Yos 10
10
Andũ ma Ĩsilaeli Maisinda Aamoli
1Atoninzeteki mũsumbĩ wa Yelũsalemu nĩweewie kana Yosua nĩwakwatĩte na akananga ndũa ya Ai vyũ, na akoaa mũsumbĩ wa ndũa ĩsu, o tondũ weekanĩte na Yeliko na mũsumbĩ wayo. O ta ũu nĩweewie kana andũ ma Ngiveoni nĩmaseũvĩtye wĩw'ano wa mũuo na andũ ma Ĩsilaeli na matũaa vakuvĩ namo. 2Mũsumbĩ ũsu na andũ make nĩmakwatiwe nĩ w'ĩa mwingĩ mũno meew'a ũu, nũndũ Ngiveoni yaĩ ĩmwe ya ndũa sya kĩ-ũsumbĩ ila syaĩ nguma mũno. Ngiveoni yaĩ nene mbee wa ndũa ya Ai na aũme mayo nĩmeesĩ kũkita mũno. 3Kwoou Atoninzeteki mũsumbĩ wa Yelũsalemu nĩwatũmanie kũla kwĩ Oamu mũsumbĩ wa Eviloni, Vikamu mũsumbĩ wa Yalimuthi, Yavia mũsumbĩ wa Lakisi, na Ndembili mũsumbĩ wa Ekeloni. Atũmanie amea atĩĩ, 4“Ambatai mũke mũndetheesye kũkita andũ ma Ngiveoni nũndũ nĩmaseũvĩtye wĩw'ano wa mũuo na Yosua na andũ ma Ĩsilaeli.” 5Nĩvo ĩndĩ asumbĩ asu atano ma Aamoli, namo nĩ: Mũsumbĩ ma Yelũsalemu, Eviloni, Yalimuthi, Lakisi na Ekeloni maseũvisye ngwatanĩo. Nĩmambatie vamwe na asikalĩ moo ma kaũ na meelingĩla ndũa ya Ngiveoni na makwatya kaũ na andũ mayo.
6Andũ ma Ngiveoni nĩmatũmanie kũla kwĩ Yosua e maeemanĩ ala maĩ Ngilikali mamwĩa atĩĩ, “Mũnene, ndũkaeke athũkũmi maku mathĩne. Ũka ũtũtetheesye na ũitũtangĩĩa. Asumbĩ onthe ma Aamoli kuma nthĩ yĩ iĩma nĩmaseũvĩtye ngwatanĩo na nĩmeũtũkita.”
7Nĩvo ĩndĩ Yosua na asikalĩ make ma kaũ o vamwe na asikalĩ ngũmbaũ mambĩĩisye kyalo kya kũthi Ngilikali. 8Mwĩai Ngai nĩweeie Yosua atĩĩ, “Ndũkakĩe asumbĩ ma Aamoli na asikalĩ moo. Kwa w'o nĩngũtuma ũmasinda. Vai ũmwe woo wĩĩthĩwa akũsinda.” 9Yosua na asikalĩ make nĩmaendie ũtukũ mũima kuma Ngilikali mathi Ngiveoni. Kwoou asikalĩ ma Ĩsilaeli nĩmavithũkĩie Aamoli matesĩ. 10Mwĩai Ngai nĩwatumie andũ asu makwatwa nĩ w'ĩa moona asikalĩ ma Ĩsilaeli na kwoou mamasinda. Asikalĩ ma Ĩsilaeli nĩmaatĩĩie asikalĩ ma Aamoli matheelela Mbethi-oloni kwĩsĩla Aseka kũthi kũvika Maketa o maendee na kũmoaa. 11Yĩla Aamoli matheelele Mbethi-oloni makĩĩte, Mwĩai Ngai nĩwauisye mbua ya mavia manene. Mavia asu nĩmavalũkangĩile Aamoli na aingĩ moo mooawa nĩ mavia, mbee wa ala mooaĩtwe nĩ asikalĩ ma Ĩsilaeli.
12Mũthenyanĩ ũla Mwĩai Ngai watumie andũ ma Ĩsilaeli masinda Aamoli, Yosua nĩwaneenie nake e mbee wa andũ ma Ĩsilaeli asya atĩĩ:
“We syũa, ũngama ĩũlũ wa Ngiveoni;
we mwei, ũngama ĩũlũ wa Mwanda wa Aiyaloni.”
13 #
2Sam 1.18
Syũa nĩyaũngamie na mwei o naw'o ndwaathi nginya andũ ma Ĩsilaeli masinda amaitha moo. Ũvoo ũũ ũandĩkĩtwe ĩvukunĩ ya Yasali. Syũa nĩyaũngamie matunĩ na yĩyaathi vandũ va ĩvinda ta ya mũthenya mũima. 14Kũyaĩ kwaaĩthĩwa, na o na kũvika ũmũnthĩ kũyaaĩthĩwa ĩngĩ mũthenya ta ũsu, yĩla Mwĩai Ngai weethukĩĩisye na eeka kwenda kwa mũndũ; nũndũ Mwĩai Ngai nĩwatetheeisye andũ ma Ĩsilaeli.
15Ĩtina wa maũndũ asu, Yosua na asikalĩ make nĩmasyokie maeemanĩ ala maĩ Ngilikali.
Kũkwatwa kwa Asumbĩ Atano ma Aamoli
16Ala asumbĩ atano ma Aamoli maĩ makĩie mathi kwĩvitha ngunganĩ ĩla yĩ Maketa.
17Yĩla Yosua wataviw'e kana asumbĩ asu atano nĩmonekie mevithĩte ngunganĩ Maketa, 18nĩweeie asikalĩ make atĩĩ, “Vingilityai mavia manene mũlinde mũomo wa ngunga ĩsu, na mũitia asikalĩ amwe mamĩsunge. 19Ĩndĩ inyw'ĩ mũikekale vo. Endeeai na kũatĩĩa amaitha menyu mũimokita kuma ĩtina; mũikaekane namo mavike ndũanĩ syoo! Mwĩai Ngai, Ngai wenyu, nũmũnengete ũtonyi ĩũlũ wamo.” 20Yosua na andũ ma Ĩsilaeli nĩmooaie Aamoli, o na kau amwe nĩmamanthie kũndũ ũkũtanĩ wa ndũa syoo mbiĩĩe meevitha na malea kũawa. 21Asikalĩ onthe ma Yosua nĩmasyokie Maketa maeemanĩ me ũsũvĩonĩ. Vai mũndũ waatata kũneena ũndũ mũthũku ĩũlũ wa andũ ma Ĩsilaeli.
22Nĩvo ĩndĩ Yosua weeie asikalĩ make atĩĩ, “Vingũai mũomo wa ngunga na mũyumaalya asumbĩ asu atano mũmaete vaa nĩĩ.” 23Kwoou nĩmavingũie mũomo wa ngunga ĩsu, na maumaalya asumbĩ asu atano. Asumbĩ asu maĩ: Mũsumbĩ wa Yelũsalemu, mũsumbĩ wa Eviloni, mũsumbĩ wa Yalimuthi, mũsumbĩ wa Lakisi na mũsumbĩ wa Ekeloni. 24Yĩla maetie asumbĩ asu vala waĩ, Yosua nĩweetie aũme onthe ma Ĩsilaeli na eea atongoi ma asikalĩ make atĩĩ, “Thengeeai vaa na mũikinya asumbĩ aa ngingo.” Nĩmathengeeie na meeka ũu. 25Yosua nĩweeie atongoi asu atĩĩ, “Mũikakĩe kana kũkw'a ngoo. Ĩthĩwai na vinya na ũkũmbaũ. Nũndũ ũu nĩw'o Mwĩai Ngai wĩĩkanaa na amaitha menyu ala mwĩũkitaa namo.” 26Yosua nĩwakũnie asumbĩ asu amoaa na amasũsya mĩtĩnĩ ĩtano. Asumbĩ asu nĩmekalile masũĩte mĩtĩnĩ ĩsu nginya ĩa mawĩoo. 27Syũa yĩithũa Yosua nĩwaumisye mwĩao mĩĩ ya asumbĩ asu yumw'e mĩtĩnĩ ĩsu na kwĩkw'a ngunganĩ ĩla meevithĩte mbeenĩ. Ngunga ĩsu nĩyakunĩkiwe na mavia manene ala me o vo kũvika ũmũnthĩ.
Yosua Aikwata Isio ingĩ sya Aamoli
28Yosua na asikalĩ make nĩmokitie na makwata ndũa ya Maketa vamwe na mũsumbĩ wayo mũthenya ũsu. Nĩmooaie andũ onthe ala maĩ ndũanĩ ĩsu; vai mũndũ o na ũmwe waatiwa e thayũ. Nĩmeekanie na mũsumbĩ wayo o tondũ maĩ maneekana na mũsumbĩ wa Yeliko.
29Ĩtina wa ũu Yosua na asikalĩ make nĩmaumie Maketa na mathi kũkita ndũa ya Livina. 30Mwĩai Ngai nĩwanenganie ndũa ĩsu na mũsumbĩ wayo ũtonyinĩ wa andũ ma Ĩsilaeli. Yosua na asikalĩ make nĩmooaie andũ onthe mateũtialya o na ũmwe ndũanĩ ĩsu. Nĩmeekanie na mũsumbĩ wayo o tondũ maĩ maneekana na mũsumbĩ wa Yeliko. 31Kuma Livina, Yosua na asikalĩ make nĩmaendeeie mathi kũvika Lakisi. Nĩmamĩthyũlũlũkile na mamĩvithũkĩa. 32Mũthenyanĩ wa kelĩ wa kaũ ũsu Mwĩai Ngai nĩwanenganie ndũa ĩsu ũtonyinĩ wa andũ ma Ĩsilaeli. Nĩmooaie andũ onthe ala maĩ ndũanĩ ĩsu na meekana nayo o tondũ meekanĩte na Livina. 33Mũsumbĩ Olamu wa ndũa ya Ngeseli nĩwookie kũtetheesya andũ ma Lakisi, ĩndĩ Yosua na asikalĩ make nĩmooaie mũsumbĩ ũsu, asikalĩ make, na andũ onthe ma ndũa ĩsu matekũtialya mũndũ o na ũmwe.
34Ĩtina wa ũu Yosua na asikalĩ make nĩmaumie Lakisi mathi kũvika ndũanĩ ya Ekeloni. Nĩmamĩthyũlũlũkile na mamĩvithũkĩa. 35Nĩmamĩtavie mũthenyanĩ o ũsu na mooaa andũ onthe ma ndũa ĩsu o tondũ meekanĩte na Lakisi.
36Kuma Ekeloni Yosua na asikalĩ make nĩmambatie mathi kũvika ndũanĩ ya Eviloni mamĩvithũkĩa, 37na mamĩkwata. Nĩmooaie mũsumbĩ wayo, na andũ onthe ala maĩ ndũanĩ ĩsu vamwe na ndũa ila ingĩ syayo. Nĩmaanangie ndũa ĩsu vyũ o tondũ meekanĩte na Ekeloni. Vai mũndũ o na ũmwe waatiwa e thayũ.
38Nĩvo ĩndĩ Yosua na asikalĩ make mavĩndũkie masyoka ndũanĩ yĩtawa Ndevili na mamĩvithũkĩa. 39Nĩmamĩkwatie vamwe na mũsumbĩ wayo, na ndũa ila ingĩ syonthe syaĩ vakuvĩ nayo. Nĩmooaie andũ onthe ala maĩ ndũanĩ isu, na meekana na Ndevili vamwe na mũsumbĩ wayo o tondũ maĩ maneekana na Eviloni vamwe na Livina na asumbĩ masyo.
40Kwoou Yosua nĩwokitie na akwata ndũa syonthe sya kĩsio kĩu. Nĩwasindie asumbĩ ma ndũa ila syaĩ nthĩ yĩ iĩma, ila syĩ ivaũũkonĩ sya ngalĩko ya wumĩlonĩ wa syũa, ila syĩ nguumo wa iĩma syĩ ngalĩko ya ũthũĩlonĩ wa syũa, o vamwe na ila ingĩ syĩ weũnĩ ngalĩko ya ĩtheo ĩla yĩtawa Nengevu. Vai mũndũ o na ũmwe waatiwa e thayũ; onthe nĩmooaiwe. Ũu nĩw'o Mwĩai Ngai, Ngai wa Ĩsilaeli weeaĩte. 41Yosua nĩwokitie na asinda ndũa isu syonthe kuma Katesi-mbalinea kũthi kũvika Ngasa, na kuma kĩsio kyonthe kya Ngoseni kũthi kũvika Ngiveoni. 42Yosua nĩwasindie ĩvindanĩ o yĩu yĩmwe asumbĩ asu onthe na nthĩ isu syonthe, nĩkwĩthĩwa Mwĩai Ngai, Ngai wa Ĩsilaeli, nĩwatetheeisye andũ ma Ĩsilaeli kũkita. 43Ĩtina wa maũndũ asu Yosua na asikalĩ make nĩmasyokie maeemanĩ moo ala maĩ Ngilikali.
BIBLE SOCIETY OF KENYA © 2011