Aⲁmaal Ar Rusul 4
4
Buṯrusŋa Yuuẖanna gwai gi je ganu ja juriya
1A dina jilo dabiŋaijo lijo a leleny la gusus a zabithŋa la hekal, a S̱adduugiyiin ila degen, 2alkadugore gi dhuŋun dhegen dhina dhalimiyilo lijo darnu gi Yasuuⓐ liji lina laio ladire dai. 3Allimutha doi dai degen, alligeta gi sijn di a bigunu ro ŋinena ro kalo keraga. 4Abi loinyadho gi liji lina lidiŋinu dhuŋuna aluminyi; a ⓐadad gwa loma ro ŋinena khamsa alaaf.
5A dhuŋun je bigunu darnu leleny legen a shiyuuk a jathib lauradho liduŋw gi Urushaliim. 6A H̱annaan gwina gwiro kweleny gwa gusus, a Gayaafa a Yuuẖanna a Iskandar a peth lina liro la liji la kweleny gwa gusus. 7A dina malidhuneje keligeny ganu, allothaije galo allaicinu, Nyaŋa lapo dhuŋuna ibidha ŋoma ŋai ŋadhei, i jiriny jai jadhei? 8A Buṯrus oinyadhini Dhigirim dhai dhina Dhiŋir ŋwulaicinu, Leleny lai la liji, a shiyuuk la Israayiil, 9ada nyaŋa limiji othaije galo ŋinenaŋina dhuŋun dhai dhan ŋiro ŋina ŋiŋir ŋina ŋupinu gi kwiji ibigwa gwina gwiro kiriga darnu gwigitinu momaŋ aŋ gwai; 10abi abricul dhuŋuna ibidha ŋwuliŋini dagalo ganu peth, a gi liji peth la Israayiil, darnu gi jiriny ja Yasuuⓐ al Masiiẖ gwa Naas̱ira, gwina gwirinyianya gi lure alaŋ lina limaliganu, gwina gwima Kalo direye dai, ŋeda gwai kwiji ibigwa gwidhunudhi gi je ganu jalo gwiŋir nono. 11Ŋeda gwiro kol gina gidoinyanya liji lai lina laico duna, gina gimaji ŋwununi gi ŋwubil peth. 12Gwati gweta gwiter gwina gwathiji gilaŋiye no, a Kalo gati gidhedhije jiriny jiter mina kidhila ja dhijigilaŋiye no.
13A dina malaŋa reuŋw ganu gwa Buṯrusŋa Yuuẖanna gwai alliŋa darnu liro liji lina lati laliminu a lati liliŋidhi dhuŋuna no, alalo galo dir, alliŋa darnu ŋediŋa lijo Yasuuⓐ ŋalai. 14Albaŋa kwijo gwina gwigitinu momaŋ dil lai dhuna, athiluthi dhuŋuna dhina dhadhildhai abiŋi gwan dhuŋun ibidha no. 15Allibi abiŋaijo diltu por gi juriya, alabiŋaijo gweta gweta degen ganu, 16alarnu, Alŋa lapaŋa gi liji ibila, ŋinena malaŋajo lijo peth lina lathije Urushaliim ŋiro ŋina ŋipa ŋina ŋiliŋinu momaŋ doi dai degen; a alŋa lati luthi ŋoma dana doinya dhuŋuna ibidha no. 17Abi dathi dhuŋun ibidha baiyo galo gwoinyadhanu gi liji ganu no, abricije allice ŋidhenyo, dathil abiŋaijo gweda gi liji ganu manaŋ jiriny jai ibija no. 18Allurnie, allabiŋaijo allaicinu lati labiŋi gatur no i athil alimiyo jiriny jai ja Yasuuⓐ no. 19Albi Buṯrusŋa Yuuẖanna gwai abiŋaijo allaicinu, Ada dhuŋun dhimaro titiganu gi je ganu ja Kalo danadiŋini dhuŋuna dhalo gwoinyadhanu di Kalo, akimiyul nyaŋa. 20Ŋinena anaŋa lati luthi ŋoma danadoinya dabiŋi dhuŋuna dhina dhaŋadhana a dhina dhidiŋinana no. 21A dina mallice ŋidhenyo manaŋ, allabrico alela, ŋinena athil bujo dhuŋuna dheda dhina dhadhildhai akimiye no gi dhuŋun dha liji, ŋinena majidho liji peth Kaloŋa gi dhuŋun dhina dhijo. 22Ŋinena ma kwiji iŋirini nono ŋiro ŋai ŋina ŋipa ibiŋa gwina gwuthi jidhileo joinyadhanu gi jidhila dure‐ram.
Aura gwa Buṯrusŋa Yuuẖanna gwai gi limedhigen
23A dina mallabrico, alela gi limedhigen, allabiŋaijo dhuŋuna peth dhina dhabiŋaijilo leleny la gusus a shiyuuk. 24A dina maldiŋini dhuŋuna ibidhe, alara Kaloŋa ŋwal ŋwai dhugor dhai dhetipo alaici, Kweleny gwai, ŋa gwiro Kalo gina gigeto Sama a gidhila a baẖr a ŋidi peth ŋina ŋijina ganu, 25gina gabiŋu gi ŋwinyu ŋwa Daawud gwina gwiro gadham guŋa ŋarnu, Kworaŋ abi Liumam kadugore gwuleny, a liji irijo dhuŋuna dhina dhiro tur je galo? 26A maluuk la gidhila dhunalaŋ, a leleny legen auradhe liduŋw dilabiŋi dhuŋuna dhina dhike di Kweleny, a di Masiiẖ gwuŋun. 27Titiganu Hiiruudusŋa Biilaaṯus al Bunṯi gwai, a Liumam, a liji la Israayiil lauradho liduŋw dilabiŋi dhuŋuna dhina dhike di gadham guŋa gina giŋir didirel gina gan Yasuuⓐ gwina gwurijaŋa ter, 28dilapai dhuŋuna dhina dhigetaŋa kwereny dhoi dhai dhuŋa a bupe gwai gwuŋa dilje. 29A ŋinena, Kweleny gwai, aŋadhi dhuŋuna dhegen dhadhice ŋidhenyo, ŋa dhedha jinea juŋa dilabiŋi dhuŋuna dhuŋa re gwai ganu peth, 30wal gwai dhoi ganu dhuŋa diŋiriye lijo nono; a di ŋiro ŋina ŋipiŋipa a ŋiro ŋina ŋathalije lijo galo dir je jiriny jai ja gadham guŋa gina giŋir didirel gina gan Yasuuⓐ. 31A dina malabiŋaijo Kaloŋa, a kalo ube galo gina gijina galo liduŋw; aloinyadhe peth Dhigirima dhina Dhiŋir, alabiŋi dhuŋuna dha Kalo re gwai ganu.
Ŋidi ŋina ŋaicaijiye liduŋw letipo
32A peth degen lina luminyu aluthi dhugore dhetipo a dhigirim dhetipo; athi kwiji gweda arnu ŋidi ŋeda ŋina ŋuthuŋwulo ŋiro ŋuŋun no; albuthi ŋida peth gi aicaijiye liduŋw gwetipo. 33A ŋoma ŋai ŋina ŋinaŋ liji lina lukejinu laŋiyo shahaada gwina gwuthilo gwa dire dai gwa Kweleny gwina gwan Yasuuⓐ; a niⓐma gwina gwinaŋ je degen peth. 34A kwiji gwati gweda degen ganu gwina gwibupo ŋida no, ŋinena ma liji peth lina luthi diruiny a dunu elaŋ ŋida ibiŋa, alapai gwarush gwa ŋidi ŋina ŋilinu, 35alligeta gi ŋwora ganu ŋwa liji lina lukejinu, athil guginijo gweta gweta degen ganu gwiro ŋinena bupuŋwna. 36A Yuusuf, gwina gwathi liji lina lukejinu aici Barnaaba, (gwina gwuthi maⓐna gwan ŋari ŋa gathaje uwa,) a ŋeda gwiro Laawi gwa Gubrus, 37gwuthi dhiruiny, ŋwubelaŋ, ŋwapa gwarush, ŋwugeta ŋwora ganu ŋwa liji lina lukejinu.
Valgt i Øjeblikket:
Aⲁmaal Ar Rusul 4: HBN
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
First published by the British and Foreign Bible Society in 1966.