13Njite shaa upipia, mayamperrimca shaa imashicana ima njite curricapua imaca yuyau ljiaji inaiquica camashicanadalrin; mitsa Dios icadjenina cafi shaa pacuacatsa Cristo inai, nite lrikjaote lripecu pjiumi wauya njaji wamashicana. 14Dios shaatjapia pjiumi ljiaji lridananda wadeevecawa wamashicanashu ljiaji ipapirripia werrunini; lriwayaquetapiani lriñacadanacupia lrirrua cruzanaco. 15Dios jitapia nauya jidati njaji icauljetin irsucape jiidati njite itaitakjeti, njite Cristo nakjuite lricañjata nacapa aimawerrico ljiametacana mayamicadanacuni cruzanaco.
16Nini nuquitsiñape, macadatsa nacaitepe shaa lrikjaute ljiaji iñjalri njite irralri tsakja, o nawaquetacacarrudau nafuivitacacawa, querri valripi ima o jalredauca pawafetacarruda ima tsakja. 17Pjiumi ljiaji icatsa lridanapian tamalridalrica ljiaji nawapalriutsa nacapa inoca, mitsa ljiaji ajadalri icatsa ljiaji Cristo. 18Macadatsa nacaite mashi yacuna njaji icanantacape tecoljetsa inaitjacacaperiwa kjenaperrishu, njite naa matsiadalri narsu njaji angelenai, nacaite nacapacapidantja cuajica napjeyaljeu njite nauma napjeyaljeperripjacana nawaupiakjeshuwacatsa. 19Njapuco njaji currin apapucucana lrinai ljiaji Cristo ljiaji njevidapo, njite icadalritsakja lritawiñao ljiaji padaqui pacuacatsa pjiumi, lrikeñjawani caiji Dios yumacapishu.
Maufatsau caiji nacaitecapishu njaji achianai
20Upipiena mayami shaa Cristo inai njite currinatsa njaida yaji inaco njaji jalredauca italricana. ¿Nini cuada yufawa cayuji jalredauca iyapecapishutua, inaitjaca ljiaji nacaitenda 21caiji: "manutatsa ljiarra, maiñjatsa ljiarra, o mjepatsani picapirrico"? 22Pjiumi njaji nanaitjalri iwayacacadatsau lriviaca panaitjacana, njite nanaitjandatsa nawaupiakjeshuwacatsa njite nacanantani. 23Ajadalri, nashu njaji nanaitjalri cajikjeperri shuca pacapacana lrinaco, ima lrinaaca panaitjacana matsia, matsiacarru panaikica kjenadalrishutsa, matsiacarrutsakja taimi padakirricu, mitsa njaji macuadaperricatsana ima icamitsa lricatimataca nadaqui yumalri nanaitjaca.
© 2025 CLAN
© 2025 Seed Company