لوقا 1
1
1عالیمَقوم تِئوفیلوس، وَه خاطر یَگه فِرَه کسَل دَسو داسَ نُیسونِن چیئَلی گه اَرتَک ایمَه اتفاق کَتیَ، 2دُریس هَراَ جورَ گه اونَلی گه اژ اولا وَه چیَم ووژو دییو ئو خادم کلوم بین سپارتونَ ایمَه، 3مِنیش گه اژ اولا خو ژیر ئو تیَه کُل چیم اِرآوردیَ، صِلام دی گه وَه رِزگا اَرِه هُمَه بِنُیسِنمو، 4تا وَه دُریسی چیئَلی گه گِرتِتونَسا، اطمینونتو داشدوئی.
پیشگوئی وَهدیهاتِن یحیی تیَمیددهندَه
5اِ زَمو هیرودیس، پاتِشا یهودیَه، کاهنی زِنِهیَ مَهَردی گه زکریا نُم بیتی. اژ کاهنَل دسَه اَبیّا. (کاهنَل آمَل حکیمی بین گه خِلمَتون اژ معبد یهودَ مَهَرد.) زکریا، ژَنی داشدی گه نُم اِلیزابِت بیتی گه اژ دویمو هارونِ کاهن بی. 6اونَل هَردِک اَر وَر چیَم خدا آمَل صالحی بین ئو مِطابق کُل فِربونَل ئو حکمَل خداون، بیعِو رفدارونَ مَهَرد. 7مِنتائای اُوُ آویلو ناآشد، اَرِیَگه اِلیزابِت مَزا بی ئو هَردِک پیر بین.
8یِه گِل گه نوئَه خِلمت دسَه زکریا بی ئو، او اِ درگا خدا خِلمت کاهنیَ مَهَردی، 9مِطابق رسمِرِسیم کاهنَل، قُرَ کَت اَر نُم زکریا تا اَرِه دوی کِردِن بِخور بِچو اِنوم مَکو مقدّس معبد خداون. 10موقَع دوی کِردِن بِخور، کُل مردِم اِدَر دوعائونَ مَهَرد، 11گه وَه یِگِل یَکی اژ فریشدَهل خداون، هُنَ گه هوسیائی اَر لا راس مَخَل بِخورا، ظاهر بی اَر زکریا. 12زکریا هَریَگه او دیتی، اِ ووژا چی ئو زِلَتِراقا بی. 13مِنتائای فریشدَه وِتون: «اِاِ زکریا، زِلَت نَچو! اَرِیَگه دوعات قبول بیَ ئو ژَنِت اِلیزابِت کُرتی اَرِنَ ماری ئو تو نُمَ مَنینی اَر یحیی. 14تو هوسَ مِهِین ئو خَوشالا موئین ئو فِرَه کسَلیش اژ وَهدیهاتِن او خَوشالیَ مَهَن، 15اَرِیَگه او اَر وَر چیَم خداون کَلِنگا ماو. یحیی هرگِس نَباس لو بِنی اَر شِراو یاگَه عِرَخَلیتِر. جُجُ هِر اژ لَم دای، پِرا ماو اژ روحالقدس، 16ئو فِرَه کسَل اژ قوم اسرائیل گِلامِ ویرِ خداون، خداءِ اونَل. 17یحیی وَه روح ئو قدِرت ایلیا پِخَمَر، وِر اژ مسیحی گه باس بای، مای تا دل باوَهل ویرِ آیلَل، ئو یاخیَل ویرِ حکمت آمَل صالح گِلادِ، تاگَه قوم آمادهی اَرِه خداون حاضر کِ.» 18زکریا اژ فریشدَه پِرسیتی: «یَه اژ کو بِذانِم؟ مِه پیا پیری کِم ئو ژَنیشِم پیرَ.» 19فریشدَه جوواوا داتی: «مِه جبرئیلِم گه موسِم اَرتَک خدا. اِسگَه مِه کِلبیمَ تا قصَهتَ گَرد بِهَم ئو ایی خَوَر خَوشتَ بیَمئون. 20اِسگَه لالَ موئین ئو تا روژی گه ایی چیئِلَ اتفاق بِکُوءِ، نِمَتونین قصَه بِهِین اَرِیَگه قصَهل مِه گه اِ زَمو ووژو اَنجومَ مَگِرِن، باوارِت نَهَرد.»
21اِ ایی بِنَ، مردِم چیَمَرئی زکریا بین ئو اژ یَگه فِرَه مَنوئی اِنوم مَکو مقدّس معبد واقونِ دَم پَروئی. 22ئو وخدی زکریا هاتَ دِریر، نِمَتونستی قصَئَه گَردو بِهِه. اِسَه فیَمین گه اِنوم مَکو مقدّس معبد رویای دیَسی، اَرِیَگه فَخَد وَه هَشارَه قصهئونَ گَردَ مَهَردی، ئو بیکِش مَنوئی. 23دُما یَگه نوئَه خِلمت زکریا تموم بی، گِلاهُاردی اِرَه مال ووژ.
24دُما ایی روژِلَ، ژِنِهِه اِلیزابِت لَم پِر بیتی ئو پنج مُنگ ووژ اژ چیَم مردِم شاردیا. 25اِلیزابِت موئِتی: «خداون اَرِه مِه هُنَ کِردیِ. او اِ ایی روژِلَ لِفط کِردیَسی اَر مِه ئو اَ چیئَه گه اَر وَر چیَم مردِم اَرِه مِه ننگ بی، هیزداسی.»
پیشگوئی وَهدیهاتِن عیسی
26اِ مُنگ شَشِم لَمپِربیئین اِلیزابِت، جبرئیل فریشدَه اژ جونِم خدا کِلبی اِرَه شیَری اِ هیال جلیل گه نُم ناصرَه بیتی، 27تا بِچو اَرِه تک دِت اوزای گه مریم نُم بیتی. مریم دسگیرو پیای بی یوسف نُم، اژ دویمو داوودِ پاتِشا. 28فریشدَه چی اِرَه تک او ئو وِتی: «سِلام اَر تو، اِاِ کسی گه خداون لِفط کِردیَس اَری. خداون ها گَردِت.» 29مریم وخدی قصَهل او شنَفتی پریشونا بی، وَه لا ووژا فگِر کِردی گه یَه چطور سِلامی کَ. 30مِنتائای فریشدَه وِتون: «اِاِ مریم، زِلَت نَچو! خدا لِفط کِردینَسی اَری. 31اِسگَه لَمِت پِرَ ماو، کُری مارینَ دی ئو نُمَ مَنینی اَر عیسی. 32او کَلِنگَ ماو ئو هِناءَ ماوَ کُر خداءِ متعال، ئو خداون خدا تخت پاتِشائی باوَهجدی داوودَ مِیتیئون. 33او تا ابد اَر دویمو یعقوب کُر ابراهیم سِلطنتَ مِهِه ئو هرگِس پاتِشائی تموم نِماوتی.» 34مریم اژ فریشدَه پِرسیتی: «یَه چطورَ ماو؟ اَرِیَگه مِنَ گَرد پیای نحیوَتمَ»، 35فریشدَه جوواوا داتی: «روحالقدسَ ما اَررُی تو ئو قدِرت خداءِ متعال ساءَ ماوژی اَرینِت. اَژونَسَ، اَ کورپِهی گه میا باءَ دی مقدّس ئو کُر خدا هِناءَ ماوَ. 36اِسگَه، اِلیزابِتیش گه اژ قومَل تونَ، سَرُنَه پیری لَم پِر بیَسی ئو کُری هایتیئون. اَاَ، او گه موئِتو مزاءَ، شَش مُنگَ لَم پِرَسی. 37اَرِیَگه اَرتَک خدا هُیچ کاری مِحال نیَ!» 38مریم وِتی: «اِسگَه مِه کنیژ خداونِم. مِطابق اَ چیئَه گه وِتِت، اَرِه مِه بو.» اَسَه فریشدِهَه اژ تک چِتی.
مریم ئو اِلیزابِت یَکتِریَ موئینِن
39اِ اَ روژِلَ، مریم هیزگِرتی ئو وَه هِلَهپِلَه چی اَرِه شیَری اِنوم کَشوکویَل هیال یهودیَه، 40ئو چی اِنوم مال زکریا ئو سِلام کِردی اَر اِلیزابِت. 41ئو وخدی اِلیزابِت سِلام مریم شنَفتی، آویلِهَه اِنوم لَمی کَتِ جویل، ئو اِلیزابِت پِرا بی اژ روحالقدس، 42ئو وَه دَنگ کَلِنگا وِتی: «تو اِنوم ژِنَل بِمارِکین، ئو بِمارِکَ ثمری گه ها مِلالدُنتاِر! 43مِه کیِم گه دا خداونِم با اَرِه تَکِم؟ 44اَرِیَگه وخدی دَنگ سِلام تو رَسیَ گوشِم، آویلِهَه اژ خَوشی اِنوم لَمِم کَتِ جویل. 45خَوزگالَ اَ ژِنَ گه باوار کِردی گه اَ چیئَه گه اژ جونِم خداونو وِتیَسئون، اَنجومَ مَگِری.»
سروء حیوَنِن مریم
46مریم وِتی:
«گیو مِه خداون جِلالَ مِ
47ئو روحِم اِنوم نجاددهندَهم خدا،
خَوشالیَ مِهِه،
48اَرِیَگه نظر کِردیَسی اَر
خواری کنیژ ووژ.
اَژیرِ دُما، کُل نسِلَل هِنامَ مَهَنَ بِمارِک،
49اَرِیَگه اَ قادرَ گه نُم قدوسِ،
کارَل کَلِنگمی اَرِه کِردیَسی.
50ریَمَت او، نسِل پِشت اَر نسِل،
ها اَررُی کُل کسَلی گه زِلَئون اژ،
خداءَ مَچو.
51او وَه بال ووژ، وَه قدِرت عمل کِردیِ
ئو کسَلی گه اِ فگِرَل دِلو قُراتِن،
پَشخِپِلاآ کِردیَسی؛
52زوردارَل اژ سر تختَلو کیشیَسیَ هُار
ئو کسَلی گه فِروتنِن سربِلِنگا کِردیَسی؛
53وِرسِنیَل وَه چیئَل خو سیر کِردیِ
مِنتائای ثرودمنَلِ دس پَتی رِ کِردیَسی.
54او ریَمَت ووژ آوِردیَسیَ ویر،
ئو خادم ووژ، قوم اسرائیل، یاری داسی،
55هَرهُنَ گه وَه باوَهجدَل ایمَه،
ابراهیم ئو نسِل او
وَدَه دائیتی گه تا ابد هُنَ بِهِئَه.»
56مریم نزیک اَر سه مُنگ مَن اَرتک اِلیزابِت، دُماخِرِ گِلاهُارد اِرَه مال ووژ.
وَهدیهاتِن یحیی تیَمیددهندَه
57حِنی گه بیَ موقَع زائین اِلیزابِت، کُری آوِردیَ دی. 58هُمسال ئو قومَل او وخدی شنَفتو خداون لِفط کَلِنگی کِردیَس اَری، وَهگَرد او خَوشالیو کِرد.
59روژ هشتِم، هاتِن اِرَه رسمِرِسیم خَتینهسویرو کورپِهَه ئو مِهِستو نُم باوِه زکریا بِنِنی اَری. 60مِنتائای دا کورپِهَه وِتی: «نه! نُم او باس یحیی بو.» 61وِتو: «هُیچ کُم اژ قومِخویشَل تو هُنَ نُمی ناآشدیَسی.» 62اَسَه هَر وَه هَشارَه، اژ باوَه کورپِهَهئو پِرسی گه میا نُم بِنتی اَر کی. 63زکریا تختِهی گه اَررُیونَ مَنُیسو هِستی ئو نُیسونی: «نُم یحیاسی!» اونَل کُل بِلُجوئیو هات. 64جاوارجا دَم ئو زوئو زکریا واز بی ئو بِنیا ناتیَ قصَه کِردِن ئو ستائشت خدا. 65ترس کَت اِنوم کُل هُمسال، ئو مردِم سِرُسَر کَشوکویَل یهودیَه اِبارَه ایی چیئِلَ قصهئونَ مَهَرد. 66کُل کسَلی گه یوئنِئونَ شنَفت، اِنوم دل ووژونا فگِرونَ مَهَرد گه: «ایی کورپَه چطور آمی اَژین اِرَمایتی؟» اَرِیَگه دس خدا وَهگَرد بیتی.
نبوّت زکریا
67اَسَه باوِه، زکریا، پِرا بی اژ روحالقدس ئو هُنَ نبوّت کِردی وِتی:
68«بِمارِکَ خداون خداءِ اسرائیل،
اَرِیَگه هاتیَسَ دیار قوم ووژ،
ئو آزاد کِردِنَسی.
69او اَرِه ایمَه اِ دویمو خادم ووژ، داوود،
قدِرت نجادی عَلَم کِردیَسی،
70هَر اژ اَجورَ گه اژ قدیم
وَه زوئو پِخَمَرَل مقدّس ووژ وِتی گه
71ایمَل اژ دس دشمنَلمو
ئو کُل کسَلی گه اژ ایمَه بیزارِن، نجادَ مِ،
72تاگَه ریَمَتی گه وَدَهئو دائیَ باوَهجدَلمو،
نِشو دِ،
ئو عَت مقدّس ووژ باریَ ویر؛
73هَراَ قسمَ گه
اَرِه باوَهجدمو ابراهیم هُاردی.
74گه ایمَه اژ دس دشمنَلمو آزاد کِ
ئو یاریمو دِ تاگَه بیهُیچ ترسی
75اَرتَک او،
اِ کُل روژَل عمِرمو وَه قدوسیّت،
ئو صالحبیئین خِلمت اَژی کِیمی.
76ئو تو، اِاِ رولَه، هِناتَ مَهَنَ،
پِخَمَر خداءِ متعال؛
اَرِیَگه نواتِر اژ خداونَ مَچینَ رئیا تاگَه،
رئیَل او آمادَه بِهِین،
77ئو ایی میَرفتَ بِینَ قوم او
گه وَه بشخِش گنائَلو، نجادَ مَگِرِن.
78اَرِیَگه خداءِ ایمَه دلی دیری،
پِر اژ ریَمَت،
اَژونَسَ، تیخ هویَر اژ عرشِ فِلک،
مَجویجی اَر ایمَه،
79تا روشتایی بیَ کسَلی گه نیشتِنَسَ،
تیَریکی ئو سوئرکی مرگ،
ئو گومَل ایمَه هدائَت بِهِه،
ویرِ رئی صُئلوسِلامتی.»
80ئو اَ آویلَ کَلِنگَ موئیا ئو اِنوم روح، قویَتَ مَگِرتی، ئو تا روژ ظاهربیئِنی اَر قوم اسرائیل، اِنوم بیاوو بی.
Valgt i Øjeblikket:
لوقا 1: LBT
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
@ 2024 Korpu Company
