1 Korinti 7
7
Kanjǝlɔ A Mʊgɔ Naakanɨ
1Kǝngkɔ a dul kanjǝl nɨ jǝ́ mʊla mɨɨ, a bʊm nyɔ ka balɨ ya daa lɛ nǝn nɔɔlɨ. 2A kaa gola a dul taal bulon, bɛ balɨ a daa nǝn nwala gɔ. Bɛ nɔɔlɨ tǝgǝn a daa nǝn bwɨla gɔ. 3Bɛ balɨ a jǝla nwala gɔ gǝm daam fiyodaalɨgɔ kanga a yɔ dǝngdǝng jǝbɔ naakanɨ. Bɛ nɔɔlɨ a maa bwɨla gɔ gǝm nyɔ tǝgǝn. 4Nɔɔlɨ mɨ nǝn kwaan a dul bʊtɔ gǝn, na ke bɔ bwɨla gɨɨ. Gǝ na nyɔ balɨ tǝgǝn mɨ nǝn kwaan a dul bʊtɔ gǝn, na ke bɔ nwala gɨɨ. 5Ka kaa win ya kɔ a wini lɛ, na ke bɔ nyɨɨ, bɛ a yǝlam nǝn jǝlatǝm a kʊm jen, ka kʊta lɛ, sǝ jǝ́ ja kǝga a mʊgɔ keli. Sǝ jǝ́ yǝla jǝ́ mʊrka, kage Mammɔ a tɛl jen a gola nɨ mɨsɔ bɛ lɛ nǝn tatǝm duli. 6Mǝ sʊwa jʊ nɨ sǝ n nʊng jen gola. Ke bɔ diil. 7N swɨ na nǝbɔ pʌd a yǝlam na mǝ. Kwaama a nǝ kaamɨ lǝma yɨm naakan. Kaamɨ a nǝ ji lǝma yɨm mɨ nǝn naakan.
8Jʊ mǝ sʊwa a nǝb nɨ mɨ nǝn naakanɨ, jǝbɔ nɔɔtǝmkʊlabɨ, a bʊm nyɔ ja yɨ nyɔ mɨ nǝn naakan na mǝ. 9Na mɨsɔ jǝ dwal lɛ ja ta dul jini, bɛ ja maa naakan. A laa jǝl ja maa naakan kage wɛl bulonɔ a dɔ nǝlɔ.
10Jǝ́ nǝb naakanɔ, mǝ nǝ jen diil lɛ. Ke bɔ mǝ, nǝn Tɛlalɔ a sʊwa gɔ ka nɔɔlɨ ya wʊlaka lɛ jǝbɔ bwɨla gɨɨ. 11(Na ga wʊlaka jǝbɔ gɨɨ, bɛ ga yɨ nyɔ mɨ naakan wo. Na mɨ nyɨɨ, bɛ ja yǝla ja fɛka naakan jinɔ.) Balɨ bɛ ka ga dem lɛ kang a nwala gɔ gǝm.
12Jǝ́ tangǝn nǝbɔ mǝ sʊwa nyɔ, ke bɔ Tɛlalɔ. Na kaa kɛ a kʊm jen nǝn nɔɔlɨ nɨ ke bɔ nǝ bwangtǝmɨ, na a jǝla gɔ jǝ yɨ dakini, bɛ ka ga dem lɛ kang. 13Na nɔɔlɨ nǝn balɨ nɨ ke bɔ nǝ bwangtǝmɨ, na a jǝla gɔ jǝ yɨ dakini, bɛ ka ga wʊlaka lɛ jǝbɔ gɔ. 14Balɨ nɨ a nǝ bɔ bɨlǝngkɛlɨ, a yǝlam sagsag a gola nwala gɨɨ. Nɔɔlɨ nɨ a nǝ bɔ bɨlǝngkɛlɨ, a yǝlam sagsag a gola bwɨla gɨɨ. Na na mɨ nyɨɨ, na bɛtɔ lɔ jeni a yǝlam bɔ sagsag, n bɨlǝngǝn jǝ sagsag.
15Na balɨ nɨ n ke bɔ nǝ bwangtǝmɨ swɨ lɛ a dem kang a nɔɔlɨ nǝ bwangtǝmɔ gǝmɨ, bɛ ga dem gǝm kang. Na nɔɔlɨ nɨ ke bɔ nǝ bwangtǝmɨ swɨ lɛ a wʊlaka jǝbɔ balɨ nǝ bwangtǝmɨ, bɛ ja wʊlaka. A dul kɛl nɨɨ, balɨ nǝ bwangtǝm jǝbɔ nɔɔlɨ nǝ bwangtǝm, mɨsɔ jǝ dǝg ji lɛ nǝn kwaan ja yɨ jǝbɔ nʊ nɨ ke bɔ nǝ bwangtǝmɨ, jʊ a bwɨɨ Kwaama a jo bǝn sǝ bǝ yɨ yɨm kwamɨgǝn. 16Mɔ nɔɔlɨgɔ, mʊ nyǝm bɔ kɛna nǝmɔ mʊ bʊʊ lɛ nǝn bwɨla mʊɨ? Mɔ balɨgɔ, mʊ nyǝm bɔ kɛna nǝmɔ mʊ bʊʊ lɛ nǝn nwala mʊɨ?
Yɨmɔ Kwaama Swɨ Lɛɨ
17Bɛ nǝl a yɨ yɨm nɨ Tɛlalɔ a jo gǝn gɔ ga yɨɨ. Bɛ ga yɨ yɨm gǝnɔ kanga Kwaama a jo gǝn a dul gǝnɨ. Wʊnɨ nǝn gɔ diilɔ mǝ nǝ jen nɛ gwam a mʊrkalɨtɨn nǝb bwangtǝm Kwaamaɨ. 18Gwam nʊ nɨ Kwaama a jo galɨgǝn nǝn biyotǝm mwɛnɨ, bɛ ka ga saa lɛ ga yǝlam nʊ nɨ a biyo bɔ mwɛnɨ. Nʊ nɨ a jo gǝn ga biyo bɔ mwɛnɨ, bɛ ka ga saa lɛ ja biyo gǝm mwɛn. 19Nǝ biyotǝm mwɛnɔ, jǝbɔ nʊ nɨ a biyo bɨɨ, mɨsɔ sʊ kaa jǝl lɛ. Jʊ a laa jǝlɨ, n kɨlatǝm diil Kwaamaɨ. 20Bɛ nǝbɔ gwam a yɨ a daa nɨ Kwaama a jom jii. 21Na a jo ń mʊ bwɛ jwaalɛɨ, bɛ ka kom ń nɛ. Na mʊ nya nya gola yɨm duli, bɛ ń saa. 22Nʊ nɨ n bwɛ jwaalɛ kwama Tɛlalɔ a jo gǝnɨ, a nya jǝgtǝm dul a gola Tɛlalɔɨ. Nʊ nɨ nǝn yɨm dul kwama Tɛlalɔ a jo gǝnɨ, n bwɛ jwaalɛ Kiristii. 23Kwaama a ten jen teni, a ywa jǝ tentǝm jenɔ a lada. Ka jǝ́ yǝlam lɛ jwaalɛb nǝfitʌmi. 24Kambɔ, gola nɨ Tɛlalɔ a jo jen a mʊgɔ gǝnɨ, bɛ jǝ́ yɨ wo, Kwaama gǝ na jǝbɔ jen.
Bwarabɔ Jǝbɔ Nɔɔtǝmkʊlabɔ
25A dul nɔɔtǝm nɨ a naa bɔ batǝm woi, mɨ mǝ nǝn jʊ nɨ Tɛlalɔ a sʊwa ɨɨ. Mǝ sʊwa jen kɛl nɨ a kuwotǝm mǝndɨ mǝ nʊ nɨ ja jǝla nǝn mǝ a lǝma Tɛlalɔɨ. 26A kɛl dul kanjǝl gaalan nɨ bɛ lɛ a kǝgaɨ, n kuwo a bʊm nyɔ nǝl a yɨ yɨm kanga gǝ wo a mʊgɔ gǝnɨ. 27Na dwang naakan wo a kwɨl mʊnɨ, bɛ ka ń saa lɛ ń tul gǝn. Na mɨ dwang naakan wo a kwɨl mʊnɨ, ka ń saa lɛ naakan. 28Na ń naa nɔɔlɨɨ, mʊ maa bɔ bwɨlangkɛl. Na bwɛnɔɔlɨ a naa balɨɨ, a maa bɔ bwɨlangkɛl. A kaa gola pʌd nǝb nɨ maa naakan nɛɨ, jǝ nyʊwa nyʊwa nǝn bʊtɔ. A kuwotǝm mǝndɨ mǝ shigʌm jem tuulo a dul jen.
29Jʊ mǝ kuwo lɛɨ kambɔ, kwama nɨ Tɛlalɔ bɛm lɛɨ ya la lɛ. A kǝga nɨ, nǝb nɔɔtǝmɔ bɛ ja yɨɨ maamɔ mɨ ji nǝn. 30Nǝb jitǝm wigɔ, maamɔ ke bɔ wi jǝ ji lɛɨ, nǝb fulotǝm nǝlɔ, maamɔ ke bɔ fulotǝm nǝl jǝ maa lɛɨ, nǝb tentǝmɔ, maamɔ ja ta bɔ jǝl wo a kang. 31Nǝbɔ maa maajɨ lɛ nǝn kanjǝl yooli nɨɨ, maamɔ ka ja nǝ lɛ kwaan a maatǝm gǝnɔ gǝm, jʊ a bwɨɨ kanjǝl yooli nɨ shu shu.
32Mǝ swɨ lɛ jǝ́ nya jǝgtǝm dul a komtǝm nɨ gǝm. Nʊ nɨ a naa bɔ nɔɔlɨɨ, gǝ sʊtǝn sʊ dʌngtǝm kanjǝl Tɛlalɔɨ, kanga fulo Tɛlalɔ gǝm nǝl lɛɨ. 33Nʊ nɨ a naa nɔɔlɨɨ, gǝ sʊtǝn sʊ maatǝm kanjǝl yooligɔ, kanga gǝ fulo nwala gɔ gǝm nǝl lɛɨ. 34Bʊʊlalɨ gǝnɔ a bel yo. Nɔɔlɨ nɨ a naa bɔ balɨɨ, jǝbɔ bwɛnɔɔlɨ, jǝ sʊtǝn sʊ dʌngtǝm kanjǝl Tɛlalɔɨ kanga jǝ yɨ lɛ sagsag a mʊgɔ bʊtɔ, jǝbɔ bʊʊlalɨ tagɨ. Nɔɔlɨ nɨ a naa balɨɨ, gǝ sʊtǝn sʊ dʌngtǝm kanjǝl yooligɔ, kanga gǝ fulo bwɨla gɔ gǝm nǝl lɛɨ. 35Mǝ sʊwa nyɔ, sǝ n tɨka jen, ke bɔ sǝ n tɨ nǝn jen, sǝ jǝ́ yɨ yɨm nyan a bwangtǝm Tɛlalɔɨ, ke bɔ beltǝm bʊʊlalɨ.
36Na bwayǝlɨ nɨ a swa yaa jǝbɔ bwɛnɔɔlɨ nɨ gǝ swɨ naatǝm gǝnɔ lɛɨ, na bwɛnɔɔlɨgɔ tɨla lɛɨ, kwama naakanɔ shu lɛɨ, na gǝ kuwo lɛ ga maa bɔ dǝngdǝngɨ, na swɨtǝm gǝnɔ ja kǝga lɛɨ, bɛ ga maa jʊ gǝ swɨ lɛɨ, ga bwa gǝm naakan. Ga maa bɔ bwɨlangkɛl. 37Na bwayǝlɨ nɨ a kuwo a bʊm bɔ gǝ bwa naakan jǝbɔ bwɛnɔɔlɨ gǝnɨ, n ke bɔ dǝgtǝm nǝn kwaan, na ga ta dul gǝnɨ, ga ya nyɔ a nǝl gǝn, ga swɨ bɔ naakanɨ, n dǝngdǝng ga maaɨ, ka ga naa lɛ. 38Bwayǝlɨ nɨ a bwa naakan jǝbɔ bwɛnɔɔlɨ gǝnɨ, ga maa dǝngdǝng. Nʊ nɨ a bwa bɔ naakan jǝbɔ bwɛnɔɔlɨ gǝnɨ, a laa gǝn.
39Dwang naakanɔ wo a kwɨl nɔɔlɨɨ, na bwɨla gǝ nǝn kʊlɨɨ. Na bwɨla gɔ a bʊlaɨ, dwang naakanɔ a tulo. Gǝ naa naa kaa balɨ nɨ ga swɨɨ. Bɛ a yǝlam nǝ bwangtǝm Tɛlalɔɨ. 40A kuwotǝm mɨ, nɔɔlɨ nɨ nyʊwa nyʊwa lǝma, na ga yɨ nyɨɨ. A kuwotǝm mɨ, mǝ nǝngǝn nǝn Yʊwa Kwaamaɨ.
Valgt i Øjeblikket:
1 Korinti 7: DBD
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
©️2024 Luke Initiative for Scripture Translation