2 Timoteo 2
2
Jesucristo ishulrudaute matsiadalri
1Njite pjia nuenipeshudalrina Timoteo, pikjaidatacao lrinacu ljiaji Dios imatsiaca lricadalrina pirsu Jesucristo-nakjuite. 2Ljiaji pjimirrina nucaiteca napjeyalre njaji aimadan jimicapetsakja nurso, panaya nucaite pjia picadacarru ljiaji yacuti narsu atsianai picadaaji picaulreo inacu itaitacautsa icanantacani pjiumi irsu.
3Pjia pirsutsa pumenadalrica pjirrapjitaca caiji Jesucristo ishulrudauni matsiadalrishu. 4Currim pacau apada shulrudao lriwaopiacatuantja teeculje lridejicadanacu, ima lirsutsa lricatimataca ljiaji lriminalri. 5Cayutsakja, ljiaji itupitacada currim watsa lritaita lirsuca lricuada curricada lritupita caiji lriapannashu. 6Ljiaji idejicada lridejicawalricu lirsutsa ljiaca jipa iinita lrinakjuite ljiaji lriapananda. 7Piwaopiena ljiaji nucaiterri, ima Waminalriwatsa icadaa piajii cuanshupaca pjiumini.
8Piwaopiautsa caidalritsa cuanca ljiyapacau ljiaji Jesucristo ljiaji idialri jinicu mayamicalri yuya icapiatsa ljiaji lrinakjuitedalrica ljiaji Talricanati David, caiji lricaitecapishu lrinacu ljiaji yaacuti matsiadalri nucaiterri. 9Njite lrikjaute ljiaji matsiadalri yaacuti nucanantalri nutarrawata jirrapjitakjeti, Njite-tsakja naparrapja njua cadenashu cayuji apada inucadashu inaiki; mikatsa ljiaji Dios yacu curritsa cuca itaita ipapicani. 10Niini caishupa nutarrawata pjiumi ikjuete, naikjaote njaji Dios iniwananji, nauketacarrutsakjaotsa ljiaji yuumecai njite naufacarruatsa lriinai caidalriwesta warsulri apadacapuatsa faa Jesucristo-nacu.
11Yacuti ajadalrica ljiaji:
Mayamicada faa Cristo ikjaote caafiperricautsa faa lriinai;
12watarrawatacadaa jirrapjitakjeti ikjaote, watalicanata-tsakaotsa liinai aji litalicanataliutsa nirse;
wadawacadautsa liacunaa lidawatsakjautsa waacuna.
13Wateculjetacada ljiaji wacaiterri, ljia currim lrinaitjaca cayu.
Ljiaji idejicada jiyapetacadena pjiumi
14Piwaopiawatsa narsun njite picaitewatsana Dios ipjeyalre wadewatsa narsuca yacuti nakjuetewaca. Midalritsa ljiaji caidalri; icamitsa lrimatsiketaca naji jimicapeni. 15Pinaitja pjiumi jiidati picañaatacacarrua matsia Dios ipjeyalje caiji apada idejicadashu matsia, curricarruatsa cuca ima capaimancani, njite lricanantacarruatsa mayacan ljiaji yacuti ajadalri. 16Memitsa lirsu ljiaji yaacuti macadadalitsa miperritsa ima njaji initjacape ljiaji yaacuti caidalri paawatsa naacau napjeyalreu lrirricuda ljiaji matsidalri, 17njite ljiaji nacanantalri caicaniji ipuati iipetacadashu peepe, njite caiperri naji yacuti namutuetalri njaji Himeneo njite Fileto tsakja, 18njaji yamadade njenacao lriuya ljiaji yaacuti ajadalri, nacaite uupikena nadia nacafia mayamicalri yuuya njaji mayamperrim, lrima ljiaji caidalri yaacuti lriteculjeta nawaopiakje njaji padapena icadacape icaolreo. 19Mitsa Dios lricadedina warsu apada lripucuda tamidalri yeemacau, nadanacaawa ljiaji yaacuti cayudaliji: —"Waminalri yaajintsa njaji lriyarrupe", njite lricaitetsakja "Pjiumi njaji icaitecape Cristo irsuperricana narsutsa njeenitacacao maashidalri yuya"#Nm 16:5; Is 52:11.
20Aji apada panti macadalrirricu currim uirrudapeca, palatadape-cacatsa naji lriitada, niinitsakja naji jaicudape njite turrupedape-tsakja; naji nayarru cacuadaperri namatsietacana papiape icauyatsa njite naji macuadapemtsa cuancadanacu icaoyacatsa. 21Niini yamicada wanaitjaca ljiaji maatsidalri njite wamaodacacada lriuya ljiaji icanantakjeti teeculjedalritsa, caicautsa faaji iyarruti cacuadaperrishu Dios ipjeyalje njite cayuatsa wamatsietacacao wadejicarru pjiumi idekjeti matsiadalri.
22Pipitu lriuya ljiaji maashidalri napeyulri nanaitjaca njaji piyempeticawenai, Pinaitja pjiumi jiidati piufacarru matsiawa, picadacarru picaulreo ajadalri Dios-nacu, pipeyucarru picaulrerrikjuite njaji apaana njite piufaacarru pimaudacao, pacuaca nainai njaji icadape icaolreo ajadalri Dios nacu nacaulre maupitjadalri yapiya. 23Nupieta-tsenakja nucaiteca pjia: memitsa narsu njaji cacupeperri irsuwaca midalri ikjaotetsa; piajintsa icamitsa lricadaca narsu yacuti nakjuetewaca. 24Njite ljiaji idejicada Waminalri irsu currim matsia lricuitetaca, matsiapjadekja lirsutsa lrinaitjaca matsia pjiumi irsu, yanjicada icanantaca inaiki Dios yaacu-nacu; lirsutsa lritarrawataca wiaa, 25njite lricaitecarru lrinaiwa lricaulre kjenadalri yapiya njaji curriperri yuuma sheepacani, lriwapacarru Dios ipadameta nawaopiakje najicarru ljiaji ajadalri, 26Njitedekjautsa nadiawatsa nacafiawa njite napituatsao ñacaim itrampan yuya lripresotalri niinina nanaitjacarru caiji lriumacapishu.
© 2025 CLAN
© 2025 Seed Company