Lok 8
8
Bǎchana bɛnɛ bebɛlɛ hamwêchi na Yɛso
1Ohwa haya, Yeso kwebɛlɛ ochongoloa m'maboka maolo na manɛ m'otɔkɔma Mwanɔ Kosɔka kwa Boɔlɔ bwa Abɛcha. Bakikiwa bakɛ umi na babele bekelɛ hamwɛchi nǎkɛ, 2na bamwɛ bǎchana bakebingilɛ miha, na bǎngɛ bekehɔnyinyɛ bisumi byabɔ. Hawǐngi ha baya bǎchana webɛlɛ: Maliya kwebɛlɛ buchiwa Magilalɛnɛ. Koya Malia nǎ minɛ Yɛso kwem'hunyinyɛ miha njwe. 3Na Yanɛ m'achi kwa Kuza. Koya Kusa nǎ kwebɛlɛ n'kichi m'olo kwa Hɛlɔlɛ. Webɛlɛ eyǎka Suzana na bǎngɛ bǎchana bɛ̌ngi. Baya bǎchana bebɛlɛ uhunya bomɔná bwabɔ yolo ya owasha Yɛso na bakikiwa* bakɛ.
Eta ya m'uni
(Mat 13.1-9; Mlk 4.1-9)
4Bato bɛ̌ngi bebɛlɛ uhuma o maboka mashikanɛ na okya wɛnɛ webɛlɛ Yɛso. Yɛso kwebakaninɛ ê eta: 5«Webɛlɛ komwɛ m'munyi kwebɛlɛ okya omwaka mbotɔ n'lobala lwakɛ. Hakebɛlɛ omwaka chiya mbotɔ chakɛ, bimwɛ bituchi byekǔlɛ habamba ndela. Na bɛndɔ bebinyatelɛ na tonɔnyi twebilelɛ. 6bǐngɛ byekǔlɛ o mawɛ, hachemɛninɛ, chekuminɛ yolo ya uhulwa mǎte m'bitɛtɛ. 7Chǐngɛ chekǔlɛ m'bwǐngi mwa mǐkwa. Keya mǐkwa hakyeɔminɛ hamwêchi na biya bituchi, keya mîkwa kyebihiminɛ. 8Ela biya bingɛ bituchi byekǔlɛ m'bitɛtɛ bisɔka. Byemɛninɛ na oha mia wa mia.» Yɛso hakehulɛ otɔkɔma biya, kwetɔkɔmɛ wa lete leolo okana: «Koya minɛ kwe na matɔ ma oholecha, koholechɛ!»
Ebalɔ ya osɔmya wa beta
(Mat 13.10-17; Mlk 4.10-12)
9Obibyɔ, bakikiwa* ba Yɛso bem'buchichɛ kɛtɛ: ‹‹Ê eta yehobɛnja okana é?» 10Yɛso kwebakailɛ: «Bɛnywɛ mwehɛlwɛ mwandɔ na Abɛcha wa omaná bito bya Boɔlɔ bwakɛ, ela o bǎngɛ bato nǎngo, bɔ nehosambela wa beta, yolo
‹babɛ beholɔlá, ela bashimɔnɛ.
Yolo babɛoholechɛ, ela bashitɔtɔbɔlɛ.› »#8.10 Sɔmakwɛ Isaya 6.9
Yɛso kwatɔtɔbɔla eta ya m'uni
(Mat 13.18-23; Mlk 4.13-20)
11Yɛso kwekaninɛ eyǎka: «Holechiwɛ byɛnɛ byehobɛnja okana ê eta: mbotɔ nǎ Mwanɔ kwa Abɛcha. 12Chiya mbotɔ chɛnɛ chekǔlɛ habamba ndela chechihutanywɛ na baya bato bebaholecha Mwanɔ kwa Abɛcha. Hanyuma, Ehengele yechǔlɛ na ohunya koya Mwanɔ m'mitema kyǎbɔ, yolo bashiwashɛ na ohɔnɛ. 13Chiya chekǔlɛ o mawɛ, chechihutanywɛ na baya bato bɛnɛ bebaholecha koya Mwanɔ kwa Abɛcha, na okowasha wa sasɔ. Ela koya Mwanɔ kushibabá na michinga n'ta mwǎbɔ, yolo bebawasha mɛngɔ manɛ ka. Habebabá m'bikinjwa, bebahanya washa lyabɔ. 14Chiya chekǔlɛ m'bwǐngi mwa mǐkwa, i chihutanywɛ na baya bato bɛnɛ bebaholecha Mwanɔ kwa Abɛcha. Ela bebahelelechiwɛ na binywa bǐngi, na obɛnja bomɔná, na ǒnda ebalɔ, nǎ bashibabota bikuma. 15Na chiya chekǔlɛ m'bitɛtɛ bisɔka chechuhutanɛ na baya bato bebaholecha koya Mwanɔ kwa Abɛcha na okobea n'ta n'tema kyǎbɔ, nǎ bebabota bikumá mia mia.
Eta ya yɛ̌ngɛ
(Mlk 4.21-25)
16Yɛso kwekaninɛ eyǎka: «Ushi n'to kwenalamya tala na olewila na lwɛsɔ aɔ olebea osé wa elebaleba. Ela, kwebáebea o yɔbɔ, yolo bato habekingela n'sɛsɛ, bamɔnɛ yɛ̌ngɛ. 17Na Byɔsɛ byɛnɛ byebibiswɛ, byebisulwa hololo, na shitɔ lyɔlyɔsɛ lyelibiswɛ lye manyiwa hololo.
18«Obibyɔ, shamakwɛ lwɛngɛlolomɛ o biya byamweoholecha! Yolo koya minɛ kwe na eto nǎ kwebahɛwa êngɛ, ela koya minɛ kushi na eto, ben'sapa na eya yakeholanga oba nǎyɔ.»
N'nakɛ na bashiwabɔ na Yɛso
(Mat 12.46-50; Mlk 3.31-35)
19Lomwɛ lusuku, n'nakɛ kwa Yɛso na bashiwabɔ bekělɛ om'ɛnɛna, ela bashiɔshishɛ ohiya wakele yolo ya ubula wa bato. 20Ben'kaninɛ Yɛso kɛte: «N'nɔbɛ na bashiwɛnyu bee hamboka, behobɛnja oomɔna.» 21Ela Yɛso kwebakaninɛ bato bɔsɛ kɛte: ‹‹M'ma na bashiwɛto, ná baya bɛnɛ bebáholecha Mwanɔ kwa Abɛcha na okoeta.»
Yɛso kwǎmbela n'naka
(Mat 8.23-27; Mlk 4.35-41)
22Lomwɛ lusuku, Yɛso kwechininɛ m'bwǎtɔ hamwɛ̌chi na bakikiwa bakɛ. kɛ na obakaninɛ binɔ: ‹‹Totabowɛ m'bongɛ bwala bwa echiba.›› Nǎ byabekělɛ.
23Habetolilɛ lwɛndɔ, Yɛso kwewasilwɛ na tolɔ, kɛ na obeta. Hɔka haya, n'naka kwetolilɛ olomba (otola) m'echiba, na mǎte metolilɛ okingela n'ta bwǎtɔ, bebɛlɛ m'atale. 24Baya balɔmbwɛ ba Yɛso, ben'kelɛ om'biola m'okaba kɛte: «N'lɔmbɔchi, N'lɔmbɔchi twǎwa!»
Yɛso kwebyuilɛ, na oambela n'naka na mabembe, na webɛlɛ pí. 25Ohwa, Yɛso kwekaninɛ balɔmbwɛ* bakɛ kɛte: «Washa lyɛnyu lyeohé?» Ela, bekakelwɛ wɛ̌nɛ, eyǎka bewasilwɛ na bɔ̌ba. Betolilɛ okaninana bɔka wa bɔka kɛte: «Koko i nanyi? Minɛ kwǎmbela n'naka na mabembe, na byɔnyibyɔ byam'holecha!»
Yɛso kwabenga miha n'ta mwa n'to
(Mat 8.28-34; Mlk 5.1-20)
26Hanyuma ha hâya,Yɛso na bakikiwa* bakɛ betabowɛ m'bwala echiba, bekimanɛ́ o yabo ya ebalɔ ya Bagɛlasi yɛnɛ ye yelɔlanɛ na ebalɔ ya Galilaya. 27Mɛngɔ mɛnɛ Yɛso kwebɛlɛ osala m'bwǎtɔ, komwɛ n'to kwa keya mboka kwechǔlɛ hɔka nǎkɛ. Koya n'to kwebɛlɛ na miha, mɛngɔ malǎhu kushibɛlɛ ochwala ngobɔ, eyǎka kushibɛlɛ shama o sɛsɛ, ela o bichwate. 28Hakɛm'mɔninɛ Yɛso, Kweletɛlilɛ hase hambɛlɛ hakɛ na kwekabilɛ wa lete leolo kɛte: «Yɛso, Mwǎna kwa Abɛcha kwee hakolo, ohobɛnja é na nɛnɛ? Naotɛndɛlela ushisǒbyɛ!» 29Kwekaninɛ biya, yolo Yɛso kwebɛlɛ okanina koya m'ha kom'humɛ. Koya m'ha kwebɛlɛ om'wata Nyɛndɔ chǐngi. Eyǎka bato bebɛlɛ om'hamba mikɔchi kya bikɛla o makolo na o mabɔ̂ yolo ya om'hɔcha. Ela kwebɛlɛ oala byɔsɛ. Eyǎka koya m'ha kwebɛlɛ on'longa okya n'longo.
30Nǎ Yɛso kwem'buchichɛ: «Chǐna lyɔbɛ i nanyi?» Kwen'kailɛ: «Chǐna lyanyi i ‹Elele.› » Kwetɔkɔmɛ biya yolo miha kǐngi kyen'kingelɛ. 31Keya miha kyelekɔmbɛlɛlɛ wa kele yolo kushibatɛlɛ m'ena#8.31 Ena ye obɛnja okana i ibu yɛnɛ miha kyebawɛnywa nabyehiya lusuku lwa esula. elǎhu. 32Ha eya ibu hebɛlɛ eoto ya ngolobɛ chɛnɛ chebɛlɛ oya o aɔnɔ. Keya miha kyelekɔmbɛlɛlɛ wa Yɛso kobalɛ̌ bakingelɛ n'chiya ngolobɛ. Yɛso kwewashishɛ bakyɛ. 33Yolo ya bîya, keya miha kyehuminɛ n'koya n'to, na okingele n'chiya ngolobɛ. Eya eoto ya ngolobɛ yetolilɛ osala abelɔ, uhuma o aɔnɔ na oletɛla n'ta mwa echiba. Ngolobɛ chɔsɛ chechiminɛ
34Baumbi ba chiya ngolobɛ habemɔninɛ byɔsɛ byeeteɛ besininɛ, okya o mboka na o mabala okanina bato koya mwanɔ. 35Bato bechǔlɛ omɔna byɛnɛ byêteɛ. Ben'kelelɛ yɛso, bɔ na omɔna koya n'to minɛ miha kyem'huminɛ kwen'shamɛ hɔka na Yɛso, kwebɛlɛ n'chwalɛ ngobɔ na kwebɛlɛ na lwɛ̌nyi lwakɛ lɔsɛ, bemɔninɛ bɔ̌ba. 36Baya bato bɛnɛ bemɔninɛ na mɛ̌sɔ mabɔ eya ekɔkɔ, betolilɛ okanina bange bato koya n'to minɛ kwebɛlɛ na miha kwehɔnyiwɛ.
37Bato ba ebalɔ ya Bagɛlasi bewasilwɛ na bɔ̌ba. Ben'sabilɛ Yɛso kuhumɛ m'eya ebalɔ. Yɛso kwechininɛ m' bwǎtɔ kɛ na okya. 38Koya n'to minɛ miha kyem'huminɛ kwelekɔmbɛlɛlɛ wa kele yolo kokyɛ hamwɛchi nǎkɛ. Ela Yɛso kwen'kaninɛ kɛte: 39«Suela ɔbɛ, okyɛ olesamba byaoetela Abɛcha.» Nǎ koya n'to kwekělɛ m'okana n'keya mboka, byɔsɛ byam'etela Yɛso.
Enyundu ya Yailɔ na komwɛ m'achana bahɔnywa
(Mat 9.18-26; Mlk 5.21-43)
40Mɛngɔ mɛnɛ Yɛso kwetabowɛ bongɛ bwala bwa echiba, eoto ya bato yem'pɔkɛlɛm yolo bɔsɛ bebɛlɛ om'hɛmba. 41Komwɛ n'to chǐna lyakɛ Yailɔ kwechǔlɛ haya. Kwebɛlɛ m'hɛla kwa shinagɔgi. Kwebungilɛ machú hambɛlɛ ha Yɛso, na olekɔmbɛlɛla wakele kokyɛ o sɛsɛ kyǎkɛ, 42yolo enyundu yakɛ yebɛlɛ osǒmwa hɔka na owa, na eya enyundu nǎ yebɛlɛ mwanâkɛ kwa ehɛnɛ. Ebɛlɛ na miâ umi na kebele. Yɛso kwekělɛ nakɛ hamwɛchi. Mɛngɔ mɛnɛ Yɛso kwesebɛlɛ n'lwɛndɔ, eoto ya bato yebɛlɛ om'hindilicha ngobe chɔsɛ. 43M'eya eoto, webɛlɛ komwɛ m'achana kwebɛlɛ na esumi ya abale miâ umi na kebele. Kwekuchichɛ byɔsɛ byakebɛlɛ nǎbyɔ o bakilahi, ela ushi n'to kweɔshishɛ om'hɔnya. 44Koya m'achana kwesɛninɛ o nyumá wa Yɛso kɛ na ǒma ngobɔ kyakɛ. Hɔka haya kɛ na ohɔna. 45Yɛso kwebuchichɛ: «I nanyi minɛ kwakoma?» Bɔsɛ bekaninɛ nambɔ ushibɛlɛ n'to kwem'ominɛ. Pɛtɛlɔ kwen'kaninɛ: «N'lɔmbɔchi, eoto ya bato ye eochongolowɛ na oohindilicha ngobe chɔsɛ!» 46Ela Yɛso kwekaninɛ: «We n'to kwakoma, yolo naholecha omwɛ oɔma wapûma.» 47Koya m'achana hakemɔninɛ kɛte kwahomanyiwa, kwelehunyinyɛ m'otanda, na kwebungilɛ machú hambɛlɛ ha Yɛso. Kwekaninɛ hambɛlɛ ha bato bɔsɛ, ebalɔ ya om'oma Yɛso na byakehɔninɛ hɔka haya. 48Yɛso kwen'kaninɛ kɛte: «Enyudu yanyi, washa lyɔbɛ lyaohɔnya. Ketaka na talala!»
49Yɛso lwakebɛlɛ otɔkɔma, komwɛ n'to kwechǔlɛ uhuma o sɛsɛ kya Yailɔ na on'kanina kɛte: «M'hɛla! Enyundu yɔbɛ ishi hɔ eyǎka. ushin'tɛnjɛ eyaka n'lɔmbɔchi!» 50Yɛso hakeholechɛ biya, kwen'kaninɛ Yailɔ: «Ushibɛ na bɔ̌ba, washaka ka, na enyundu yɔbɛ yehɔna.»
51Mɛngɔ mɛnɛ Yɛso kwehǐlɛ o sɛsɛ kya Yailɔ, kweɛminɛ n'to kɛkɛsɛ okingela hamwɛchi nǎkɛ, ela Pɛtɛlɔ na Yɔana na Yakɔbɔ na bibushi bya eya enyundu ka. 52Bato bɔsɛ bebɛlɛ m'olela mwǎna. Nǎ Yɛso kwebakaninɛ: «Moshilělɛ, yolo mwǎna kushinawá, kwebetɛ ka!» 53Bɔnyibɔ ben'sɛilɛ yolo bemaninɛ okana mwǎna kwesebɛlɛ m'mubɛ. 54Ela Yɛso kwem'watilɛ mwǎna o obɔ̂ na okana wa lete leolo kɛte: «Mwǎna, byoaka!» 55Hɔka haya Eya enyundu yekukilɛ na okimana. Yɛso kwebakaninɛ bam'hɛ mwǎna elewa. 56Bibushi byakɛ byekakelwɛ wɛ̌nɛ. ela Yɛso kwebahanyinyɛ bashikaninɛ n'to kɛkɛsɛ byɛnɛ byêtea.
Valgt i Øjeblikket:
Lok 8: byi
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
2025 Forum Communautairre des Traducteurs de la bible et Alphabetisation
