Aⲁmaal Ar Rusul 3
3
Iŋir nono gwa kwiji gwina gwiro kiriga
1Lamun leta Buṯrusŋa Yuuẖanna gwai liludhi gi hekal gi saaⓐa ja dhabiŋaijo Kaloŋa, saaⓐa jiro thiril. 2A liji upini kwijo gweta gwina gwiro kiriga ro dina liŋidhina nana gwuŋun, athilgeta galo ŋwamun peth kour ya hekal ina yan Gwiŋir, duŋwothaije lijo galo ŋidi ŋai lina lathuni gi hekal ganu; 3a dina muŋwaŋa Buṯrusŋaije Yuuẖanna gwai lijo githo diluni gi hekal ganu, ŋwulothaije galo duŋwapai ŋida ŋeda; 4a Buṯrusŋa Yuuẖanna gwai teje je alaicinu, Daŋudhije. 5Ŋwuldatiŋa, ŋwudhuna duŋwapai ŋida ŋeda degen. 6Abi Buṯrus aicinu, Nyi gwati gwuthi ŋida ŋina ŋiro dahab i faḏḏa no, abi ŋidi ŋina ŋuthinyilo ŋaŋaldhedha. Gi jiriny ja Yasuuⓐ al Masiiẖ gwa Naas̱ira diro ŋela. 7Ŋwumutha gi dhoi dhuŋun dhina dhiro dhiŋir, ŋwudirejalaŋ, a gi kaija ibige an ŋwora ŋwuŋun bur nono a ŋwubidhire ŋwuŋun. 8Ŋwudirelaŋ ŋwudhuna ŋwelila, aluni ŋediŋa lai gi hekal, a ŋeda elila a ŋwupalaŋ ŋworthadha Kaloŋa. 9A liji peth aŋa duŋwela a ŋworthadha Kaloŋa; 10alliŋa darnu ŋeda gwiro gwina gwathijalo kour ya hekal ina yan Gwiŋir duŋwothaije lijo galo ŋidi ŋai. Alali galo dir gwuleny gi dhuŋun dhina dhimaje dugun. 11A dina ma kwiji gwina gwiro kiriga gwina gwimiŋir nono mutha Buṯrusŋaije Yuuẖanna gwai, a liji peth ortadha liduŋw degen kwereny ganu gwina gwan Kwereny gwa Sulemaan a ŋediŋa alo galo dir.
Dhuŋun dhina dhabiŋu Buṯrus gi hekal
12A dina ma Buṯrus aŋa dhuŋuna ibidha, ŋwabiŋaijo lijo ŋwulaici, Liji lai la Israayiil, kworaŋ nyabalo galo dir gi dhuŋun ibidha, a kworaŋ jilbidatiŋa, gwiro ŋinena anaŋa lapo ŋiro ŋoma ŋai ŋuri i dhuŋun dhai dhina dhuthana dha Kalo anaŋa limabrico kwijo ibigwa duŋwelila. 13Kalo ga Ibraahiim a ga Isẖaag a ga Yaⓐguub, a Kalo ga baboŋa lega gimajidho Ŋare ŋuŋun ŋina ŋan Yasuuⓐ, gwina gwudhedhanya di Biilaaṯus a nya irini gi je ganu ja Biilaaṯus, dina uminyuŋw duŋwabrico ŋwela. 14Abi nyaŋa lirinu ŋeduŋw gwina gwiŋir didirel a gwina gwidhunu galo, nyabi bupe dajil dhedha kwijo gwina gwirinyio dhimar; 15nyabi rinya Kwelenya gwadhi midhe, gwina gwima Kalo direye dai; a anaŋa liro shuhuud gi dhuŋun ibidha. 16A imaan gwai gi jiriny juŋun jiriny juŋun jimabiriye kwijo ibigwa nono, gwina gwo gwaŋadhanya a gwiliŋidhanya. Ye, a imaan gwai gwina gwijo di Yasuuⓐ gwimadhedha kwijo ibigwa iŋiruŋw nono gi je ganu jalo peth. 17A ŋinena, limega lai, nyi gwiliŋidhi darnu nyaŋa lapo dhuŋuna ibidha ŋirila ŋai, gwiro ŋinena apina leleny lalo ko. 18Abi Kalo gabiŋu dhuŋuna ibidha ro kwerkwereny ŋwinyu ŋwai ŋwa nebiŋa luŋun peth, darnu aram al Masiiẖ gwumi ŋiya, a dhimuŋw meaje minoŋ. 19Abi urlul dugore galo dalo gi ŋidi ŋina ŋike, a nyauradha di Kalo, di ŋidi ŋalo ŋina ŋike buruthini, di ŋwamun ŋwadhi gatho uwa ila gi je ganu ja Kweleny; 20a gaji gukeja Yasuuⓐ al Masiiẖuŋw, gwina gwabiŋaijajil gwai kwereny. 21Gwina gwiŋir di Sama uminyi di ma ŋwamun ila ŋwina ŋwadhuŋwŋwai Kalo geta ŋida peth ŋina ŋiyaŋ, ŋina ŋabiŋuŋai gi ŋwinyu ŋwa nebiŋa luŋun peth lina liŋir didirel ro dina gitinina gidhila. 22Ŋinena abiŋaijo Muusa baboŋaije darnu, Kweleny gwina gwiro Kalo galo gwaji gwajidirijo nebuŋw, gwina gwiro ŋinena nyi; gi limagalo ganu lalo; a gwanya deŋinaijo gi ŋidi peth ŋina ŋajiŋai ŋeda abiŋaijo. 23A dhuŋun dhaje darnu peth lina lati ladeŋinaijo nebuŋw no lerna gi liji ganu. 24Ye, a nebiŋa peth ro di Samwiil a lina ligwujanu, peth lina limabiŋi labiŋu dhuŋuna kwereny dhan ŋwamun ibiŋwa ko. 25Nyaŋa liro keleŋa ga nebiŋa, a gi dhuŋun dhina dhidiminu dhina dhabiŋaijodhai Kalo baboŋaije lega, ŋwaici Ibraahiimuŋw nu, Gi lulaŋ luŋa liji peth la gidhila labarikini. 26Dagalo kwerkwereny Kalo gimadireye Ŋare ŋuŋun ŋina ŋan Yasuuⓐ, ŋwukeja dajibarikiye a duŋw wura gweta gweta dagalo ganu gi ŋidi ŋuŋun ŋina ŋike.
Valgt i Øjeblikket:
Aⲁmaal Ar Rusul 3: HBN
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
First published by the British and Foreign Bible Society in 1966.