Yos 11
11
Kũsindwa kwa Yavini na Asumbĩ angĩ ma Ngalĩko ya Ĩũlũ
1Yĩla Yavini mũsumbĩ wa Asoli weewie ĩũlũ wa ũsindi wa andũ ma Ĩsilaeli, nĩwatũmanie kwa Yovavu mũsumbĩ wa Matoni, na kwa mũsumbĩ wa Similoni na wa Akisavu. 2O ta ũu nĩwatũmanie kwa asumbĩ ala matũaa nthĩ yĩ iĩma ngalĩko ya ĩũlũ, na Mwandanĩ wa Yolotani ũla wĩ ngalĩko ya ĩtheo ya ĩia ya Kalilii, nguumo wa iĩma, na ũtee wa ũkanga vakũvĩ na ndũa ya Ndoli. 3Nĩwasyokie atũmana kwa andũ ma Kanaani ala matwĩe ngalĩko syelĩ sya Ũsĩ wa Yolotani, kwa Aamoli, kwa Aititi, na Avelisi na kwa Ayevusi ala matwĩe nthĩ yĩ iĩma, o vamwe na Aivi ala matwĩe nguumo wa Kĩĩma kya Elimoni kĩla kĩ kĩsionĩ kya Misiva. 4Asumbĩ asu onthe nĩmookanisye na asikalĩ moo ma kaũ. Asikalĩ asu maingĩvĩte ta kĩthangathĩ kya ũkanga na maĩ na mbalasi mbingĩ na makasya ma kaũ. 5O ta ũu asumbĩ asu nĩmaseũvisye ngwatanĩo nĩ kana mokite andũ ma Ĩsilaeli. Nĩmoombanie vamwe na mamba maeema moo vandũ vetawa Kĩw'ũ kya Melomu.
6Mwĩai Ngai nĩwaneenie na Yosua amwĩa atĩĩ, “Ndũkatate kũmakĩa nũndũ ũnĩ saa ta ii tũĩ, ngeethĩwa nĩmanenganĩte onthe ũtonyinĩ wa andũ ma Ĩsilaeli na makamoaa. Mwĩtemanga Mbalasi syoo maũũ, na kũvĩvya makasya moo ma kaũ.” 7Kwoou Yosua na asikalĩ make onthe ma kaũ nĩmamavithũkĩie na kĩthũlũmũko me vala vandũ vetawa Kĩw'ũ kya Melomu. 8Mwĩai Ngai nĩwamanenganie ũtonyinĩ wa andũ ma Ĩsilaeli. Yosua na asikalĩ make nĩmamokitie mũno na mamalũngya melekele ngalĩko ya ĩũlũ nginya mathi kũvika Misilevothi-Maimu na Sitoni. Ngalĩkonĩ ya wumĩlonĩ wa syũa mamalũngilye nginya mathi kũvika mwandanĩ wa Misiva. Kaũ ũsu nĩwokitiwe nginya amaitha asu onthe mooawa mathela vyũ. 9Yosua eekanie namo kwĩanana na ũndũ Mwĩai Ngai wamwĩaĩĩte; nĩwatemangie mbalasi syoo maũũ, na avĩvya makasya moo ma kaũ. 10Ĩvindanĩ yĩu Yosua nĩwasyokie ndũanĩ ya Asoli amĩkwata na ooaa mũsumbĩ wayo. Ndũa ya Asoli nĩyo yaĩ na ũtonyi mũnene kwĩ ila ingĩ syonthe kĩsionĩ kĩu. 11Nĩmooaie andũ onthe ala maĩ ndũanĩ ĩsu; mayaatia mũndũ o na ũmwe e thayũ, na o ta ũu nĩmavĩvisye ndũa ĩsu.
12Yosua nĩwakwatie ndũa isu syonthe na asumbĩ masyo, na ooaa andũ onthe kwĩanana na ũndũ Mwose mũthũkũmi wa Mwĩai Ngai weeaĩte. 13Ĩndĩ andũ ma Ĩsilaeli mayaavĩvya ndũa o na ĩmwe katĩ wa ila syaakĩtwe kũndũ kũtũlu ate o ndũa ya Asoli ĩla Yosua wavĩvisye. 14Andũ ma Ĩsilaeli nĩmakuie syĩndũ syonthe sya ndũa isu ta mũtavo, na o ta ũu matava indo syoo syonthe. Nĩmooaie andũ onthe ma ndũa isu, o na vai ũmwe maatia e thayũ. 15Maũndũ onthe ala Mwĩai Ngai wamwĩaĩĩte mũthũkũmi wake Mwose nomo Mwose weeaĩie Yosua, nake Yosua ameka onthe. Vai ũndũ o na ũmwe Yosua waatia ũtemwĩke katĩ wa ala Mwĩai Ngai weeaĩĩte Mwose.
Kĩsio Kĩla Yosua Wakwatie
16Yosua nĩwakwatie nthĩ ĩsu yonthe; nthĩ ĩla yĩ iĩma, ngalĩko ya ĩtheo yonthe ĩla yĩtawa Nengevu, kĩsio kyonthe kya Ngoseni, nthĩ ĩla ndindimalu, Mwanda wa Yolotani, na iĩma sya Ĩsilaeli na nguumo wa iĩma isu. 17O ta ũu nĩwakwatie kĩsio kya nthĩ ĩsu kuma Kĩĩmanĩ kya Alaki kĩla kĩendete kũvika Seili na kũendeea nginya Mbaali-ngandi ĩla yĩ Mwandanĩ wa Levanoni ĩtheo wa Kĩĩma kya Elimoni. Yosua nĩwakwatie asumbĩ ma ndũa isu syonthe na amooaa. 18Yosua nĩwokitĩte na asumbĩ asu vandũ va ĩvinda ĩasa. 19Ngiveoni vala Aivi amwe mekalaa, noyo ndũa ĩla yaseũvisye wĩw'ano na andũ ma Ĩsilaeli nĩ kana mekalanasye na mũuo. Andũ ma Ĩsilaeli nĩmoosie ndũa ingĩ mbingĩ ĩvindanĩ ya kaũ. 20#Kũt 7.16 Mwĩai Ngai nĩwe watumĩte andũ ma ndũa isu methĩwa meyumĩtye kũkita na andũ ma Ĩsilaeli nĩ kana moawe mathele vyũ mate kwĩw'ĩwa tei. Ũu nĩw'o Mwĩai Ngai wamwĩaĩĩte Mwose.
21Ĩvindanĩ yĩu Yosua nĩwaendie na ooaa andũ maĩ anene ma mbaĩ ya Anaki. Andũ asu matũaa ndũanĩ syĩ iĩmanĩ ila nĩ Eviloni, Ndevili, na Anavu, na nthĩ ila syĩ iĩma sya nthĩ ya Yuta na ya Ĩsilaeli. Yosua nĩwamoaie onthe na aananga ndũa syoo. 22Vai ũmwe wa Aanaki asu waatiala nthĩ ya andũ ma Ĩsilaeli. No anini matialile ndũanĩ ya Ngasa, Ngathi, na Asitoti.
23Yosua nĩwakwatie nthĩ ĩsu yonthe kwĩanana na ũndũ Mwĩai Ngai weeaĩĩte Mwose. Yosua nĩwanengie andũ ma Ĩsilaeli nthĩ ĩsu yonthe yĩthĩwe yoo na amĩaany'a ilungu; kĩlungu kĩmwe kwa kĩla mbaĩ.
Kwoou andũ ma Ĩsilaeli nĩmekalile na mũuo.
BIBLE SOCIETY OF KENYA © 2011