لوقا 2
2
وَهدیهاتِن عیسی مسیح
1اِ اَ روژِلَ، آگوستوس، امپراطور روم فِربو داتی تا مردِم کُل وِلاتَلی گه اِژیر حکِمرونی روم بین، سرشِماری بوئن. 2یَه اول سرشِماریای بی گه اِ روژَل فرمونداری کورینیوس اِ وِلات سوریَه اَنجومَ موئیا. 3اِسَه، هر کی چی اِرَه شیَر ووژ تاگَه نُم بِنُیسِنِنی. 4یوسفیش اژ شیَر ناصرَه اِ هیال جلیل چی اِرَه شیَر بِیتلِحِم اِ هیال یهودیَه، گه شیَر داوودِ پاتِشا بی، اَرِیَگه اژ نسِل ئو دویمو داوود بی. 5او وَهگَرد دسگیرو ووژ مریم گه وخد زائین نزیک بیتی، چی اِرَه اورَه تاگَه نُم ووژو بِنُیسِنِن. 6وخدی اَر اورَه بینَ، وخد زائین مریم رَسی. 7مریم نوولَم ووژ گه کُری بی آوِردیَ دی. او کُلپیچِک کِرد ئو حیوَسون اِنوم آحِری، اَرِیَگه اِنوم مِموخونَه جائونی اَرِه نوئی.
شوئونَل ئو فریشدَهل
8اِنوم هَراَ هیالَ، شوئونَلی اِنوم بیاوو بین گه وَه شو مِتیَهجی ریئَنَلو بین. 9وَه یِگِل فریشدَه خداون ظاهر بی اَرینو، ئو نُیر جِلال خداون دَرشخیَ دورو. شوئونَل زِلَتِراقا بین، 10مِنتائای فریشدَه وِتِنیئون: «زِلَتو نَچو، اَرِیَگه اِسگَه خَوَر خَوشتونی اَرِه دیرِم، خَوَر فِرَه خَوشی اَرِه کُل قومَل: 11ایمِرو اَرِه هُمَه اِنوم شیَر داوود، نجاددهندهی هاتیَسَ دی. او خداون، مسیحَ. 12نشونَه اَرِه هُمَه یَسیَ گه، هُمَه کورپِهی مِهِینونَ دی گه کُلپیچِککَریا حیوَتیَس اِنوم آحِری.» 13وَه یِگِل دسَه کَلِنگی اژ لشکرَل آسمو ظاهر بین گه وَهگَرد اَ فریشدَه، خدائو ستائشتَ مَهَرد ئو موئِتو:
14«جِلال اَر خدا اِ عرشِ فِلک،
ئو اَررُی زَمی صُئلوسِلامتی اَر مردِمی گه،
وَه دل خدان!»
15ئو وخدی فریشدَهل اژ تک اونَل چِن اَر آسمو، شوئونَل وِتونَ یَکتِری: «بورِن بِچیم اِرَه شیَر بِیتلِحِم ئو اَ چیئَه گه اتفاق کَتیَ ئو خداون اژ اَوَه باخَوَرمونا کِردیَسی، بوئینیم.» 16اَسَه هِرازِه چِن ئو مریم ئو یوسف ئو کورپِهَه گه اِنوم آحِر حیوَتوئی، کِردونَ دی. 17وخدی کورپِهَهئو دی، قصهی گه اِبارَه اوُ وِتوئیونئونو، پَشخونا کِرد. 18ئو کُل کسَلی گه یِئونَ مَشتَفت اژ قصَه شوئونَل بِلُجوئیونَ ماهات. 19مِنتائای مریم، یوئنَ کُل مَسپارتیَ ویر ئو اِ دل ووژا فگِرونئونَ مَهَردی. 20اِسَه شوئونَل گِلوناهُارد، ئو خدائو جِلالَ ما ئو ستائشتَ مَهَرد اَرِه کُل چیئَلی گه دوئیون ئو شنَفتوئیو، هَراَ جورَ گه وِتوئیونئونو.
21اِ روژ هشتِم، وخدی موقَع ختینَه کورپِهَه رَسی، نُمو نا اَر عیسی. یَه هَراَ نُمَ بیَ گه فریشدَه، وِر اژ یَگه او بِنِریِ لَم مریم، نائی اَری.
22وخدی روژَل آداو پاکی اُوُ مِطابق شریعت موسی تموم بی، یوسف ئو مریم، عیسیئو بِرد اِرَه شیَر اورشلیم تاگَه پیشکَش کَنی اَر خداون، 23هَراَ جورَ گه اِنوم شریعت خداون نُیسیاءَ: «نوولَم ذکور ثمر هر لَمی، چه آمیزاءَ چه حِوو وَخم خداون بو.» 24ئو هَمیش تاگَه قُرونی پیشکَش کَن، مِطابق اَ چیئَه گه اِ شریعت خداون هاتیَ، یانی «جِفتی یاکریم یاگَه دو گِلَه بَچ کموتر».
25اِ اَ زمونَ، پیا صالح ئو دینداری، شَمعون نُم، اِنوم اورشلیم زِنِهیَ مَهَردی گه چیَمَرئی دلگُوئی قوم اسرائیل بی ئو روحالقدس اَررُی بیتی. 26روحالقدس اَری آشگار کِردوئی گه تا مسیحِ خداون نوئینی، نِمَمِری. 27اِسَه شَمعون وَه هدائَت روحِ خدا هات اِنوم قِلا معبد خداون، وخدی گه باوَهدا کورپِهَه یانی عیسی، اوُ آوِرد تاگَه رسمِرِسیم شریعت اَرِه بارنیَ جا، 28شَمعون کورپِهَه گِرتیِ باووش ئو هُنَ گه خدا ستائشتَ مَهَردی وِتی:
29«اِاِ خداون، اِسگَه مِطابق وَدَهت،
خادمتَ سِلامت مِرخصَ مِهِین.
30اَرِیَگه چیَمَل مِه نجاد تو دیَسی،
31نجادی گه اَر وَر چیَمَل کُل ملتَل،
آمادَهت کِردیَ،
32نُیری اَرِه آشگارا کِردِن حخیخت،
اَر قومَلیتِر؛
ئو جِلالی اَرِه قوم تو، قوم اسرائیل.»
33باوَه ئو دا عیسی اژ قصَهلی گه اِبارَه او وِتی، بِلُجوئیو هات. 34اَسَه شَمعون بِرَکتو داتی ئو وِتیَ مریم، دا او: «قسمت یَسَ گه ایی کورپَه باعث کَتِن ئو هیزگِرتِن فِرَه کسَل اژ قوم اسرائیل بو، ئو نشونهی بو گه موسِنی اَر نوا، 35اُهُنَ فگِر دلَل فِرَه کسَل آشگارا ماو. شِمشیریشی مَچو اِنوم قلب توناِرا.»
36اَر اورَه ژَن نبوّتکَری زِنِهیَ مَهَردی گه نُم حَنّا بیتی، دِت فَنوئیل اژ طائفَه اَشیر. او فِرَه پیر بی. حَنّا هفت سال دُما شوی کِردِنی، میردَه مِردوئیتی 37ئو تا هشتاد ئو چوار سالونی بیوَه مَنوئی. او هُیچ وخد معبد خدا وِل نِمَهَردی، بلکِم شو ئو روژ، وَه روژی بی، ئو دوعا ئو عَبادتَ مَهَردی. 38حَنّاایش هَراَ حِنَ هاتِ وَر ئو شگِر خدا کِردی ئو وَهگَرد کُل کسَلی گه چیَمَرئی آزادی اورشلیم بین، اِبارَه عیسی قصَه کِردی.
39وخدی یوسف ئو مریم کُل رسمِرِسیم شریعت خداونو آوِردَ جا، گِلوناهُارد اِرَه شیَر ووژو، ناصرَه، گه اِ هیال جلیل بی. 40ئو اَ آویلَ کَلِنگَ موئیا ئو قویَتَ مَگِرتی. او پِر اژ حکمت بی ئو فیض خدا وَهگَرد بیتی.
عیسیِ نوجُوُن اِنوم معبد خدا
41باوَهدا عیسی کُلِ سالی اَرِه عِد پِسَخ مَچیان اِرَه اورشلیم. 42وخدی عیسی بیَ دوازَه سالو، مِطابق رسمِرِسیم عِد چِن اِرَه اورشلیم. 43دُما یَگه رسمِرِسیم عِد تموم بی، وخدی داشدو گِلونامَهُاردِ دُما، عیسی گه نوجُوُ بی مَن اَر اورشلیم. مِنتائای باوَهدای اژ ایی گپَ خَوَرو ناآشد، 44بلکِم گُمونونَ مَهَرد گه ها نوم کارِوُناِر، یِه روژ تموم، سفرو کِرد. آخِرسر اِنوم قومِخویشَل ئو رِقیفَلو کَتِنِ هِهمِنِی عیسی. 45وخدی اوُ نَهَردَ دی، وَه فِتِراخ او گِلوناهُارد اِرَه اورشلیم. 46دُما سه روژ، آخِرسر اوئن اِنوم معبد خداون دیا، گه نیشتوئیِ بِن مَلِمَل تورات ئو گوشَ ماتیَ قصَه اونَل ئو اَژینو سؤالَلی مَهَردی. 47هر کی قصَهل اوءَ مَشتَفتی، اژ فیَم او، ئو جوواوَلی گه ماتی، بِلُجوئیَ ماهاتی. 48وخدی گه باوَهدای اوئن اَر اورَه دی، اژ ووژونا چِن. دای وِتون: «هِه کُر، اَرِهچَه هُنَتَ ایمَه کِرد؟ مِن ئو باوَهت وَه دلِهولی فِرِه مِنِی تونمونَ مَهَرد.» 49مِنتائای او جوواوا داتی: «اَرِهچَه مِنِی مِنتونَ مَهَرد؟ مَر نِمَذِناسدِتو گه باس اِ مال باوَهم بوئم؟» 50مِنتائای اُوُ میَنا ایی قصهئونَ گه وِتیئونو نَفیَمی. 51اَسَه وَهگَردو کَتِ رئی ئو چی اِرَه ناصرَه ئو فِربون اَژینَ موئردِنی. مِنتائای دای کُل ایی چیئِلَ مِئیشتیِ دل ووژا.
52ئو عیسی اِ دائول ئو حکمت، تَرَخدیَ مَهَردی ئو اَرتَک خدا ئو مردِم، عزیزتِرا موئیا.
Valgt i Øjeblikket:
لوقا 2: LBT
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
@ 2024 Korpu Company
