Lok 15
15
Eta ya m'ɔɔ kwechiminɛ na omɔnɛa
(Mat 18.12-14)
1Lomwɛ lusuku, bawa n'lambo na bangɛ bato babé, ben'sɛnɛnɛ Yɛso yolo bam'holechɛ. 2Bafalisayɔ* na nɔmbɔchi cha Ndɔ* habemɔninɛ biya, betolilɛ on'tɔkɔma Yɛso bibe kɛte: «Koko n'to kwebasangelecha bato babé eyǎka kwebaya nǎbɔ!» 3Obibyɔ, Yɛso kwebahɛlɛ ê eta kɛte: 4«Nambɔ komwɛ n'to hawǐngi hɛnyu kwee na miɔɔ kyakɛ miya kemwɛ̂chi, komwɛ hawǐngi hakyɔ kwahochimina, kwenaeta e? Atambɛ kwělɛa keya maumi lyahabola na lyabola o ibu ya olela na okya naɛba koya kwɛnɛ kwechiminɛ, m'paka kokomɔnɛ. 5Kwahôkomɔna, kwekowata na okobea o maɔmbɛ, m'okya nasɛ̌lɛla. 6Hakehiya wakɛ, kwebosha makɛnda makɛ, na babinji nakɛ na obasambela kɛte: ‹Sɛ̌lɛlakwɛ hamwɛchi nǎnyi! Ebalɔ namɔna koya m'ɔɔ kwanyi kwechiminɛ.› 7Kěnɛ, nehon'sambela kɛte nǎ byɔka bîya byɛnɛ Abɛcha kwebaba na sasɔ leolo mɛngɔ mɛnɛ m'wa bobe komwɛchi kwebalɛa bobe bwakɛ. Leya sasɔ lyakɛ lyebaba leolo naole bato maumi lya abola na lya abola bɛnɛ bashioɛba eyaka owasha.»
Lufalanga lwa echɛlɛ lwechiminɛ na omɔnɛa
8Yɛso kwekelelelɛ otɔkɔma kɛte: «Olechiwɛ eyǎka: We, nǎmbɔ komwɛ m'achana kwe na bichɛlɛ umi bya falanga, emwɛ̂chi yahochimina, kwenaeta e? Atambɛ kwenalamya yɛ̌ngɛ na kwehyakela sɛsɛ, na oeɛba wɛ̌nɛ m'paka koemɔnɛ! 9Kwahoemɔna, kwebocha makɛnda makɛ na babinji nakɛ na obasambela kɛte: ‹Tosɛɛlɛlɛ hamwɛchi, ebalɔ namɔna eya echɛlɛ yanyi ya falanga yechiminɛ. 10Nehon'sambela kɛte nǎ byɛnɛ bakɛnji* ba Abɛcha bebasɛ̌lɛla mɛngɔ mɛnɛ m'wa bobe komwɛchi kwebalɛa bobe bwakɛ.»
M'walobaka kwechiminɛ na omɔnɛa
11Yɛso kwetɔkɔmɛ eyaka kɛte: «Webɛlɛ n'to komwɛ̂chi, kwebɛlɛ na bǎna bakɛ babele ba balomyana. 12N'nuna bato kwesambelɛ sakɛ kɛte: ‹Tata, pɛtakɛ eba yanyi ya bohyanyi m'bomɔna bɔbɛ.› Sakɛ kwebakabanyinyɛ bɔsɛ babele bomɔna bwakɛ.
13«Oheta masuku manɛ, koya n'nuná bato kwekuchichɛ bohyanyi bwakɛ bɔsɛ, na kwekelɛ na bomɔna bwakɛ o ebalɔ ya kɔ. Hakehǐlɛ obɔ, kwehulililɛ bomɔna bwakɛ m'masɛlɛkonda. 14Lwakehulɛ otɔkya bomɔna bwakɛ bɔsɛ, m'eya ebalɔ mwekingilɛ asɛnga aolo. Kwehǐlɛ mpaka m'mɛngɔ ma kɛ oholwa na elewa. 15Obiyɔ, kwekělɛ okelela komwɛ n'to kwa eya ebalɔ. Koya n'to kwem'hililɛ o mabala yolo kon'kongelɛ ngolobɛ chakɛ. 16Koya m'walobaka kwebɛlɛ bɛnja oya elewa yɛnɛ ngolobɛ chebɛlɛ oya, ela wishibɛlɛ n'to kwa om'ha yɔ.
17«Obibyɔ, kwetolilɛ oletɔkɔmya n'ta n'tema kwakɛ kɛte: ‹Ɔla! Bakichi bɔsɛ ba tata beholɛka na elewa, ela nɛnɛ nehowa na asɛnga onɔ! 18Nesuela wa tata na nen'kanina kɛte: ''Tata, naeta bobé wa Abɛcha ná wéwéle tɛtɛtɛ. 19Nishilěngyɛ eyǎka obuchiwa mwanɔ̂bɛ. Obɛmbea nɛhɛ komwɛ m' bakichi bɔbɛ.'' ›
20«Nǎ koya m'walobaka kwetolilɛ osuela wa sakɛ. Hakebɛlɛ kwěle kɔ inɛ na sɛsɛ kyabɔ, sakɛ kwem'mɔninɛ na om'mɔnɛna kɛnɛ wɛ̌nɛ. Kwekělɛ abelɔ on'kalebesha, na kwen'yambelelɛ. 21Koya m'walobaka kwen'sambelɛ sakɛ kɛte: ‹Tata, naeta bobé wa Abɛcha, ná wéwéle tɛtɛtɛ. Obibyɔ, nishilěngyɛ eyǎka obuchiwa mwǎna kɔ̌bɛ.› 22Ela, sakɛ kwesambelɛ bakichi bakɛ kɛte: ‹Abelɔ m'bɛ̌chwa na ngobɔ kebɛnju mon'chuyɛ kyɔ. N'chuyakwɛ eyaka pɛtɛ o n'nywɛ na mikalabanda o makolo.› 23M'bɛ̌chwa na longa lya mwǎna kwa ŋɔmbɛ kwa mauta, momohakɛ, toetɛ m'onda, na tosɛ̌lɛlɛ. 24Ebalɔ koko mwǎna kwaba m'ubɛ, ela kwakuka. kwaban'chiminɛ, ela kwamɔnɛa.› Obibyɔ, betolilɛ m'onda.
25«M'maya mɛngɔ, m'olo bato kwebɛlɛ omabala. M'osuela, kwesebɛlɛ hɔka na mboka, kweholechɛ ngembɔ na ŋɔma. 26Kwebuchichɛ komwɛ hawingi ha bakichi na om'bocha kɛte: ‹we ě?› 27Koya n'kichi kwen'kailɛ kɛte: ‹I n'nunɔ̂bɛ kwasuela, na sɔbɛ kwam'hakela longa lya mwǎna kwa ŋɔmbɛ kya mauta, ebalɔ mwanâkɛ kwasuela kwe na mwɛkɔ.›
28«Koya m'olo bato, hɔka haya kwewasilwɛ na songo, kweɛminɛ okingela na n'sɛsɛ. Sakɛ kwetɔbɔɛ amboka na olekombɛlɛla wa kele kokingelɛ. 29Ela kɛnyikɛ kwen'kailɛ sakɛ kɛte: ‹Holechaka! Kenɔ miâ kyɔsɛ kyandaoetela mikelɔ, nishinaɛma ata lomwɛ̂chi o binywa byɔbɛ. Ela, na lenɔ ushinapa ata himwɛ hyana hya mbuchi yolo naetɛ m'onda na makɛnda manyi. 30Ela, hachwa mwanɔ̂bɛ minɛ kwehulɛ bomɔna bɔbɛ bɔsɛ m'masɛlɛkonda, wam'akela longa lya mwňa kwa ŋɔmbɛ kwa mauta.›
31Sakɛ lwakɛ kwen'kailɛ kɛte: ‹Ɔla mwanǎnyi! Kɔkwɛ webaba nanyi masuku mɔsɛ, na byɔsɛ byandele nǎbyɔ i byɔbɛ. 32Atambɛ byaba bibɛnju toetɛ m'onda na osɛɛlɛla! Ebalɔ koko n'nunɔ̂bɛ kwaba m'ubɛ́, ela kwakuka. Kwaban'chiminɛ, ela kwamɔnɛa.› »
Valgt i Øjeblikket:
Lok 15: byi
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
2025 Forum Communautairre des Traducteurs de la bible et Alphabetisation
