Ruumiya 1
1
Salaam
1Buulus, gwina gwiro gine ga Yasuuⓐ al Masiiẖ, gwina gwurninu duŋwuro gweta gwina gwukejinu, duŋwrujini ter dabiŋaijo lijo Dhuŋuna dhina Dhiŋir dha Kalo. 2(Dhina dhabiŋaijuŋw dhai nebiŋaije luŋun ro kwerkwereny gi jitham jina jiŋir didirel,) 3dhan Ŋari ŋuŋun ŋina ŋiliŋinu gi lulaŋ la Daawud gi dhuŋun dha aŋinu; 4ŋwubiro Ŋari ŋa Kalo ŋoma ŋai, gi dhuŋun dha Dhigirim dhina Dhiŋir didirel, dire gwai dai, Yasuuⓐ al Masiiẖ, gwina gwiro Kweleny gwega. 5Ŋeda gwai jiriny jai juŋun anaŋa limapai niⓐma, anaro lina lukejinu, utheje gwai nyuni gwa imaan gi liji peth lina liro Liumam. 6Degen ganu nyaŋa ko liro lina lurninu di Yasuuⓐ al Masiiẖ. 7Gi liji peth lina lo Ruumiya, lina luminyinu di Kalo, a lurninu dilro lina liŋir didirel. Niⓐma dagalo a audhaijiye galo di Kalo gina giro Babo gwega, a Kweleny gwina gwan Yasuuⓐ al Masiiẖ.
Buulus gwibupo dela Ruumiya
8Kwereny, nyi gwaici Kaloŋa giny shukran Yasuuⓐ al Masiiẖ gwai gwan nyaŋa peth, di imaan gwalo abiŋini gi kidhila peth. 9Ŋinena Kalo, gina gathinyi upijo ŋiro dhigirim dhai dhiny gi Dhuŋun dhina Dhiŋir dha Ŋari ŋuŋun, giro shaahid gwiny akwai nyi gwathaji madhineye gi abiŋaije Kaloŋa gwiny ŋwamun peth, athinyi dhunudhi lamun letipo no. 10Nyi gwathothaije Kaloŋa galo ŋwamun peth gi abiŋaije Kaloŋa gwiny dinyela dagalo dhuŋun dhai dhina dhiŋir ada Kalo gimuminyi. 11Ŋinena nyi gwathibupe gwuleny dari nyi gwajaŋa, daji dhedha dhedhaŋw gweda tur gwa Dhigirim, danya muthini galo. 12Ibidha dhiro minoŋ, dinyi buje gathajuŋw uwa nyaŋa lai imaan gwai gwina gwijo dega peth, imaan gwalo a gwiny. 13Abi nyi gwati gwibupo danya dhimetha, limega lai, dinyuthi dhuŋuna ŋwamun ŋwoinyadho dari gwila dagalo, (abi di ŋinena liminyi ekajo,) dinyuthi fruuta gweda dagalo ko, gwiro ŋinena nyinuthi gi liji liter lina liro Liumam. 14Nyi gwuthi gamja gi liji lina liro Yuunaaniyiin, a lina lo por; gi liji lina laliminu, a lina lati laliminu no. 15A minoŋ, ŋoma ŋai ŋiny, nyi gwaje momaŋ dabiŋaijo Dhuŋuna dhina Dhiŋir nyaŋa lina lo Ruumiya ko.
Dhuŋun dhina dhuthi Dhuŋuna dhina Dhiŋir
16Ŋinena nyi gwati gwuthi dhara gi Dhuŋun dhina Dhiŋir dha al Masiiẖ no; ŋinena ruŋw ŋoma ŋa Kalo di gilaŋ gi liji peth lina luminyu; Yahuud kwereny, a Yuunaaniyiin ko. 17Gi Dhuŋun dhina Dhiŋir dhuŋun dhina dhiŋir dha Kalo dhimaŋini imaan gwai gi imaan; gwiro ŋinena ulinuŋwna, A gwina gwiŋir gwamidhe imaan gwai.
Dhuŋun dhina dhike dha Liumam
18Ŋinena kadhugore gwa Kalo gwimaŋini gi Sama gi liji peth lina lati luminyu dhuŋuna dha Kalo no a gi dhuŋun dhegen dhina dhike lina lathimutha dhuŋuna dhina dhiro titiganu dhuŋun dhai dhina dhati dhiŋir no; 19ŋinena dhina dhimaliŋini dhan Kalo dhimaŋini degen; ŋinena limal Kalo aŋinijo. 20Ŋinena ŋidi ŋina ŋati ŋaŋinu ŋan ŋeda ro dina gitinina gidhila no ŋimaŋini momaŋ, a ŋimaliŋini ŋidi ŋai ŋina ŋigitinu, ŋina ŋiro ŋoma ŋuŋun ŋina ŋathije gwortal a dhuŋun dhina dhuthuŋw; a minoŋ ŋediŋa lati luthi dhuŋuna dha dhabiŋi no. 21Ŋinena dina mal liŋa Kaloŋa athilbi majidho Kaloŋa giro ŋinena Kalo gegen no, i athilaico shukran no; albijalo tur gi afkaar gwegen, a dugor degen dina diro jirila dina dirima ganu. 22Alarnu laliminu gi dugor ganu degen, albi ro jirila, 23alupeye majdh ganu gwa Kalo gina gathije gwortal gi s̱uura gwa kwiji gwina gwaji gwerna, a nyira, a dhola, a ŋidi ŋina ŋathelila galo nyare nyai. 24A minoŋ al Kalo abrico ko gi dhuŋun dhina dhathamira dugore degen gi ŋirle, dathil neyo aŋina yegen degen ganu no. 25Lina lupeyo dhuŋuna ganu dhina dhiro titiganu dha Kalo gi ŋidhuŋun, aluminyi alidijo ŋida ŋina ŋigetilo Kalo ŋwurko ŋwai, athilupijo ŋeduŋw ŋiro gwina gwigeto ŋida peth no, gwina gwiro mubaarak gwortal gwortal. Amiin. 26Gi dhuŋun ibidha al Kalo abrico gi uminyi gwina gwike gwuleny; ŋinena ma la legen upeye dhuŋuna ganu dhina dhuthilo gi dhuŋun dhina dhati dhiŋiradho gi dhuŋun dhina dhuthilo no. 27A minoŋ a loma ko gathani dhuŋuna dha dhidhreye laio gi dhuŋun dhina dhuthilo, aldunini iga yai dhuŋun dhai dhegen dhina dhike degen ganu gweta gweta; alapai dhuŋuna dhina dhuthi dhara; athi lomaŋa dhre loma lai liter, alapa jiza gi lidom legen gwina gwaudhi gwan dhuŋun dhegen dhina dhike. 28Gwiro ŋinena manidoinya diŋirani gwitiny diluminyi Kaloŋa gi liŋa gwegen, al Kalo abrico gi ŋadigireny ŋina ŋidunyinu, dilapai ŋida ibiŋa ŋina ŋati ŋaudhi no; 29aloinyadhini dhuŋun dhai peth dhina dhati dhiŋir no, ŋidhir, a ŋidi ŋina ŋike, a dhuŋun dhadhi obadhe galo, a ŋijigor; aloinyadhini ŋiduiny ŋai, a dhuŋun dhadhi rinyie dhimar, a kaijiye gi je, a dhuŋun dhina dhuthi ŋwujimiya ganu, a dhuŋun dha dhapai dhuŋuna dhina dhike gi liji liter, a dhuŋun dha dhabiŋi dhuŋuna nyim. 30A diluŋini gi liji liter, a dilirini Kaloŋa, a diluthi diŋila dina dathabiŋi buiny, alelila ŋamilai, alruje lidom legen lipilipa, algegita ŋida ŋina ŋike ŋitiŋiter, aldoinya dhuŋuna dhadhildhai uthejo baboŋaije nana ŋalai legen nyuni. 31Athilbi liŋidhi no, alkiye dhuŋuna dhina dhidiminu, athiluthi uminyuŋw gwina gwuthi liji lina liŋir no, athiluthi ŋimira no, athiluthi inaŋw no. 32Lina liliŋidhi ẖukm gwa Kalo darnu lina lathapai dhuŋuna dhina dhiro minoŋ laudhi dai, athilapo dhuŋuna ibidha dogo no, abi lathiŋir dugore ko gi liji lina lathapai dhuŋuna ibidha.
Valgt i Øjeblikket:
Ruumiya 1: HBN
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
First published by the British and Foreign Bible Society in 1966.