Aⲁmaal Ar Rusul 12
12
Irini gwa Hiiruudus. Tu gwa Buṯrus gi sijn
1A kaija ibige a malik gwina gwan Hiiruudus geta dhoi dhuŋun liji alaŋ coŋ la kaniisa duŋwul umeye ŋiya. 2A ŋwurinya Yaⓐguubuŋw gwina gwiro megen gwa Yuuẖanna kalala gai. 3A dina muŋw aŋa darnu dhuŋun ibidha dhiŋiriyo Yahuud dugore, ŋwari gwamutha Buṯrusuŋw ko (a ŋwamun ibiŋwe ŋwiro ŋwamun ŋwa dh’ⓐesh Fatir). 4A dina muŋw mutha, ŋwugeta gi sijn, ŋwudhedha ejigur ina iro kworoŋo ŋwamun ganu kworoŋo dildima; ŋwari gwuŋw dhedha lijo maji ma Ŋidwa ŋa dh’Abrico erna. 5A Buṯrus gwithedhinu gi sijn; athibi kaniisa abiŋadhaijo Kaloŋa dugun gwai ŋwamun peth. 6A dina ma Hiiruudus bupe duŋwdhedha lijo gile ibige, Buṯrus gwidhiro keligeny ganu kejigur ram, gwigukinu jijir jai, a dhidhiban dhuna kour alethadhe sijn; 7a babraŋ a malaak gwa Kweleny dhuna githo dugun, a fure uriye sijn ganu; ŋwumiri Buṯrusuŋw gi limera luŋun ŋwubirtheye ŋwaicinu, Diro babraŋ. A jijir wani gi doi duŋun. 8A malaak aicinu, Gukinu ganu gash gai a ŋa gena caudhe juŋa. Ŋwapai dhuŋuna ibidha. Ŋwubaji ŋwaicinu, Geno kiraŋa guŋa, nyi gwuja. 9Ŋwutu, ŋwugwuje; athuŋw biliŋidhi dhuŋuna dhina dhapo malaak darnu dhiro titiganu no; ŋwubarnu udubidi dhuŋun dhina dhaŋudhuŋw dhiro dhuŋun dhina dhiro ŋinena dhiŋidi. 10A dina malmadhina dhidhiban dhina dhiro kwerkwereny a dhina dhiro nimra ram, alobani kour ina ilaŋthinu ẖadiid gwai ina yathin liji tuiya alela gi mediina; ŋwuliginijo gwiren, altu alela gi dhai dhetipo; a kaija ibige a malaak gathani. 11A dina ma Buṯrus aŋidhani dhuŋuna momaŋ, ŋwarnu, Ŋinena nyi gwimaliŋa momaŋ darnu Kweleny gwukejo malaak gwuŋun, nyi guda galo gi dhoi dha Hiiruudus, a gi dhuŋun peth dhina dhidhunijo liji lina liro Yahuud. 12A dina ireyuŋw je galo gi dhuŋun ibidha, ŋwela gi dunu gwa Maryam gwina gwiro nana gwa Yuuẖanna, gwina gwuthi jiriny jiter jan Margus; kalo gina gauradhina liji loinyadho liduŋw dilabiŋaijo Kaloŋa. 13A dina ma Buṯrus pi gibura ga our ina ijo por, a ŋera ŋeta ila duŋwdiŋini, ŋina ŋan Rauda. 14A dina muŋw liŋa ŋwal ŋwa Buṯrus, athuŋw igiyo gibura no ŋinena iŋiriyuŋw dhugore, ŋwubabira kiru gwai, ŋwabiŋaijo lijo darnu Buṯrus gwo gwidhunudhi kour. 15Albaicinu, Ŋa gwirero. Athibi ŋeda arnu titiganu ŋeda gwiro. Albarnu malaak gwuŋun gwiro. 16Athibi Buṯrus je dipi gibura; a dina maligiye, alaŋa, alali galo dir. 17Ŋwulbaici dhoi dhai dhuŋun ŋalŋalam ŋwari laje jigwoiny, ŋwulabiŋaijo darnu gwiteyo Kweleny akwai gi sijn. Ŋwubarnu, Abiŋaijul Yaⓐguubuŋw a limega dhuŋuna ibidha. Ŋwubitu, ŋwela kalo giter. 18A dina ma kalo ure, a dugor miri ejigur gwuleny, alari laliŋa aŋ gwiro gwina gwimaje di Buṯrus. 19Abi dina ma Hiiruudus bupe athuŋw bujo no, ŋwothaije dhidhiban galo ŋwudhedha lijo amr dilodhadha dai. Ŋwubule gi Yahuudiiya ŋwela gi Ges̱ariiya, ŋwunje mine.
Ai gwa Hiiruudus
20A Hiiruudusŋa kaijiye liji lai la S̱uur a la S̱iiduun; albila dugun dhugor dhai dhetipo, alruje Balaastusuŋw gwina gwiro kweleny gwa dunu gwa dhidhire gwa malik medhigen, albupe iŋiriyuŋw; ŋinena athi len la malik iye len legen. 21A gi lamun lina ligitinu momaŋ a Hiiruudus gena ciraŋa ja ŋeleny ŋuŋun, ŋwujalo kursi alaŋ ga ŋeleny ŋuŋun, ŋwuje duŋwulabiŋaijo. 22A liji ure gwula, alarnu, Ŋwal ibiŋwa ŋwiro ŋwal ŋwa kalo geta, a ŋwati ŋwiro ŋwal ŋwa kwiji no. 23A kaija ibige an malaak gwa Kweleny pu Hiiruudusuŋw ganu, a lodo eny ŋwai, ŋinena athathuŋw majidho Kaloŋa no. 24Abi dhuŋun dha Kalo bai galo ŋwoinyadhani. 25A Barnaabaŋa Shaawul gwai aura gi Urushaliim dina malmeaje ŋiro ŋegen, alodha Yuuẖannaŋw gwina gwuthi jiriny jiter jan Margus, ŋediŋa lai.
Valgt i Øjeblikket:
Aⲁmaal Ar Rusul 12: HBN
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
First published by the British and Foreign Bible Society in 1966.