Aⲁmaal Ar Rusul 11
11
Buṯrus gwaŋiyo dhuŋuna dhuŋun
1Dina ma liji lina lukejinu a limega lina lijo gi Yahuudiiya diŋini darnu Liumam ko limuminyi dhuŋuna dha Kalo. 2A dina ma Buṯrus alo gi Urushaliim, a liji la liduŋw lina lurtedhinu kijo Buṯrusuŋw dhugore, 3alarnu, Ŋa gwudhi gi dunu gwa liji lina lati lurtedhinu no, nyaleny. 4Albi Buṯrus aŋajo dhuŋuna dhina dhijo kwerkwereny, ŋwuromaje galo ŋwulaici, 5Nyi gwijo gi len lina lan Yaafa, nyibi je dabiŋaijo Kaloŋa; nyuthi gimirala gi je ganu jiny nyaŋa dhuŋuna dhina dhiro ŋinena dhiŋidi kwoiny gwulo, gwiro ŋinena malaaya gwina gwipa ŋwubil ŋwai kworoŋo gi Sama; ŋwula diginy. 6Nyibi je didatiŋa nyireye je nono, nyi baŋa dhola dha gidhila a owaŋ a ŋidi ŋina ŋathelila galo nyari nyai a nyira nya Sama. 7Nyibidiŋini ŋwal nyilaicinu, Buṯrus gwai, diro, dhugo a ŋeny. 8Nyibarnu, Oo, Kweleny gwai. Kwoŋ gweda gwina gwati gwiŋir deny i gwina gwiro ŋirle gwati gwuni gi jiŋai ganu jiny gatur no. 9Nyibi ŋwal abiŋaijo manaŋ gi Sama alarnu, Ŋidi ŋina ŋijuriyilo Kalo, athaŋa arnu ŋiro ŋirle no. 10A dhuŋun ibidha je ŋwamun ganu thiril dhiro minoŋ, a kwoŋ ibigwa alo gi Sama manaŋ. 11A kaija ibige an liji thiril dhuna gi dunu gwina gwijinyina, lukejilo diginy gi Ges̱ariiya. 12Nyibi Dhigirim aicinu lanalai ela, athinyi dhenyo gi ŋidi ŋeda no. Anela ko liji lai ibila nyiril lina liro limega, anuni gi dunu gwa kwiji. 13A ji ŋeda abiŋaijo darnu akwai gwaŋadhi malaak gi dunu gwuŋun, gwidhunudhi a ŋwaicinu, Ukejo lijo gi Yaafa, alodha Simⓐaanuŋw gwina gwan Buṯrus; 14a ŋeda gwaŋabiŋaijo dhuŋuna dhina dhaŋadhai gilaŋ, ŋa a liji la dunu gwuŋa peth. 15A dina jiny dinyabiŋi, a Dhigirim dhina Dhiŋir ide degen, gwiro ŋinena iduŋwna dega ko kwereny. 16Nyi baŋidhani dhuŋuna dha Kweleny gwina gwarnu, Yuuẖanna gwathiⓐamidhiye ŋau ŋai, abi nyaŋa laji laⓐamidhini Dhigirim dhai dhina Dhiŋir. 17Ada limal Kalo dhedha dhedhaŋw tur gwiro ŋinena gwina dhedhijina ko dina mana uminyi Kwelenya gwina gwan Yasuuⓐ al Masiiẖ; abi nyi gwan ei nyibuthi ŋoma dekajo Kaloŋa? 18A dina maldiŋini dhuŋuna ibidha, alje jigwoiny. Almajidhe Kaloŋa, alarnu, Kalo gimadhedha Liumam dhudhanuŋw ganu gi ŋidi ŋina ŋike dilbuje midhuŋw ko.
Kaniisa ga Liumam gi Anṯaakiiya
19Abi lina libaiyo galo gi dhuŋun dhina dhibur dhina dhijo gi dhuŋun dha Istifaanuus alela Fiiniigiiya a Gubrus a Anṯaakiiya, athibi ŋediŋa abiŋaijo kwijo gweda dhuŋuna dha Kalo no abi Yahuud dogo. 20Abi coŋ degen, lina liro liji la Gubrus a la Gerawaaniiya, dina malila Anṯaakiiya, alabiŋaijo Yuunaaniyiin ko, allabiŋaijo dhuŋuna dha Kweleny gwina gwan Yasuuⓐ. 21A dhoi dha Kweleny je ŋediŋa lai, a liji uminyi loinyadho, alauradha di Kweleny. 22A liji la kaniisa lina lathije gi Urushaliim diŋini dhuŋuna dhan ŋediŋa; alukeje Barnaabaŋw duŋwela gi Anṯaakiiya. 23A dina muŋw obani, ŋwaŋa niⓐma gwa Kalo gwapo ŋiro, ŋwiŋir dhugore, a ŋwabiŋaijo lijo peth dilmuthini galo gi Kweleny dugor dai momaŋ; 24ŋinena ruiuŋw kwiji gwina gwiŋir, a gwoinyadho Dhigirima dhina Dhiŋir a imaan. A liji loinyadho eladha di Kweleny. 25A Barnaaba ela gi Ṯarsuus dibupe Shaawuluŋw. 26A dina muŋwbuje, ŋwugwela gi Anṯaakiiya. Alje liduŋw gidhileo getipo peth gi kaniisa, alalimiye lijo loinyadho; a calmiz dhedhini jiriny jan Masiiẖiyiin kwerkwereny gi Anṯaakiiya.
Ŋidi ŋina ŋapilo Barnaabaŋa Shaawul gwai alŋela gi Urushaliim
27A gi ŋwamun ibiŋwe a nebiŋa coŋ ula gi Urushaliim alela gi Anṯaakiiya. 28A gweta dire degen ganu gwina gwan Aqaabuus, ŋwabiŋaijo lijo Dhigirim dhai ŋwarnu gidhuŋur gina gipa go githo duŋwje kidhila alaŋ peth; gina gijo ko gi ŋwamun ŋwa Kuluudiyuus Ges̱ar. 29Gi dhuŋun dha gidhuŋur a calmiz ari jukeje ŋida ŋa dheny gweta gweta degen ganu gi ŋidi ŋina ŋuthuŋwulo gi limega lina lathije gi Yahuudiiya. 30Alapai dhuŋuna ibidha, allukeje gi shiyuuk gi doi da Barnaaba a Shaawul.
Valgt i Øjeblikket:
Aⲁmaal Ar Rusul 11: HBN
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
First published by the British and Foreign Bible Society in 1966.