Ruumiya 8
8
Midhe gi Dhigirim
1A minoŋ ẖukm gwati gwaje degen lina lo di al Masiiẖ Yasuuⓐ, lina lati lathelila gi dhuŋun dha aŋinu no, abi gi dhuŋun dha Dhigirim. 2Ŋinena naamuus gwa Dhigirim dhina dhimidho di al Masiiẖ Yasuuⓐ gwiminyi guda galo gi naamuus gwa ŋidi ŋina ŋike a ai. 3Ŋinena gwina gwati gwuthi ŋoma di naamuus apai no, ŋinena muluŋw nono aŋinu yai, a Kalo gina gukejo Ŋare ŋuŋun gwiro ŋinena s̱uura gwa aŋinu ina yuthi ŋida ŋina ŋike, yan ŋidi ŋina ŋike, ŋwakimiye ŋida ŋina ŋike kaŋinu. 4Di dhuŋun dhina dhiŋir dha naamuus meajini dega, lina lati lathelila gi dhuŋun dha aŋinu no, abi gi dhuŋun dha Dhigirim. 5Ŋinena lina lo gi dhuŋun dha aŋinu lathigeta afkaar gwegen gi ŋidi ŋa aŋinu; abi lina lo gi dhuŋun dha Dhigirim lathigeta afkaar gwegen gi ŋidi ŋa Dhigirim. 6Ŋinena ireye je galo gwa aŋinu gwiro ai; abi ireye je galo gwa Dhigirim gwiro midhe a audhaijiye galo. 7Ŋinena fikr gwa aŋinu gwikiilo Kalo gai; ŋinena athuŋw uthejo naamuus gwa Kalo kuni no, a minoŋ ko gwati gwuthi ŋoma no. 8A minoŋ lina lo gi aŋinu lati luthi ŋoma liŋiriye Kaloŋa dhugore no. 9Abi nyaŋa lati lo gi aŋinu no, abi gi Dhigirim, ada Dhigirim dha Kalo dhimaje dagalo ganu. Abi ada kwiji gweta gwati gwimuthi Dhigirima dha al Masiiẖ, ŋeda gwati gwiro gwuŋun no. 10A ada al Masiiẖ gwimaje dagalo ganu, a aŋinu imai gi dhuŋun dha ŋidi ŋina ŋike; abi dhigirim dhimidho gi dhuŋun dha dhuŋun dhina dhiŋir. 11Abi ada Dhigirim dha ŋeda gwina gwidireyo Yasuuⓐuŋw dai dhimaje dagalo ganu, a ŋeda gwina gwidireyo al Masiiẖuŋw dai gwaji gwamidhiye aŋina yalo ina yaio ko Dhigirim dhai dhuŋun dhina dhathije dagalo ganu. 12A minoŋ, limega lai, alŋa luthi gamja, gati giro ga aŋinu, dilmidhe gi dhuŋun dha aŋinu no, 13abi ada nyaŋa limamidhe gi dhuŋun dha aŋinu, nyaŋa laji lai; abi ada nyaŋa limarinya ŋiro ŋa aŋinu Dhigirim dhai, nyaŋa laji lai; abi ada nyaŋa limarinya ŋiro ŋa aŋinu Dhigirim dhai, nyaŋa laji lamidhe.
Keleŋa ga Kalo
14Ŋinena peth lina ludhunu Dhigirim dhai dha Kalo, ŋediŋa liro keleŋa ga Kalo. 15Ŋinena athanya apo dhigirima dha gukini manaŋ gi ŋidheny no; abi nyaŋa limapai Dhigirima danyaro keleŋa guŋun, a gi dhuŋun ibidha anure gwula, anarnu, Babo gwai, a Babo. 16A Dhigirim ko dhiro shaahid gwan dhigirim dega, darnu alŋa liro keleŋa ga Kalo. 17A ada alŋa limaro keleŋa, a minoŋ alŋa luthi ŋelenya ko Kalo ŋalai, dilapai ŋelenya al Masiiẖ ŋalai; ada alŋa limaicaijiye ŋeda ŋalai gi ŋwuredeny ŋwuŋun, dilmajidhini ko ŋeda ŋalai.
Majdh gwina gwaji gwaje
18Ŋinena nyi gwadhura darnu ŋwuredeny ŋwa ŋwamun ibiŋwa ŋwati ŋwaudhi dilubiye gi majdh gwina gwaji gwaŋini dega ganu no. 19Ŋinena dhunijo gwina gwuthi uminyi gwa ŋidi ŋina ŋigitinu gwathidhunijo aŋinuŋw gwa keleŋa ga Kalo. 20Ŋinena ŋidi ŋina ŋigitinu ŋimagitini ŋwora ganu ŋwa ŋidi ŋina ŋiro tur, ŋati gi dhuŋun dhina dhibupilo no, ŋwubiro gi dhuŋun dha ŋeda gwina gwimalgitijo ŋwora ganu ŋwegen dhunijo gwai. 21Ŋinena ŋidi ŋina ŋigitinu ko ŋaji ŋagududhini galo gi gukini gwa ŋidi ŋina ŋidigiro gi ẖurriiya gwina gwuthi majdh gwa keleŋa ga Kalo. 22Alŋa liliŋidhi darnu ŋidi peth ŋina ŋigitinu ŋathare alumi ŋiya ŋwuredeny ŋwai di a ŋinena. 23A ŋati ŋiro minoŋ degen dogo no, abi alŋa ko lina luthi fruuta gwina gwiro kwerkwereny gwa Dhigirim, a alŋa ko lathare gi lidom lega dildhunijo dilro keleŋa ga Kalo, gwina gwiro bibre gwa aŋinu yega. 24Ŋinena dhunijo gwai gwega alŋa limagilaŋini; abi dhunijo gwina gwaŋinu gwati gwiro dhunijo no; ŋinena akwai kwiji gweda gwuthi ŋoma duŋw dhunijo ŋida ŋina ŋathuŋwul aŋa ŋinena? 25Abi ada alŋa limadhunijo ŋida ŋina ŋati ŋimalaŋa no, a minoŋ alŋa ladhunijo ŋida ibiŋa mutha gwai dugore. 26A minoŋ Dhigirim ko dhathigathaje muluŋw nono gwega uwa; ŋinena athana liŋidhi dabiŋaijo Kaloŋa gwiro ŋinena gwina gwaudhi dilabiŋaijo Kaloŋa no; abi Dhigirim dhiro dhina dhathabiŋadhaijo Kaloŋa dega gwai are gwai gwina gwati gwuthi ŋoma duŋwabiŋini no. 27A gwina gwathi bupini galo gi dugor ganu gwiliŋidhi aŋ gwiro fikr gwa Dhigirim, ŋinena athuŋw abiŋadhaijo Kaloŋa gwan liji lina liŋir didirel gi dhuŋun dhina dhibupo Kalo. 28A alŋa liliŋidhi darnu ŋidi peth ŋathapaijiye ŋiro ŋina ŋiŋir degen lina luminyu Kaloŋa, a degen lina lurninu gi dhuŋun dhina dhibupuŋw. 29Ŋinena lina luminyuŋwulo kwereny, ŋwulgegata dilro ŋinena s̱uura gwa Ŋari ŋuŋun, duŋwuro lira gi limega ganu loinyadho. 30A lina limuŋwulgeta kwerkwereny, ŋwulurniye ko; a lina limuŋwul urniye, ŋwuliŋiriye ko; a lina limuŋwuliŋiriye, ŋwulmajidhe ko.
Uminyi gwa Kalo
31A minoŋ alŋa larakwai gi dhuŋun ibidha? Ada Kalo gimalije, ei gwuthi ŋoma duŋwuro dhuwan dhega? 32Gwina gwati gwidoinyo dijidhedha Ŋare ŋuŋun no, ŋwubuminyi dijidhedha Ŋare ŋuŋun ŋan alŋa peth, akwai gwati gwijidhedha ŋida peth tur ŋeda ŋalai no. 33Ei gwuthi ŋoma dapai ẖukm gweda gi liji lina luthinilo Kalo ganu? Kalo giro gina gathiŋiriye. 34Ei gwiro gwina gwathakimiye? Al Masiiẖ gwiro gwina gwaio, abi gwoinyadhanu gwimadire ko, gwina gwo ko gi dhoi dhina dhiro dhiŋir dha Kalo, gwina gwathabiŋadhaijo Kaloŋa gwan alŋa ko. 35Ei gwuthi ŋoma dijiguda ganu gi uminyi gwa al Masiiẖ? Dhuŋun dhina dhibur, i ŋwuredeny, i irini, i jamu, i dije galo ŋwumirinya, i dije kalo gina gike, i kalala? 36Gwiro ŋinena ulinuŋwna, Anaŋa gwan ŋa lathirinyini saaⓐa peth ja aŋin; alŋa limadhuredhini liro ŋinena jaŋal jadhi rinyini. 37Abi gi ŋidi ibiŋa peth alŋa luthi ŋoma dibiŋiye dhinyuŋw gwega ŋeda gwai gwina gwuminyije. 38A ŋinena nyi gwuminyu darnu ai, i midhe, i malaayka, i liji lina luthi ŋelenya, i ŋoma, i ŋidi ŋina ŋo ŋinena, i ŋina ŋaji ŋila gidon, 39i olalaŋ, i ŋidi ŋina ŋolaŋ ganu, i ŋidi ŋiter ŋina ŋigitinu ŋati ŋuthi ŋoma dijiguda ganu di uminyi gwa Kalo, gwina gwo di al Masiiẖ Yasuuⓐ gwina gwiro Kweleny gwega no.
Valgt i Øjeblikket:
Ruumiya 8: HBN
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
First published by the British and Foreign Bible Society in 1966.