Yuuẖanna 20
20
Kimu gina gwudho ganu
1Gi lamun lina liro lira la asbuuⓐ, a kalo goma giro bigunu, a Maryam al Majdaliiya ela gi dhel, ŋwaŋa kolya gidhadhirinu galo. 2Ŋworta, albudhe Simⓐaan Buṯrusuŋw, a thilmiz dhiter dhina dhuminyu Yasuuⓐ, ŋwulabiŋaijo, ŋwulaici, Limapai Kwelenya gi dhel ganu, athana liŋidhi kaloŋa gina gimangeta no. 3A Buṯrusŋa tuya, thilmiz dhai dhiter, alela gi dhel. 4Alginadhe, a thilmiz dhiter madhina Buṯrusuŋw, ŋwobani kwereny gi dhel. 5Ŋwujule ganu, ŋwurile, ŋwaŋa ciraŋa jina jiro tiil didhire galo; athuŋw budhi no. 6A Simⓐaan Buṯrus ila ko, ŋwugwujani, ŋwuni gi dhel ganu, ŋwaŋa ciraŋa jina jiro tiil didhire galo. 7A mandiil, gwina gwijo gi lira alaŋ luŋun, gwati gwijo ciraŋ jai jina jiro tiil no, ŋwubimirini liduŋw kalo giter. 8A thilmiz dhiter uni dhina dhidhi kwereny gi dhel, ŋwaŋa, ŋwuminyi. 9Ŋinena athil liŋidhi dhuŋuna dha kitham no, darnu aram gwadire manaŋ dai.
Yasuuⓐ gwaŋinijo Maryamuŋw
10A calmiz aura dunu degen. 11Abi Maryam dhuna por gi dhel, ŋware; a dina juŋw dare, ŋwujule ganu, ŋwurile gi dhel. 12Ŋwaŋa malaayka ram ligeno ciraŋa jina jipidho, a gweta jalo gi lira, a gweta jalo gi ŋwora, kalo gina gidhirna aŋinu ya Yasuuⓐ. 13Alabiŋaijo, alaici, Kwa gwai, kworaŋ ŋabare? Ŋwulaicinu, Limapai Kwelenya gwiny, athinyi liŋidhi kaloŋa gina gimangeta no. 14A dina muŋware minoŋ, ŋwurle galo, ŋwaŋa Yasuuⓐuŋw didhuna, athuŋw biliŋidhi darnu Yasuuⓐ gwiro no. 15A Yasuuⓐ abiŋaijo, ŋwaici, Kwa gwai, kworaŋ ŋabare? Au gwibupo eiuŋw? Ŋwubarnu kwiji gwa jinena gwiro, ŋwabiŋaijo, ŋwaici, Kweleny gwai, ada gwimaŋa apai, abiŋaijiny kaloŋa gina gimaŋan geta, nyapai. 16A Yasuuⓐ abiŋaijo, ŋwaici, Maryam. Ŋwurle galo, ŋwabiŋaijo, ŋwaici, Rabuuni; gwina gwuthi maⓐna gwan Muⓐallim. 17A Yasuuⓐ abiŋaijo, ŋwaici, Athinyi minu no; nyi gwoma gwati gwimalo di Babo gwiny no; ŋabela gi limadhiguri, ŋalabiŋaijo, ŋalaici, Nyi gwalo di Babo gwiny, a di Babo gwalo; nyalo di Kalo giny, a di Kalo galo. 18A Maryam al Majdaliiya ela, ŋwabiŋaijo calmiz, ŋwulaici, Nyi gwimaŋadha Kwelenya, a ŋeda gwabiŋaijiny minoŋ.
Yasuuⓐ gwaŋinijo calmiz juŋun
19Gi lamun ibile leta leta dina ma kalo ro keraga, lina liro lira la asbuuⓐ, a jibur luthini kalo gina gauradhina calmiz liduŋw, ŋinena dhenyilo dhuŋuna dha Yahuud, a Yasuuⓐ ela, ŋwudhuna keligeny ganu, ŋwulabiŋaijo, ŋwulaici, Amanul ganu. 20A dina muŋwul abiŋaijo minoŋ, ŋwulaŋajo doi duŋun a limera luŋun. A dina aŋadhi calmiz Kwelenya, aliŋir dugore. 21Al Yasuuⓐ abiŋaijo manaŋ, ŋwulaici, Amanul ganu; gwiro ŋinena ukejinyina Babo gwiny, a nyi gwajukeje ko. 22A dina muŋwabiŋi dhuŋuna ibidhe, ŋwulgathijo uwa, ŋwulabiŋaijo, ŋwulaici, Apul Dhigirima dhina Dhiŋir. 23Ada nyaŋa limadhudhani ganu gi liji gi ŋidi ŋegen ŋina ŋike, ŋimadhudhanini ganu degen; abi ada nyaŋa limamuthadha ŋida ŋegen ŋina ŋike, a ŋidi ŋegen ŋina ŋike ŋamuthini.
Yasuuⓐ gwaŋinijo Tuumaŋw
24Abi Tuuma, gwina gwiro gweta gwa die‐a‐ram, gwina gwan Towam, gwati gwijillai dina idhi Yasuuⓐ no. 25A calmiz jiter abiŋaijo, alaici, Anaŋa limaŋa Kwelenya. Ŋwulbaicinu, Ada nyi gwati gwimaŋa jumcil ja dhilimi gi doi duŋun, nyunije lamun gi jumcil ja dhilimi a gi limera luŋun no, nyi gwati gwuminyi no. 26Ma ŋwamun ro dubaŋ, a calmiz juŋun manaŋ je liduŋw kiru, allije Tuuma ŋalai, a jibur luthini, a Yasuuⓐ ela, ŋwudhuna keligeny ganu, ŋwulaici, Amanul ganu. 27Ŋwabiŋaijo Tuumaŋw, ŋwaici, Dhiŋadha lamun luŋa mina, nyaŋa doi diny; ŋadhiŋadha dhoi dhuŋa, ŋunije gi limera liny; athaŋa bidoinya gi dhugor ganu no, ŋabuminyi. 28A Tuuma abiŋaijo, ŋwaici, Kweleny gwai gwiny a Kalo giny. 29A Yasuuⓐ abiŋaijo, ŋwaici, Tuuma gwai, ŋinena aŋadhiny, ŋabuminyi; la liŋir dugore lina lati laŋadhiny no, albuminyi.
Dhuŋun dha dhulini dha Dhuŋun dhina Dhiŋir
30A ŋiro ŋiter ŋoinyadho ŋina ŋipiŋipa ŋina ŋapilo Yasuuⓐ gi je ganu ja calmiz juŋun, athilbi ulinu kitham ganu ibiga no. 31Abi ŋiro ibiŋa ŋulinu, danya uminyi darnu Yasuuⓐ gwiro al Masiiẖ, gwina gwiro Ŋari ŋa Kalo; a dina uminyanya, nyaŋa luthi midhuŋw gi jiriny juŋun.
Valgt i Øjeblikket:
Yuuẖanna 20: HBN
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
First published by the British and Foreign Bible Society in 1966.
