Yuuẖanna 21
21
Yasuuⓐ gwaŋinu gi baẖr gwina gwan Ṯabariiya
1A ma dhuŋun ibidhe erna, a Yasuuⓐ aŋinijo calmiz juŋun manaŋ kalo ga baẖr gwina gwan Ṯabariiya; a ŋwaŋina minoŋ. 2A Simⓐaan Buṯrusŋa a Tuuma, gwina gwan Towam, a Nathanaayiil gwa len la Gaana ga Jaliil, a keleŋa ga Zabadi, a calmiz ram jiter juŋun allije liduŋw. 3Al Simⓐaan Buṯrus abiŋaijo, ŋwulaici, Nyi gwela dumi ŋwuma. Alaicinu, Alligwudhie ko. Altuya, aluni gi felluuka ganu; athilbi umu ŋwuma gile ibige gatur no. 4A dina ma bigunu ro, a Yasuuⓐ dhuna kimumu; athibi calmiz liŋidhi darnu Yasuuⓐ gwiro no. 5Al Yasuuⓐ abiŋaijo, ŋwulaici, Keleŋa gai, nyaŋa luthi ŋida ŋa dheny a? Alaicinu, Oo. 6Ŋwulabiŋaijo, ŋwulaici, Guthul diba gi dhoi dha felluuka dhina dhiro dhiŋir, a ŋwanyalbuja. Alligatho diba, athilbuthi ŋoma gwalodha no, ŋinena oinyadhuŋw ŋwuma. 7A thilmiz ibidhe dhina dhuminyu Yasuuⓐ ŋwabiŋaijo Buṯrusuŋw, ŋwaici, Kweleny gwiro. Dina ma Simⓐaan Buṯrus diŋini darnu Kweleny gwiro, ŋwungenadha luga luŋun la ŋiro, (ŋinena juŋw ŋwumirinya,) ŋwugedhaije ŋau ganu. 8A calmiz jiter ila felluuka gwai gwina gwitiny; (al lati lolaŋ ganu kimumu no, abi lar mitr dure‐thudhina,) alodha diba gwa ŋwum. 9Dina maltuya kimumu, alaŋa iga ina iro ŋwura igitinu, a ŋwum gitinu alaŋ, a ⓐesh. 10Al Yasuuⓐ aicinu, Apul ŋwuma coŋ ŋwina ŋwumanyalo ŋinena. 11A Simⓐaan Buṯrus ela, ŋwodha diba kimumu a diba oinyadho ŋwuma ŋwina ŋwipiŋwipa, dure‐kworoŋo‐thiril a die‐a‐thiril, athibi diba kii no. 12Al Yasuuⓐ abiŋaijo, ŋwulaici, Ilal, nyeny. A thilmiz dheta dhati dhina dhothaije galo, ŋwaicinu, Au gwan ei? no, ŋinena liŋidhilo darnu Kweleny gwiro. 13A Yasuuⓐ ila, ŋwapai ⓐesh, ŋwulguginijo, a ŋwum ko. 14Ŋwamun ibiŋwe ŋwimaro ganu thiril ŋwina ŋwimaŋw ŋwai Yasuuⓐ aŋinijo calmiz juŋun dina muŋw dire dai.
Dhuŋun dhina dhiro gidon dhina dhabiŋaijo Yasuuⓐ Buṯrusuŋw
15A dina maleny, a Yasuuⓐ abiŋaijo Simⓐaan Buṯrusuŋw, ŋwaici, Simⓐaan, ŋari ŋai ŋa Yuuna, au gwuminyaniny gi liji ibila a? Ŋwaicinu, Ye, Kweleny gwai, au gwiliŋidhi darnu nyi gwuminyaŋa. Ŋwabiŋaijo, ŋwaici, Io jaŋala jiny jina jitijitiny. 16Ŋwabiŋaijo manaŋ ŋwamun ganu ram, ŋwaici, Simⓐaan, ŋari ŋai ŋa Yuuna, au gwuminyiny a? Ŋwaicinu, Ye, Kweleny gwai, au gwiliŋidhi darnu nyi gwuminyaŋa. Ŋwabiŋaijo, ŋwaici, Io jaŋala jiny. 17Ŋwabiŋaijo ŋwamun ganu thiril, ŋwaicinu, Simⓐaan, ŋari ŋai ŋa Yuuna, au gwuminyiny a? A Buṯrus ka dhugore ŋinena abiŋaijuŋw ŋwamun ganu thiril, Au gwuminyiny a? Ŋwaicinu, Kweleny gwai, ŋa gwiliŋidhi dhuŋuna peth; ŋaliŋa darnu nyi gwuminyaŋa. A Yasuuⓐ abiŋaijo, ŋwaici, Io jaŋala jiny. 18Titiganu, titiganu, nyi gwa gwaicaŋanu, Dina raŋa gwitiny ŋa gwathigena gwiren, ŋelila galo gi dhugor dhuŋa; abi maji maŋaro gwurun, ŋa wal doi ganu duŋa, a kwiji gwiter gwaŋaguke, a gwaŋapai kalo gina gati gara gaŋanela no. 19Gwabiŋu dhuŋuna ibidha daŋajo darnu akwai ai gwuŋun gwiro gwadhi majidhe Kaloŋa. A dina muŋwabiŋi minoŋ, ŋwaici, Gwujiny. 20A Buṯrus urle galo, ŋwaŋa thilmiz dhina dhuminyu Yasuuⓐ digwuje, dhina dhidhirudhi gi jabaŋ ganu dina ithilo ŋida ŋa dheny ŋa keraga, ŋwaici, Kweleny gwai, ei gwiro gwina gwaji gwaŋanugejie? 21A dina ma Buṯrus aŋa, ŋwabiŋaijo Yasuuⓐuŋw, ŋwaici, Kweleny gwai, a kwiji ibigwa gwardhau? 22A Yasuuⓐ abiŋaijo, ŋwaici, Ada nyi gwimari gwathigwaje di minyaura, dhuŋun dharakwai duguŋa? Gwujiny. 23A dhuŋun ibidha bai galo di limedhigen alarnu thilmiz ibidhe dhati dhai no, abi gwati gwabiŋaijo Yasuuⓐ darnu, Gwati gwai no; abi, Ada nyi gwimari gwathigwaje di minyaura, dhuŋun dharakwai duguŋa?
Peth di
24A thilmiz ibidha dhiro shaahid gwa dhuŋun ibidha, ŋwule dhuŋuna ibidha; a anaŋa liliŋidhi darnu shahaada gwuŋun gwiro titiganu. 25A Yasuuⓐ apai ŋiro ŋiter ŋoinyadho, abi ada ŋirii ŋina ŋulinu peth, nyi gwarnu gidhila gati guthi ŋoma gapai jitham jina julini no. Amiin.
Valgt i Øjeblikket:
Yuuẖanna 21: HBN
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
First published by the British and Foreign Bible Society in 1966.
