Ruumiya 6
6
Aicaijiye liduŋw al Masiiẖ gwai gwati gwuthi dhuŋuna dhadhapai ŋida ŋina ŋike no
1Abi alŋa larakwai gi dhuŋun ibidha? Alŋa laje dapai ŋida ŋina ŋike, di niⓐma oinyadhani a? 2Oo. Alŋa lina limai gi ŋidi ŋina ŋike, akwai alŋa lamidhe manaŋ gi ŋidi ganu ŋina ŋike? 3Nyaŋa lati liliŋidhi darnu alŋa peth lina limaⓐamidhini di Yasuuⓐ al Masiiẖ limaⓐamidhini dai gwuŋun na? 4A minoŋ alŋa ligwurcinu ŋeda ŋalai maⓐmuudiiya gwai dai; di gwiro ŋinena mani al Masiiẖ dirini dai majdh gwai gwa Babo, a minoŋ alŋa ko luthi ŋoma dilelila gi midhe gwina gwiyaŋ. 5Ada alŋa limaro letipo ŋeda ŋalai gi s̱uura gwa ai gwuŋun, alŋa laji laro letipo ko gi dire dai gwuŋun. 6Alŋa liliŋidhi dhuŋuna ibidha darnu kwiji gwega gwina gwurun gwimarinyini gi lure alaŋ lina limaliganu ŋeda ŋalai, di aŋinu ya ŋidi ŋina ŋike erna, dathil auredhi dilupijo ŋida ŋina ŋike ŋiro no. 7Ŋinena gwina gwimai gwima iŋirini gi ŋidi ŋina ŋike. 8Abi ada alŋa limai al Masiiẖ ŋalai, alŋa luminyi darnu alŋa laji lamidhe ko ŋeda ŋalai. 9Alŋa liliŋidhi darnu al Masiiẖ dina diruŋw dai gwati gwai manaŋ no; a ai gwati gwuthi ŋelenya dugun alaŋ manaŋ no. 10Ŋinena ai gwai gwina gwaiuŋwgwai gwan ŋidi ŋina ŋike lamun letipo; a midhe gwina gwimidheyo, gwimidheyo gwan Kalo. 11A minoŋ nyaŋa ko dhuredhul lidom lalo laio gi ŋidi ŋina ŋike; nyabimidhe gwan Kalo Yasuuⓐ al Masiiẖ gwai gwina gwiro Kweleny gwega. 12A minoŋ athanya abrico ŋida ŋina ŋike diluthi ŋelenya gi aŋinu yalo ina yaio, danyal uthejo nyuni gi ŋidi ŋina ŋathilamira ŋina ŋike no. 13I athanya dhedhi agsaam gwalo dilro ŋidi ŋadhapai ŋiro ŋa dhuŋun dhina dhati dhiŋir dhan ŋidi ŋina ŋike no; abi dhedhul Kaloŋa lidom lalo, liro ŋinena liji lina limidho dai, a agsaam gwalo dilro ŋidi ŋadhapai ŋiro ŋa dhuŋun dhina dhiŋir dhan Kalo. 14Ŋinena ŋidi ŋina ŋike ŋati ŋuthi ŋelenya dagalo manaŋ no; ŋinena athanya jo gi naamuus ganu no, abi gi niⓐma ganu.
S̱uura gwina gwo gi jine
15A minoŋ dhuŋun dhiraŋ? Alŋa lapai ŋida ŋina ŋike, ŋinena athana jo gi naamuus ganu no, abi ŋinena jana gi niⓐma ganu a? Oo. 16Nyaŋa lati liliŋidhi darnu ŋeda gwina gwimanya dhedha lidom lalo laro jine juŋun danya uthejo nyuni na? Nyaŋa liro jine ja gweta gwina gwathanya uthejo nyuni; ada gwimaro gwa ŋidi ŋina ŋike dai, i gwadhuthejo dhuŋuna dhina dhiŋir nyuni. 17Abi shukr di Kalo, ŋinena ranya jine ja ŋidi ŋina ŋike, abi nyaŋa limuthejo dugor dai dalo s̱uura ibigwe nyuni gwa taⓐliim dhina dhimajildhedha. 18Abi gwiro ŋinena manyan gududhini galo gi ŋidi ŋina ŋike, nyaŋa limaro jine ja dhuŋun dhina dhiŋir. 19Nyi gwabiŋu gwiro ŋinena athin kwiji abiŋi, ŋinena gi dhuŋun dha mule nono gwa aŋinu yalo; ŋinena manya dhedha agsaam gwalo dilro jine ja ŋirle a ja ŋidi ŋina ŋike gi ŋidi ŋina ŋike; a minoŋ dhedhul agsaam gwalo dilro jine ja dhuŋun dhina dhiŋir gi iŋir didirel. 20Ŋinena ranya jine ja ŋidi ŋina ŋike, nyaŋa ligududhinu galo gi dhuŋun dhina dhiŋir. 21Abi fruuta gwiro dhaŋ gwina gwuthanya gi lamun ibile gi ŋidi ibiŋe ŋina ŋapiyaje dhara ŋinena? Ŋinena mira gwa ŋidi ibiŋe gwiro ai. 22Abi ŋinena nyaŋa limagududhini galo gi ŋidi ŋina ŋike, a nyaŋa limaro jine ja Kalo, a nyaŋa limuthi fruuta gwalo gwa iŋir didirel, a mira gwuŋun gwiro midhe gwina gwathije gwortal. 23Ŋinena ujra ya ŋidi ŋina ŋike iro ai; abi dhedha tur gwa Kalo gwiro midhe gwina gwathije gwortal Yasuuⓐ al Masiiẖ gwai gwina gwiro Kweleny gwega.
Valgt i Øjeblikket:
Ruumiya 6: HBN
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
First published by the British and Foreign Bible Society in 1966.