Yak 2
2
Ũkany'o ĩũlũ wa Kwĩthĩwa na Wendeesyo
1Mbaitũ, nũndũ mwĩ aĩkĩĩi ma Mwĩai waitũ Yesũ Klĩsto, Mwĩai ũla ũkumaw'a, mũikonany'e wendeesyo kwa andũ amwe. 2Kwa sũanĩai mũtonya kwĩka ata, mwĩ wũmbanonĩ vakoka mũndũ mũthwii wĩkĩĩte mbete ya thaavu na ngũa sya thooa mũnene, na o ta ũũ vayũka mũndũ ũngĩ wĩkĩĩte matani. 3#Sav 34.8 Ethĩwa mũkanenga ndaĩa mũndũ ũla wĩkĩĩte ngũa mbanake mũmwĩe, “Ĩkala kĩvĩlanĩ kĩĩ kĩseo,” na mũyĩa ũla ngya, “Ũngama vaya we,” kana, “Ĩkala nthĩ vaa mũthanganĩ,” 4nĩkũlya, kũu ti kwonany'a kana mwĩkĩĩte ivathũkany'o katĩ wenyu, na kumasya ũtw'ĩo mũatĩĩe mosũanĩo menyu mathũku?
5Ĩthukĩĩsyei mbaitũ endwa makwa! Ngai anyuvie ala ngya kũũ nthĩ methĩwe me athwii mũĩkĩĩonĩ, na kũlika ũsumbĩnĩ ũla Ngai wathie andũ ala mamwendete. 6Ĩndĩ inyw'ĩ mũvũthasya mũndũ ũla ngya! Athwii mo tyo mo mamũvinyĩĩaa na kũmũtwaa kotinĩ? 7Na tyo mo maumangaa ĩsyĩtwa ĩseo ya ũla mwĩtanĩaw'a nake?
8 #
Ali 19.18
Nĩmwĩkaa nesa ethĩwa nĩmwĩanĩasya kwa w'o ũla mwĩao mũnene kwĩ ĩla ĩngĩ yonthe, o tondũ kũandĩkĩtwe Maandĩkonĩ Matheu, “Mwende mũtũi waku o tondũ wĩyendete mwene.” 9Ĩndĩ ethĩwa mwendeeasya andũ amwe nĩmũvĩtasya, na kwoou kwĩanana na mĩao mwĩ avĩtany'a. 10Mũndũ ũla ũatĩĩaa mĩao yonthe, ĩndĩ aitũla ũmwe wayo ethĩawa atũla yonthe. 11#Kuma 20.13,14; Kũt 5.17,18 Nũndũ ũla waisye, “Ndũkalaalae,” nowe waisye, “Ndũkoae mũndũ.” O na ethĩwa ndwĩkaa ũlaalai ĩndĩ ũyũaa mũndũ, ũtw'ĩkaa mũvĩtany'a. 12Kwoou neenaai na kwĩkaa maũndũ ta andũ makasilĩlwa na mwĩao ũla ũetae ũthasyo kwa andũ, 13nĩkwĩthĩwa mũndũ ũla ũtew'ĩaa ala angĩ tei, akasilĩlwa atekwĩw'ĩwa tei; ĩndĩ tei nũsindaa ũsilĩlo.
Mũĩkĩĩo na Meko
14Mbaitũ, ve ũtethyo mwaũ mũndũ kwasya e na mũĩkĩĩo na ndonany'a ũu kwa meko? Mũĩkĩĩo wa mũthemba ũsu nũtonya kũtangĩĩa mũndũ ũsu? 15Kwa sũanĩai mwana-a-asa kana mwĩĩtu-a-asa e mũtw'ĩkĩe na aĩwe nĩ lĩu wa kũya, 16na ũmwe wenyu aimwĩa, “Enda na mũuo, na ũyĩkĩa ngũa syĩ muutĩa na ũiya ũvũne.” Ethĩwa ndekũnenga mũndũ ũsu syĩndũ isu wĩ na vata nasyo, ndeto isu syĩ ũtethyo mwaũ? 17Kwoou naw'o mũĩkĩĩo no ta ũu: Ethĩwa ndwĩ na meko nĩ wa mana.
18Ĩndĩ mũndũ nũtonya kwasya, “Ve mũndũ ũmwe wĩ na mũĩkĩĩo, na ũngĩ wĩ na meko.” Ũsũngĩo wakwa nĩ atĩĩ, “Mbony'ei ũndũ mũndũ ũtonya kwĩthĩwa na mũĩkĩĩo ũte meko, nakwa nĩngũmwony'a mũĩkĩĩo wakwa kwĩsĩla mekonĩ makwa.” 19We nũĩkĩĩaa kana Ngai no ũmwe tũ; nũseo nĩwĩkaa nesa. Ĩndĩ o namo maimũ no maĩkĩĩaa ũu na makathĩlĩa nĩ w'ĩa. 20We mũndũ mũtumanu nĩũkũlya, nũkwenda kwonw'a kana mũĩkĩĩo ũte meko nĩ wa mana? 21#Mwa 22.1-14 Avalaamu ũmae waitũ atalĩlwe kwĩthĩwa mũlũngalu kwa nzĩa myaũ? Kwĩsĩla mekonĩ make, yĩla wathembeie Ngai mwana wake Isaka kĩthembeonĩ. 22Kwoou nũkwona ũndũ mũĩkĩĩo wake waendanasya na meko, na mũĩkĩĩo wake weanĩĩiw'e nĩ meko ala weekie. 23#Mwa 15.6; 2Mav 20.7; Ĩsa 41.8 Namo Maandĩko Matheu meanĩw'a ala maĩtye, “Avalaamu nĩwamũĩkĩĩie Ngai, na kwa kĩtumi kĩu Ngai amũtw'a kwĩthĩwa mũlũngalu,” na ambĩĩa kwĩtwa mũnyanyae wa Ngai. 24Kwoou nĩtũkwona kana mũndũ atw'ĩkĩthaw'a mũlũngalu kwondũ wa meko make, na ti kwa mũĩkĩĩo w'oka.
25 #
Yos 2.1-21
Ũu now'o kweethĩiwe kwa Laavi ũla mũndũ mũka waĩ ĩlwaya. Atw'ĩkĩthiw'e mũlũngalu kwondũ wa kũthokya ala andũ matũmĩtwe kwa kĩmbithĩ moke kũmanya ũndũ andũ ma Yeliko matũaa, na amony'a nzĩa ĩngĩ ya kuma kũu mathi.
26Kwoou ĩndĩ o tondũ mwĩĩ ũte na thayũ wĩthĩawa wĩ mũkw'ũ, o na w'o mũĩkĩĩo ũla ũte na meko nĩ mũkw'ũ.
BIBLE SOCIETY OF KENYA © 2011