Asi 3
3
Mbaĩ ila Syatialile Nthĩ ya Kanaani
1Ii nĩsyo mbaĩ ila Mwĩai Ngai watialilye nthĩ ya Kanaani nĩ kana itatae andũ ma Ĩsilaeli ala maĩ mataaona kaũ ũla wokitiwe kũu Kanaani. 2Eekie ũu nĩ kana amanyĩsye kĩla nzyawa ya andũ ma Ĩsilaeli ĩũlũ wa kaũ, na mũno ala maĩ mataathi kaũnĩ vau mbeenĩ. 3Andũ ala matialile nĩ ala matwĩe ndũanĩ itano sya Avilisiti, Akanaani onthe, Asitoni, na Aivi ala matwĩe iĩmanĩ sya Levanoni kuma Kĩĩmanĩ kya Mbaali-elimoni kũthi kũvika ũlikĩlonĩ wa Amathi. 4Andũ asu matiĩtwe matate andũ ma Ĩsilaeli, nĩ kana kũmanyĩke kana andũ ma Ĩsilaeli nĩmekwĩw'a mĩao ya Mwĩai Ngai ĩla weeaĩie aaũmae moo kwĩsĩla kũla kwĩ Mwose. 5Kwoou andũ ma Ĩsilaeli mekalanasya na Akanaani, Aititi, Aamoli, Avelisi, Aivi, na Ayevusi. 6Andũ ma Ĩsilaeli nĩmatwaie eĩtu ma andũ ma mbaĩ isu, na eĩtu moo matwawa nĩ aũme ma mbaĩ isu. O ta ũu andũ ma Ĩsilaeli nĩmathaithaa ngai syoo.
Othinieli Aitangĩĩa Andũ Ma Ĩsilaeli kuma Ũtonyinĩ wa Mũsumbĩ Kusani-lisathaimu
7Andũ ma Ĩsilaeli nĩmoolilwe nĩ Mwĩai Ngai, Ngai woo na mamũvĩtĩsya kwa kũthaitha mĩvw'anano ya ngai sya Mbaali na sya Asetalothi. 8Kwoou Mwĩai Ngai nĩwathatie nũndũ wa andũ ma Ĩsilaeli na atuma Kusani-lisathaimu mũsumbĩ wa Mesovotamia amasinda, na kũmasumbĩka vandũ va myaka nyanya. 9Andũ ma Ĩsilaeli nĩmamũĩĩie Mwĩai Ngai nake atũma mũndũ ũla wookie kũmatangĩĩa. Mũndũ ũsu eetawa Othinieli mwana wa Kenasi mũinae wa Kalevu. 10Veva wa Mwĩai Ngai waĩ ĩũlũ wake na kwoou atw'ĩka Mũsili#3.10 Mũsili: Maandĩko amwe Matheu maĩtye Mũtongoi wa andũ ma Ĩsilaeli. Othinieli nĩwaendie kaũnĩ, nake Mwĩai Ngai amũnenga ũtonyi wa kũsinda Mũsumbĩ Kusani-lisathaimu wa Mesovotamia. 11Nthĩ ĩsu nĩyeethĩiwe na mũuo vandũ va myaka mĩongo ĩna nginya yĩla Othinieli mwana Kenasi wakwie.
Euti Aitangĩĩa Andũ ma Ĩsilaeli kuma Ũtonyinĩ wa Mũsumbĩ wa Moavi
12Andũ ma Ĩsilaeli nĩmavĩtĩisye Mwĩai Ngai ĩngĩ, na kwondũ wa ũu Mwĩai Ngai nĩwatumie Ekeloni mũsumbĩ wa Moavi ethĩwa na vinya mbee woo. 13Ekeloni nĩweetie Aamimoni na Aamaleki na mathi mokita andũ ma Ĩsilaeli. Nĩmamasindie, na makwata ndũa ya Yeliko ĩla yeetawa ndũa ya Mĩkĩndũ. 14Andũ ma Ĩsilaeli nĩmekalile ũtonyinĩ wa Ekeloni mũsumbĩ wa Moavi vandũ va myaka ĩkũmi na nyanya.
15Andũ ma Ĩsilaeli nĩmamũĩĩie Mwĩai Ngai, nake atũma mũndũ ũla wookie kũmatangĩĩa. Mũndũ ũsu eetawa Euti. Euti aĩ kĩmotho na aĩ mwana wa Ngela kuma mbaĩnĩ ya Mbengyameni. Andũ ma Ĩsilaeli nĩmatũmie Euti athi kũla kwĩ Ekeloni mũsumbĩ wa Moavi amũkuĩe mĩthĩnzĩo. 16Euti nĩweeseũvĩisye kavyũ koĩ ngalĩko syelĩ, kaĩ na ũasa wa sendimita ta mĩongo ĩtano. Nĩwooveeie kavyũ kau ngalĩkonĩ yake ya kw'oko kwa aũme na akakavw'ĩka na ngũa. 17Nĩwaendie anenga Ekeloni mũsumbĩ wa Moavi ĩla mĩthĩnzĩo. Ekeloni aĩ mũndũ mũnou mũno. 18Euti amina kũnenga mũsumbĩ mĩthĩnzĩo nĩweeie andũ ala makuĩte mĩthĩnzĩo ĩsu nĩmenũke. 19Ĩndĩ we Euti nĩwasyokeie vandũ vasĩawa mĩvw'anano vakuvĩ na Ngilikali. Yĩla wasyokie vala ve Mũsumbĩ Ekeloni nĩwamwĩie atĩĩ, “Mũsumbĩ, nĩ na ũtũmani wa kĩmbithĩ waku.”
Mũsumbĩ nĩweeaĩie athũkũmi make amea atĩĩ, “Endai mũtũtie vaa twĩ elĩ!” Na kwoou athũkũmi asu onthe mathi.
20Nĩvo ĩndĩ Euti waendie nyũmbanĩ ya ĩũlũ vala mũsumbĩ wailyĩ e weka vandũ vathithu na amwĩa atĩĩ, “Nĩna ũtũmani waku kuma kwa Ngai.” Mũsumbĩ nĩwookĩlile kuma kĩvĩlanĩ kyake. 21Euti nĩwatambũũkisye kw'oko kwake kwa aka na akũa ũvyũ vala waũkoleletye ngalĩko ya kw'oko kwake kwa aũme. Nĩwatonyie Mũsumbĩ Ekeloni naw'o amũvũthũa ĩvu. 22Ũvyũ ũsu w'onthe na mbusya yaw'o nĩwalikile ĩvu wathi kumĩlĩĩla mũongo na wavw'ĩkwa nĩ mathunya. Euti ndaaũkũa. 23Euti Nĩwaumaalile, na avinga mĩomo na kĩvulĩ. 24Amina kũthi, athũkũmi ma mũsumbĩ nĩmookie na meethĩa mĩomo yĩ mĩvinge ĩkalũma. Nĩvo ĩndĩ maisye atĩĩ, “Mũsumbĩ nũtonya kwĩthĩwa e nyũmbanĩ ya ĩũlũ kyoonĩ ayĩtethya.” 25Athũkũmi asu nĩmeeteelile nginya makwatwa nĩ nzika. Yĩla mũsumbĩ waleile kũvingũa mũomo, nĩmoosie ũvungũo na mavingũa. Nĩmeethĩie mũnene woo avalũkĩte nthĩ e mũkw'ũ.
26Maendee kweteela, Euti nĩwaumie athi. Nĩwavĩtĩle vala vasũvĩaw'a mĩvw'anano na eevitha athi Seila. 27Yĩla wavikie nĩwavuvie soo e nthĩ yĩ iĩma ya Evalaimu nĩ kana ete andũ ma Ĩsilaeli mathi kaũnĩ. Nĩvo ĩndĩ wamatongoeisye matheea kuma iĩmanĩ. 28Nĩwameaĩie amea atĩĩ, “Ngatĩĩai! Mwĩai Ngai nũmũnengete ũtonyi wa kũsinda Amoavi amaitha menyu.” Kwoou nĩmatheeie maatĩĩe Euti, na mathi kũkwata vandũ vala Amoavi maĩ matonya kũingĩla Ũsĩ wa Yolotani; mayaaĩtĩkĩlya mũndũ o na ũmwe ainge. 29Ĩvindanĩ yĩu nĩmooaie asikalĩ ngili ĩkũmi ala aseo vyũ ma Amoavi; vai ũmwe woo waavonoka. 30Mũthenyanĩ ũsu andũ ma Ĩsilaeli nĩmasindie Amoavi na nthĩ ĩsu nĩyeethĩiwe na mũuo vandũ va myaka mĩongo nyanya.
Samũkali Aitangĩĩa Andũ ma Ĩsilaeli kuma Ũtonyinĩ wa Avilisiti
31Ĩtina wa Euti, Samukalĩ mwana wa Anathi nĩwoosie ũtongoi. Samukalĩ o nake nĩwatangĩĩie andũ ma Ĩsilaeli. Eekie ũu kwa kũaa Avilisiti maana thanthatũ aitũmĩa ndata ya kũinga ng'ombe.
BIBLE SOCIETY OF KENYA © 2011