Asi 2
2
Mũlaĩka wa Mwĩai Ngai e Mbokimu
1Mũlaĩka wa Mwĩai Ngai nĩwaumie Ngilikali ambata athi Mbokimu na aneena na andũ ma Ĩsilaeli amea atĩĩ, “Nyie nĩnamumisye nthĩ ya Misili na namũete nthĩ ĩla nathie aaũmae menyu. Nĩnaisye, ‘Ndikananga ũtianĩo wakwa nenyu ĩvinda yonthe. 2#Kuma 34.12-13; Kũt 7.2-5 Mũikaatate kũseũvya ũtianĩo na andũ ala matũaa nthĩ ĩno. No nginya mũomboe ithembeo syoo.’ Ĩndĩ ũu wĩ o vo nĩmwaleile kwĩka ũndũ namwĩie. Mwĩkĩte ũu nĩkĩ? 3Kwoou yu ĩndĩ nyie nĩngũmũtavya kana ndikamalũngya maume vala mũĩ; makeethĩawa amaitha menyu na ngai syoo ikeethĩawa mũteo kwenyu.” 4Mũlaĩka ũsu amina kũneena maũndũ asu, andũ onthe ma Ĩsilaeli nĩmambĩĩie kũĩa na wasya mũnene. 5Nĩmeetie vandũ vau Mbokimu. Me vau nĩmamumĩisye Mwĩai Ngai nthembo.
Kĩkw'ũ kya Yosua
6Yosua amina kũtaanĩsya na andũ ma Ĩsilaeli, andũ ma kĩla mbaĩ nĩmaendie kĩsionĩ kya nthĩ kĩla maaĩĩtwe kĩthĩwe ng'ũndũ yoo. 7Andũ ma Ĩsilaeli nĩmamũthũkũmaa Mwĩai Ngai ĩvindanĩ yonthe yĩla Yosua waĩ thayũ. Ĩtina wa kĩkw'ũ kyake, nĩmaendeeie kwĩka ũu ĩvindanĩ yonthe ya atongoi moo ala matiiwe me thayũ na moonete maũndũ manene ala Mwĩai Ngai weekĩte andũ ma Ĩsilaeli. 8Mũthũkũmi wa Mwĩai Ngai Yosua mwana wa Nuni akwie e na ũkũũ wa myaka ĩana na ĩkũmi. 9#Yos 19.49-50 Nĩmamũthikie kĩsionĩ kya nthĩ yake ĩla yaĩ Timina-eelesi ĩla yĩ nthĩ yĩ iĩma ya Evalaimu, ngalĩkonĩ ya ĩũlũ ya Kĩĩma kya Ngaasi. 10Nzyawa syonthe sya ĩvindanĩ yĩu nĩsyakwie syathela na kweethĩwa na nzyawa ingĩ ila itamwĩsĩ Mwĩai Ngai na o na iteesĩ maũndũ ala Mwĩai Ngai weekĩte andũ ma Ĩsilaeli.
Andũ ma Ĩsilaeli Maieka Kũmũthaitha Mwĩai Ngai
11Andũ ma Ĩsilaeli nĩmavĩtĩisye Mwĩai Ngai kwa kũthaitha ngai sya Mbaali. 12Nĩmaekie kũthaitha Mwĩai Ngai, Ngai wa aaũmae moo, ũla wamaumisye nthĩ ya Misili na mambĩĩsya kũthaitha ngai ingĩ. Ngai isu syathaithawa nĩ andũ ala matwĩe mathyũlũlũkĩte andũ ma Ĩsilaeli. Nũndũ wa kwĩka ũu, nĩmamũthatisye Mwĩai Ngai. 13Nĩmaekie kũthaitha Mwĩai Ngai na mambĩĩsya kũthaitha ngai sya Mbaali na sya Asetalothi. 14Ũthatu wa Mwĩai Ngai nĩwatumie anengane andũ ma Ĩsilaeli kũla kwĩ amaitha moo ala matavie syĩndũ syoo. Mwĩai Ngai nĩwatumie amaitha moo ala mamathyũlũlũkĩte mamasinda na weethĩa maitonya kwĩyũkitĩa. 15Ĩvindanĩ yonthe yĩla andũ ma Ĩsilaeli mathi kaũnĩ, Mwĩai Ngai nĩwatumaa masindwa nĩ amaitha moo, o tondũ weevĩtĩte akamea, na kwoou andũ ma Ĩsilaeli meethĩwa thĩnanĩ mũnene.
16Nĩvo ĩndĩ Mwĩai Ngai wanengie andũ ma Ĩsilaeli asili ala mamatangĩĩie kuma andũnĩ ala mamavenaa ũthwii woo. 17Ũu wĩ o vo, andũ ma Ĩsilaeli nĩmaleile kwĩthukĩĩsya asili asu, na maendeea kwĩthĩwa mate aĩkĩĩku na mathaitha ngai ingĩ. Aaũmae moo nĩmaatĩĩaa mĩao ya Mwĩai Ngai, ĩndĩ nzyawa isu syasyaĩtwe nĩsyaekie kũmwĩw'a. 18Ĩvinda yonthe Mwĩai Ngai anyuvĩa andũ ma Ĩsilaeli mũsili, nĩwamũsũvĩaa na aimũtetheesya kũmavonokya kuma ũtonyinĩ wa amaitha moo nginya mũsili ũsu akesa kũkw'a. Mwĩai Ngai nĩweew'ĩaa andũ ma Ĩsilaeli tei nũndũ wa kĩĩo kyoo yĩla maendee kũthĩnw'a na kwĩw'ĩthw'a woo nĩ amaitha moo. 19Ĩndĩ mũsili ũsu amina kũkw'a, andũ ma Ĩsilaeli nĩmasyokaa makambĩĩa kwĩka maũndũ mathũku o na mbee wa ala meekawa nĩ nzyawa ila syaĩ mbee woo. Nĩmathaithaa na kũthũkũma ngai ingĩ, na kũlea kũekana na mwĩkalo woo mũthũku. 20Nĩvo ĩndĩ Mwĩai Ngai weew'ĩthaw'a woo nĩ andũ asu na ayasya atĩĩ, “Nũndũ andũ aa nĩmanangĩte ũtianĩo ũla neeaĩe aaũmae moo maatĩĩae, na makalea kũmbĩw'a, 21ndikaalũngya andũ ma mbaĩ ila syatialile Yosua amina kũkw'a. 22Ngatũmĩaa andũ ma mbaĩ isu kũtata andũ ma Ĩsilaeli nĩ kana nĩmanye kana nĩmekũatĩĩa nzĩa yakwa nyie Mwĩai Ngai na kwĩkala nthĩnĩ wayo o tondũ aaũmae moo meekaa.” 23Kwoou Mwĩai Ngai nĩwaekie andũ ma mbaĩ isu ingĩ mekale nthĩ ĩsu; ndaanenga Yosua ũtonyi wa kũmasinda o na ndaamalũngya mathi mĩtũkĩ ĩtina wa kĩkw'ũ kya Yosua.
BIBLE SOCIETY OF KENYA © 2011