Lok 7
7
Yɛso kwahɔnya komwɛ n'kichi
(Mat 8.5-13)
1Yɛso hakehulɛ okana biya byɔsɛ hambɛlɛ ha bato bebɛlɛ om'holecha, kwekělɛ Apɛlɛnaumu. 2N'keya mboka, mwebɛlɛ komwɛ m'hɛla kwa bilusha minɛ kwebɛlɛ na n'kichi kwǎkɛ kwakebɛlɛ bɛnja wɛ̌nɛ. Koya n'kichi kwebɛlɛ n'sǒmwa minɛ kwesebɛlɛ ohukumba. 3Koya m'hɛla kwa bilusha hakeholechɛ mwanɔ kwa Yɛso, kwem'hililɛ bamwɛ baongo ba Bayola bakyɛ on'saba Yɛso kochwɛ ohɔnya n'kichi kwǎkɛ. 4Baya baongo habehǐlɛ we Yɛso, belenyɛmbɛtɛlɛ na okana: «Koko m'hɛla kwa bilusha kwelěngyɛ owashiwa, 5yolo kɛ kwebabɛnja elɔngɔ yɛto, nǎ kɛnyikɛ kwetokubailɛ lele shinagɔgi* lyɛto.» 6Obibyɔ, Yɛso kwekělɛ hamwɛchi nǎbɔ. Habebɛlɛ hɔka na ohiya o sɛsɛ kya koya m'hɛla kwa bilusha, koya m'hɛla kwa bilusha kwehililɛ makɛnda makɛ makyɛ on'sambela Yɛso kɛte: «N'kaninakɛ kushiletɛnjɛ ochwa, yolo nɛnɛ nishilěngyɛ kɛ okingela n'sɛsɛ kyǎnyi. 7Nǎ yolo ya biya, nalemɔna nɛnɛ mǐnɛ nishilěngyɛ ochwa wa kele. Ela kotɔmɛ enywa emwɛ̂chi ka na n'kichi kwanyi kwehɔna. 8Ebalɔ nɛnɛ lwanyi nebábá hamanda ha bahɛla banyi, na nɛnɛ nebábá na bilusha hamanda hanyi; nahosambela komwɛ kɛte: ‹ketaka!› kwebakya. Na nahosambela kongɛ: ‹chutaka!› kwebachwa. Na nahosambela n'kichi kwanyi kɛte: ‹etaka ee!› kwebaeta.» 9Yɛso hakeholechɛ bîya, kwekakelwɛ wɛ̌nɛ koya m'hɛla kwa bilusha obibyɔ kwekaloɛ o eya eoto ya bato yebɛlɛ on'lama na obakanina kɛte: «Nehon'kanina kɛte n'ta ebalɔ yɔsɛ ya Ishilaɛlɛ nishinamɔna n'to kwa washa leolo nɛhɛ lenɔ. 10Baya bato behililwɛ na koya m'hɛla kwa bilusha habesuelɛ o sɛsɛ, bebangilɛ koya n'kichi kwahohɔna.
Yɛso kwakukya mwǎna kwa m'achana m'bulwa
11Ohwa, Yɛso kwekělɛ o kemwɛ mboka kyebɛlɛ buchiwa Naini, bakikiwa* bakɛ na bangɛ bato bɛ̌ngi bekelɛ nakɛ. 12Hakebɛlɛ hɔka na n'changɔ kwa loba lwa keya mboka, kwesambanɛ na eoto ya bato bɛnɛ bebɛlɛ okya ochia m'mu kwa mwǎna kwa n'lomyana, koya mwana kwebɛlɛ ehɛnɛ na n'nakɛ kwebɛlɛ m'achana m'bulwa. Bato babǔlɛ ba n'keya mboka bebɛlɛ on'shindiicha koya m'achana m'bulwa. 13Ɔlɔ Yɛso hakem'mɔninɛ kwem'mɔnɛnɛ kɛnɛ wɛ̌nɛ. Kwen'sambelɛ kɛte: «M'ma nǎngo olela.» 14Yɛso kwesɛninɛ hɔka na sanduku lya m'mu na ǒma. Bato bebɛlɛ batɛtɛ leya sanduku bekimanɛ. Yɛso kwekaninɛ kɛte: «m'walobaka, nǎkana: byoaka!» 15Koya m'walobaka minɛ kwebulɛ, hɔka hǎya kwebyoilɛ na kweshaminɛ hase na otola okɔmbɔla. Yɛso kwen'suechɛ we n'nakɛ.
16Bato bɔsɛ bewasilwɛ na bɔ̌ba, betolilɛ otɔna Abɛcha m'okana kɛte: «N'languchi m'olo nǎ kwǎhiya hawǐngi hɛto!» Eyǎka bekaninɛ kɛte: «Abɛcha kwǎchwa ohɔnya bato bakɛ!» 17Mwanɔ kwa eya ekɔkɔ yeitilɛ Yɛso kwehǐlɛ ngobɛ chɔsɛ n'ta ebalɔ ya Yolɛa na m'bibalɔ byɔsɛ bya ŋumba.
Yɔana n'chunji kwahila balɔmbwɛ bakɛ wa Yɛso
18Biya binywa byɔsɛ byeitilɛ Yɛso, balɔmbwɛ ba Yɔana ben'kaninɛ. Yolo ya bǐya, Yɔana kwebuchichɛ babele hawǐngi habɔ. 19Kwebahililɛ wa Ɔlɔ Yɛso bam'bochɛ kɛte: «Kɔkwɛ nǎ koya Mashiya minɛ kwěchwa? aɔ toɛmbɛ kongɛ?» 20Baya balɔmbwɛ habehǐlɛ we Yɛso ben'sambelɛ kɛte: «Yɔana N'chunji nǎ kwatohila wa wele tôbochɛ nǎmbɔ kɔkwɛ nǎ Mashia minɛ kwěchwa, aɔ tohɛmbɛ kongɛ.»
21M'maya mɛngɔ, Yɛso kwehɔnyinyɛ bato bɛ̌ngi bebɛlɛ ososoa na bisumi, na bitɛndɛ, na bebɛlɛ na miha, na bihɔbu bǐngi byemɔninɛ. 22Oisula, Yɛso kwebakailɛ baya balɔmbwɛ ba Yɔana kɛte: «Mokyɛ on'sambela Yɔana biya byɔsɛ byamwamɔ̂na na oholecha. Bihɔbu byatola omɔ̂na, na bitɛndɛ byatola okyata, na baboshɔndɔ bahahachwa, na bihole byatola oholecha na babu bakuka, na ba mbuchu beosɔmiwa Mwanɔ Kosɔka#7.22 Sɔmakwɛ Isaya 35.5-6, 61.1. 23Komba koya minɛ kushichiminya washa lyakɛ wandele!»
24Baya balɔmbwɛ ba Yɔana besuelɛ. Yɛso kwetolilɛ osambela bioto bya bato yolo ya Yɔana kɛte: «Mwekělɛ n'ta longo* olɔla ě? Wé Mwekělɛ omɔna losɔ lwe otekechwa na n'naka? Nǎngo! 25Nǎmbɔ bishi biya, mwekělɛ olɔla ě? Mwekělɛ olɔla n'to kwe n'chwalɛ ngobɔ chibɛnju? Nǎngo. Baya beochwala ngobɔ chibɛnju na be na maisha masɔka, i n'sɛsɛ kya boɔlɔ mwabebashama! 26Obibyɔ, mwekělɛ olɔla ě? Ɔmɔna n'languchi? Nǎ bibyɔ! nee hon'sambela kɛte kwebɛlɛ n'languchi*, Eyaka kwebɛlɛ m'etɛ n'languchi. 27Koya Yɔana nǎ minɛ Lokɔlɔ Lohaha lwehotɔkɔma yolo yakɛ kɛte:
‹Holechiwɛ! Nahila n'kichi kwanyi kôbangelwɛ,
yolo kwôlɔngɛchɛ ndela.›#7.27 Malaki 3.1
28Nehon'kanina kɛte, hawǐngi ha bato bɔsɛ ba m'ɛnɔ ebalɔ ushi n'to kwe m'hɛla oheta Yɔana. Ela ata biya, koya minɛ kwe mwǎnyuɛ m'boɔlɔ bwa Abɛcha*, nǎ m'hɛla oheta Yɔana.»
29Bato bɔsɛ na bawa n'lambo bɛnɛ beholechɛ mwanɔ kwa Yɔana bemaninɛ kɛte Abɛcha kwebábá n'sɔka. Na byebewashishɛ ochundiwa na Yɔana. 30Ela Bafalisayɔ na nɔmbɔchi cha ndɔ* bɔ behanyinyɛ biya byɛnɛ byebɛlɛ bɛnja Abɛcha wa bele. Obibyɔ, behanyinyɛ otabewa na Yɔana.
31Yɛso kwe kaninɛ eyǎka kɛte: «Nenahutanya bato ba lonɔ lobotɔ lwa lenɔ na bato ba bihé? I bahutanɛ na nanyi? 32Ibahutanɛ nɛhɛ bǎna bebashamɛ n'lakala m'oeta yɔka bamwɛ o bangɛ nabɔ kɛte:
‹Twan'kɔmbɛla ŋɔma, ela musaîna!
Twakemba ngembɔ cha elelɔ, ela musǎlela!›
33«Yolo hehǐlɛ Yɔana n'chunji, kushibɛlɛ oya mikatɛ na kushibɛlɛ onywa livai na bɛnywɛ mwebɛlɛ okana kɛte: ‹Kwee na m'ha!› 34Mɛngɔ nɛnɛ Mwǎna kwa N'to nǎchwa nee hoya na onywa, bɛnywɛ mweokaná: ‹Lɔlakwɛ! koko n'to i n'lafi na m'ɔlwa, Kenda lya bawa n'lambo na bawa bobé!› 35Ela lwɛ̌nyi lwa Abɛcha lwe lomanyiwɛ oba lwa chikelwɛ o baya bɛnɛ behomwasha.»
Yɛso kwa lɛɛlɛla bobé bwa komwɛ m'achana
36Komwɛ M'falisayɔ* kwem'buchichɛ yɛso o sɛsɛ kyǎkɛ oya elewa. Yɛso kwekingelɛ n'sɛsɛ kya koya M'falisayo kweshaminɛ oya elewa. 37N'keya mboka mwebɛlɛ komwɛ m'achana kwa bobé. Koya m'achana hakeholechɛ mwanɔ kɛte Yɛso kwe n'sɛsɛ kya koya M'falisayɔ, kwekingelɛmɔ kwen'kohɛ ekaya yɛnɛ ye ekilolɛ mwambɔ. 38Kwekimanɛ onyuma wa makolo ma Yɛso m'olela. Ohwa, kwetolilɛ ohosa makolo ma Yɛso na njuli chakɛ. Kwebɛlɛ omaumbatela maya makolo na omashinya mwambɔ.#7.38 O Bayola nǎmbɔ nꞌto kwahobɛnja omɔnya wa kongɛ́ kɛte kwehon'nyɛmya kwebɛle om'ombatela makolo. 39Mɛngɔ mɛnɛ koya M'falisayɔ minɛ kwebuchichɛ Yɛso kwemɔninɛ bîya, kwetolile otɔkɔmá n'ta n'tema kwakɛ kɛte: «Koko n'to kwenabɛlɛ kěnɛ n'languchi, kwenamaninɛ koko m'achana kwa m'oma i n'to kwa bihé. kwenamaninɛ okana kěnɛ i m'wa bobé.»
40Obiya,Yɛso kwekaninɛ koya M'falisayɔ kɛte: «Shimɔni, nee na eto ya oosambela.» Shimɔni kwen'sambelɛ kɛte: «N'lɔmbɔchi, kanaka.» Yɛso kwekaninɛ kɛte: 41«Webɛlɛ bato babele bɛnɛ bebɛlɛ na lɛni lya komwɛ n'to.Kwan'tangi kwekuhilɛ linali#7.41 Lenali bobɛlɛ bomɔná. Na lenale kemwɛ lyebɛlɛ olepa n'kelɔ kwa n'to kwa lusuku lomwɛ̂chi. kama chitanɔ na kwa bobele kwekuhilɛ maumi matanɔ. 42Baya bato babele habemɔninɛ kɛte bashiɔsha osuecha boya bomɔna. Koya minɛ bomɔna kwebalɛ̌lɛlɛ bɔsɛ babele lea lɛni. Obibyɔ, o baya bɔsɛ babele i kohe kwem'bɛnja wɛ̌nɛ koya n'to minɛ kwebahɛlɛ lea lɛni? 43Shimɔni kwekailɛ: «Neholanga kɛte i koya minɛ kwalɛɛlɛlwa bomɔna bwǐngi.» Yɛso kwen'sambelɛ: «Wǎkaa bisɔka.»
44Ohwa, Yɛso kwekalowelɛ koya m'achana nǎ on'sambela shimɔni kɛte: «Wemwɛnɛ koko m'achana? Nɛnɛ nakingela n'sɛsɛ kyɔ̌bɛ, wasǎpa mǎte ma okɔka makolo manyi. Ela koko m'achana kɛnyikɛ kwakɔka makolo manyi na matata ma lohanga lwakɛ na ohosa makolo manyi na njuli chakɛ. 45Kɔkwɛ wasatǎnya wa okombatela, ela koko m'achana, tango byandakingela hanɔ kushiolɛa oumbatela makolo manyi. 46Kɔkwɛ osam'bɔnga mauta on'swɛ kwanyi, ela kɛnyikɛ, kwashinya mwambɔ o makolo manyi#7.46 O Bayolo n'kɛnyi kwahohiya, bebɛlɛ on'tanya m'om'ha mǎte ma osoa makolo, m'om'ombatela, m'om'bɔngya mwambɔ o makolo.. 47Yolo ya bîya, naosambela kɛte: Ata nǎmbɔ bobé bwakɛ bwebɛlɛ bwǐngi bwa lɛɛlɛlwa bɔsɛ. yolo kwamɔnya lǒndɔ lǒlo wa ndele. Koya minɛ kwabalɛɛlɛlwa hinɛ, kwebá onda hinɛ. 48Ohwa, Yɛso kwekaninɛ koya m'achana kɛte: «Bobé bɔbɛ bwalɛɛlɛlwa.» 49Baya bebɛlɛ hamwɛchi na Yɛso m'oya, betolilɛ oboshana kɛte: «I n'to nake koko minɛ kwenaɔsha olɛ̌lɛla bobé?» 50Ela Yɛso kwekaninɛ koya m'achana kɛte: «Washa lyɔbɛ lyaohɔ̂nya, ketaka na talala.»
Valgt i Øjeblikket:
Lok 7: byi
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
2025 Forum Communautairre des Traducteurs de la bible et Alphabetisation
