Lok 16
16
Eta ya n'kungi kwa lwɛnyi
1Yɛso kwetɛlɛlɛ balɔmbwɛ* bakɛ ê eta kɛte: «Webɛlɛ komwɛ n'to mbɔná kwebɛlɛ na n'kichi kwǎkɛ minɛ kwebɛlɛ okonga bito byǎkɛ. Bato ben'shitaki koya n'kungi wa ɔlɔ lyakɛ okana kohoya bomɔná bwa ɔlɔ lyakɛ bibe. 2Nǎ ɔlɔ lyakɛ lyem'buchichɛ na on'kanina kɛte: ‹Bato behokana we yolo yɔbɛ? Binɔ, ombalela bomɔná bwanyi, ebalɔ ushiba eyaka n'kungi.›
3Koya n'kungi kwelangilɛ n'ta n'tema kwelebochichɛ kɛte: ‹Ɔlɔ lyanyi lyehobɛnja ombenga o n'kelɔ, o binɔ naetɛ we? Nishiɔsha olema, na osaba saba nemɔna abolɛ. 4Nahomana byandêta, yolo handebengwa o n'kelɔ, bato babɛ okalebesha wabɔ.› 5Nǎ kwetolilɛ obocha bato malɛnyi ma ɔlɔ lyakɛ komwɛchi komwɛchi. Kwebuchichɛ koya kwan'tangi: ‹We na lɛnyi lya chnga wa ɔlɔ lyanyi?› 6Kwen'kailɛ kɛte: ‹Nee na lɛnyi lya ngongolo mia kemwɛ̌chi kya mauta. › Koya n'kungi kwen'kaninɛ kɛte: ‹Shamaka hanɔ abelɔ, kohaka ekɔlɛlɔ, kɔlaka ngongolo maumi matanɔ.› 7Ohwa kwebuchichɛ kongɛ kɛte: ‹Kɔkwɛ we na lɛnyi lya chinga?› Kwen'kailɛ: ‹Nee na lɛnyi lya saki mia kemwɛ̌chi kya busu bwa nganɔ.› Koya n'kungi kwen'kaninɛ kɛte: ‹Kohaka engɛ ekɔlɛlɔ, kɔlaka maumi enana.› 8Koya mbɔná kwesɛ̌lɛlɛ koya n'kungi mwɛ̌ngɛ, yolo ya lwɛ̌nyi lwakɛ. Ebalɔ bato ba enɔ ebalɔ bebaeta bito byabɔ hawǐngi habɔ wa lwɛ̌nyi oheta bato ba yɛ̌ngɛ. »
9Yɛso kwekaninɛ eyaka: «Na nɛnɛ nan'kanina kɛte mobɛ oleetela makɛnda na bomɔná bwa bubikya bwa enɔ ebalɔ. Yolo mɛngɔ mɛnɛ bushiba eyaka, Abɛcha kwem'pɔkɛla m'boshami bwa milombo. 10N'to minɛ kwem'utakelwɛ o bito binɛ, i kwa uútakelwa byɔka biya o bito biolo. Na koya minɛ kwe mwɛ̌ngɛ o bito binɛ, i mwɛ̌ngɛ ka na o bito biolo. 11Obibyɔ, nambɔ bɛnywɛ mushi bautakelwɛ o bomɔná bwa bubikya bwa enɔ ebalɔ, i nanyi kwem'utakela wa okonga bomɔná bwa kěnɛ? 12Na nambɔ mushinaba bautakelwɛ o bomɔna bwa bangɛ, i nanyi kwenam'ha bomɔná bwelěngyɛ oba bwɛnyu?
13«Ushi n'kichi kwenakelela maɔlɔ mabele. Yolo, byelěngyɛ koɔnywɛ lemwɛ, na kobɛnjɛ lengɛ. Aɔ kweba n'chibatebatelwɛ wa lemwɛ ɔlɔ, na oɛcha lěngɛ. Mushinakelela Abɛcha na okelela bomɔná m'mɔka maya mɛngɔ.»
Yɛso kwakaa Bafalisayɔ
(Mat 11.12-13; 5.31-32; Mlk 10.11-12)
14Mɛngɔ mɛnɛ Bafalisayɔ* beholechɛ biya, ben'sɛilɛ Yɛso, yolo bebɛlɛ obɛnja bomɔná. 15Nǎ Yɛso kwebakaninɛ kɛte: «Bɛnywɛ mwebalêta oba basɔka o mɛ̌sɔ ma bato. Ela Abɛcha kwebamana byɛnɛ bye m'mitema kyɛ̌nyu. Yolo, bito byɛnɛ bato bebamɔna oba bisɔka, Abɛcha kwebabiɔnywa wɛnɛ. 16M'benda* kwa Musa na mikɔlɔ kya ŋanguchi* na byɛnɛ bato bebɛlɛ olama mpaka ohiya masuku ma Yɔana N'chunji. Otanga maya masuku, i Mwanɔ Kosɔka kwa Boɔlɔ bwa Abɛcha* nǎ kwehotɔkɔmwa ka. Na kwabalwa kohoeta oɔma wakɛ ɔsɛ, yolo kokingelɛ m'boya Boɔlɔ. 17Ela, ata binɔ, oheta wa kolo na sé i ohuhu. Ela, M'benda* kwa Abɛcha kushihunyiwa ata abande amwɛchi.
18«N'to kɛkɛsɛ minɛ kwabenga m'achiakɛ na okɔnda kongɛ, komanɛ okana kwaeta busɛi. Na kɛkɛsɛ minɛ kwekɔ̌nda m'achi kwabengwá, kɛlwakɛ kwaeta busɛi.»
Eta ya mbɔna na Lazalɔ
19Yɛso kwetɛlilɛ eyaka ê eta kɛte «Webɛlɛ komwɛ n'to mbɔna. Koya mbɔna kwebɛle ochwala ngobɔ chisɔka wɛ̌nɛ na cha bɛi leolo. Masuku mɔsɛ kwebɛlɛ oeta m'onda kela lusuku. 20Ombɛlɛ wa sɛsɛ kya koya mbɔna webɛlɛ komwɛ n'to mbuchu, kwebɛlɛ buchiwa Lazalɔ. Koya Lazalɔ kwebɛlɛ na mbyabya m'bele kɔsɛ. 21Kwebɛlɛ bɛnja oya makoko mɛnɛ mebɛlɛ okwa ohuma o etaleɔ ya koya mbɔna. Na towa twebɛbɛlɛ ochwa olamba mbyabya chakɛ.
22«Lomwɛ lusuku, Lazalɔ kwebulɛ, bakɛnji* ben'kuhilɛ hɔka na Ibulaimu. Ohwa haya, koya mbɔná lwakɛ kwebulɛ, bɔ na on'chiya. 23Oya o babú, koya mbɔná kwebɛlɛ ososowa wɛ̌nɛ. Kwekinunɛ mɛ̌sɔ, kwemɔninɛ Ibulaimu wa kɔ, na kwemɔninɛ Lazalɔ kwe hɔka nakɛ. 24Nǎ kwekabilɛ wa lete leolo kɛte: ‹Tata Ibulaimu, ombɔnɛnɛ kɛnɛ! M'hilakɛ Lazalɔ kochundɛ n'nywɛ kwakɛ m'mǎte, yolo kohɔchɛ lulimi lwanyi. Yolo nehososoa n'ta lônɔ lolende.›
25«Ela Ibulaimu kwen'kailɛ: ‹Mwananyi! Ɛngɛlɛchaka kɛte wepatilɛ bito bisɔka bǐngi hawebɛlɛ o mwɛkɔ. Ela Lazalɔ kwesosoɛ wɛ̌nɛ. Lenɔ kɛnyikɛ kwesele n'ta sasɔ, na kɔkwɛ we n'ta masoso. 26Eyaka, hawingi ha bɛswɛ na bɛnywɛ hɛ ena eolo. Oibyɔ, baya bɛnɛ behobɛnja oheta ohuma onɔ, okya obɔ, bashiɔsha. Na baya bɛnɛ behobɛnja ohuma obɔ, ochwa onɔ, bashiɔsha.› 27Koya mbɔná kwekaninɛ kɛte: ‹Tata, naosaba tangaka uhila Lazalɔ kokyɛ o elɔngɔ yɛto, 28yolo ne na bashiwɛto batanɔ, kokyɛ obamɔnya yolo bashichwɛ ososoela onɔ o ibú ya masoso.› 29Ela Ibulaimu kwen'kaninɛ kɛte: ‹Bashiwɛnyu bee na mikɔlɔ kya Musa na kya ŋanguchi*. Babɛ oholecha byɛnɛ byakekekǎnɛ!› 30Ela koya mbɔna kwekaninɛ kɛte: ‹Nǎngo tata Ibulaimu. Na bishi biya ka, ela nambɔ komwɛ n'to kwakuka, na obakelela, benawasha.› 31Ela Ibulaimu kwen'kaninɛ kɛte: ‹Nambɔ baya bashiwɛnyu bashinaholecha mikɔlɔ kya Musa na kya ŋanguchi* byakekekǎnɛ, bashinaholecha ata n'to kwakuka ohuma o babú.› »
Valgt i Øjeblikket:
Lok 16: byi
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
2025 Forum Communautairre des Traducteurs de la bible et Alphabetisation
