1 Korinti 12
12
Nǝtǝm Lǝma Yʊwa Kwaamaɨ
1A kǝngkɔ kambɔ, a kɛl nǝtǝm lǝma Yʊwa Kwaamaɨ, mǝ swɨ bɔ jǝ́ lɛ nyǝmtǝm. 2Jǝ́ nyǝm kwamagɔ jǝ́ Bʌtʌbi, ja swag jen jǝ́ bwangtǝn shomtɨn, wʊnɨ mɨ nǝn nyiyoi. 3A na nyɔ mǝ sʊwa jen nɛ, gɔ mɨ nǝn nʊ nɨ sʊwa kɛl lɛ nǝn Yʊwa Kwaamaɨ sǝ a sʊwa gɔ, “N lag Yesui!” Mɨ nǝn nʊ nɨ sʊwa lɛ gɔ, “Yesu nǝn Tɛlalɔɨ,” na ke bɔ a daagɔ kwaan Yʊwa Kwaamaɨ woi.
4Nǝtǝm lǝmatɨn Yʊwagɔ nǝn dʌmʌn, Yʊwagɔ win. 5Golantɨn maatǝm maajɨgɔ nǝn dʌmʌn, Tɛlalɔ win. 6Maajɨgɔ wo nǝn dʌmʌn, nǝn Kwaama win nǝ ji kwaan maatǝm jinɔ lɛɨ 7Kwaama a nǝ pʌd bǝnɔ win win lǝma Yʊwa gǝnɔ, sǝ bǝ tɨkaka nǝn. 8A wini Kwaama a nǝ gǝn lǝma sʊwatǝm kɛl nǝn yʊlan a gola Yʊwa nɨ. A wini a nǝ gǝn lǝma sʊwatǝm kɛl nǝn nyǝmtǝm a gola Yʊwa nɨ tag. 9A wini a nǝ gǝn lǝma na nǝtǝm bɨlǝngkɛl a gola Yʊwa nɨ tag. A wini a nǝ gǝn lǝma na gungtǝm nǝbɨɨ a gola Yʊwa nɨ. 10A wini a nǝ gǝn lǝma na maatǝm jǝ laatǝm kang. A wini a nǝ gǝn lǝma na kuwotǝmkǝga. A wini a nǝ gǝn lǝma na nyǝmtǝm yʊwa nǝn dʌmʌn. A wini a nǝ gǝn lǝma na sʊwatǝm nyiyo nǝn dʌmʌn. A wini a nǝ gǝn lǝma na fɛtatǝm nyiyotɨn. 11Gwam jinɔ Yʊwagɔ win wʊnɨ maa maajɨ nɨ lɛɨ, nǝn gɔ tǝga ji lǝmagɔ lɛɨ, kanga ga swɨɨ.
Gwam Bǝ Jinʌn Bʊtɔgɔ Win
12Kanga bʊtɔgɔ win nǝngǝn nǝn jinʌnɔ a lada nyɨɨ, jinʌn nɨ gwam a lada nyɨɨ, bʊtɔgɔ win, gǝ na nyɔ a mʊrkalɨ nǝb bwangtǝm Kwaamaɨ gǝm, wʊnɨ nǝn gɔ n bʊtɔ Kiristii. 13Yʊwagɔ win a yʊ bǝn mwɛ sagsagɔ gwamɨ, bǝ yǝlam bʊtɔgɔ win, Yahudawagɔ jǝbɔ nǝbɔ Girikaɨ, jwaalɛb jǝbɔ bɛtɨ. Gwam bǝnɔ Kwaama a nǝ bǝn Yʊwagɔ win wʊnɨ a mʊgɔ bǝnɨ.
14Bʊtɔgɔ ke bɔ ji win, jinʌnɔ a lada nyɔ. 15Na naagɔ a sʊwa gɔ, “A mɨ mǝ ke bɔ kang, mǝ ke bɔ ji bʊtɔ.” Sʊwatǝmɔ nyɨɨ, mɨsɔ wʊlaka gǝn nɛ a yɨm jinʌn bʊtɔ. 16Na lɔlɔ a sʊwa gɔ, “A mɨ mǝ ke bɔ nu, mǝ ke bɔ ji bʊtɔ.” Sʊwatǝmɔ nyɨɨ, mɨsɔ wʊlaka gǝn nɛ a yɨm jinʌn bʊtɔ. 17Na na bʊtɔgɔ gwam n nui, na jǝ́ nyʊwa nǝn wɛ? Na na bʊtɔgɔ gwam n lɔlɨ, na jǝ́ nyʊn jʊ nǝn wɛ? 18N wɔ Kwaama a fɛka jinʌn bʊtɔgɔ gwam jinɔ kanga ga swɨɨ. 19Na na bʊtɔgɔ gwam n ji wini, a yǝlam bɔ bʊtɔ. 20N wɔ jinʌnɔ a lada, bʊtɔgɔ win.
21Mɨ gola wo nugɔ a sʊwa kangɔ gɔ, “Mɨ mwɛ mɨ wo jǝbɔ mɔ.” Mɨ gola wo dulɔ a sʊwa naagɔ gɔ, “Mɨ mwɛ mɨ wo jǝbɔ mɔ.” 22Mɨ nyɔ, jinʌn bʊtɔ nɨ jǝ́ kuwo lɛ maamɔ a gɨya gɨyaɨ, nǝji ja laa kaamɨ. 23Jinʌn bʊtɔ nɨ jǝ́ kuwo lɛ maamɔ a la bɔ tangǝnɔ bʊmǝnɨ, bǝ fɛ bǝ nǝ ji dʊʊnɔ. Jinʌn nɨ a bʊm bɔ kuwotǝmɨ, bǝ fɛ bǝ sɔ ji. 24Jinʌn bǝnɔ nɨ a bʊm kuwotǝmɨ, mɨ jǝ maa jim kaa jǝl lɛ. Kwaama a mʊrka bʊtɔgɨɨ, nǝ dʊʊn nɛ a lada a jinʌn nɨ ja sogaɨ. 25Kwaama a maa nyɔ kage kɛl wʊlakatǝmɔ a dɔ bʊtɔ. Kwaama a maa nyɔ sǝ jinʌnɔ a dʌngko dʌngkotǝm nyan. 26Na jigɔ win a nyʊwa gaalanɨ, gwam jinʌnɔ a nyʊwa. Na ja bǝlá jigɔ wini, tangǝnɔ a maa fulotǝm nǝl.
27Jǝ́ bʊtɔ Kiristii, gwam jenɔ jǝ́ jinʌn gǝn. 28A mʊgɔ mʊrkalɨ nǝb bwangtǝm Kwaamaɨ, Kwaama a dǝg kaamɨ a yǝlam, na win, bɛtɔ twama, na yo, nǝbkuwotǝmkǝga, na taal, nǝb mɛlalɨ. Kaamɨ a nǝ ji lǝma na maatǝm jǝ laatǝm kang, kaamɨ a nǝ ji gungtǝm nǝb bɔɔlam, kaamɨ n nǝb tɨkalɨ, kaamɨ n nǝb nɨ yɔ lɛ nǝn mʊrkalɨ nǝb bwangtǝm Kwaamaɨ, kaamɨ n nǝbɔ sʊwa kɛl lɛ nǝn nyiyogɔ nǝn dʌmʌni. 29Gwam jinɔ n bɛtɔ twama ka? Gwam jinɔ n nǝbkuwotǝmkǝga ka? Gwam jinɔ n nǝb mɛlalɨ ka? Gwam jinɔ n nǝb maatǝm jǝ laatǝm kang ka? 30Gwam na jǝ nǝngǝn nǝn lǝma gungtǝm nǝb a bɔɔlaɨ ka? Gwam jinɔ na jǝ sʊwa kɛl lɛ nǝn nyiyontɨnɨ ka? Gwam na ja nǝ ji lǝma fɛtatǝm nyiyontɨnɨ ka? 31Bɛ jǝ́ saa nǝtǝm lǝma nɨ a laa jii.
Mǝ nʊng jen nʊng gola nɨ a laa jii.
Valgt i Øjeblikket:
1 Korinti 12: DBD
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
©️2024 Luke Initiative for Scripture Translation