Yak 1
1
1 #
Mat 13.55; Mk 6.3; Meko 15.13; Aka 1.19 Kuma vala nĩĩ nyie Yakovo mũthũkũmi wa Ngai na wa Mwĩai Yesũ Klĩsto. Valũa ũũ nĩ kwenyu andũ onthe ma Ngai ĩũlũ wa nthĩ. Nĩnamũkethya.
Mũĩkĩĩo na Ũĩ ũla Wumaa kwa Ngai
2Mbaitũ, yĩla mwakwatwa nĩ matatwa ma kĩla mũthemba, osaai ũndũ ũsu na ũtanu, 3nĩkwĩthĩwa nĩmwĩsĩ yĩla mwatatwa mũĩkĩĩonĩ na mwaema kũvalũka, ũu ũtumaa mwĩthĩwa na wũmĩĩsyo. 4Ũmĩĩasyai tũ vate kũleela, nĩ kana mwĩthĩwe mwĩ ethĩanu na eanĩu mũte kĩndũ mũtialĩtye. 5Ethĩwa ve ũmwe wenyu ũte na ũĩ, nĩavoye Ngai nake nũkũmũnenga, nĩkwĩthĩwa Ngai anengae andũ onthe kwa wingĩ na ateũmatetya. 6Ĩndĩ ũla ũkũvoya, nĩavoye e na mũĩkĩĩo, na ndakethĩwe na nzika. Mũndũ ũla ũkwatawa nĩ nzika avw'ana ta kĩtulumo ũkanganĩ, kĩla kĩkũnawa nĩ kĩseve kĩkatwawa kũũ na kũũ. 7Mũndũ wa mũthemba ũsu ndakasũanĩe kana nũkũkwata kĩndũ kuma kwa Mwĩai, 8nũndũ nĩ mũndũ wa mĩtwe ĩlĩ, nde vala ũũngamĩle.
Ũkya na Ũthwii
9Mũklĩsto ũla ngya nĩwaĩlĩtwe nĩ kũtana yĩla Ngai wamũkĩlya, 10#Ĩsa 40.6-7 nake Mũklĩsto ũla mũthwii o ta ũu nĩwaĩlĩtwe nĩ kũtana yĩla watheew'a nĩ Ngai. Mũndũ mũthwii akathela o ta ĩlaa ya mũtĩ wa kĩthekanĩ. 11Nũndũ syũa nĩyumaa na ũvyũvu wayo yĩkavovya mũtĩ; mũtĩ ũsu nĩwĩtaa malaa maw'o na wanake waw'o ũithela. Ũu now'o mũndũ mũthwii wĩthela o aendee na mawĩa make.
Kũmĩĩsya Matatwa
12Nĩ mũathime mũndũ ũla wũmĩĩasya matatwa, nũndũ asinda matatwa asu akakwata mũthĩnzĩo wa thayũ, ũla Ngai wathie andũ ala mamwendete. 13Yĩla mũndũ ũkũtatwa ndakasye atĩĩ, “Ũtato ũũ wumĩte kwa Ngai,” nũndũ Ngai ndatatawa eke naĩ, o nake mwene ndatataa mũndũ. 14Ĩndĩ mũndũ atatawa yĩla wakuswa na kũsindwa nĩ mawendi make mathũku. 15Yĩla weetĩkĩla kũatĩĩa mawendi make mathũku, nĩvo ĩndĩ wĩkaa naĩ, na aendeea kwĩka naĩ aikw'a kĩ-veva.
16Mũikakengeke mbaitũ endwa makwa. 17Kĩnengo kĩla kĩseo kyonthe na mũthĩnzĩo ũla mwĩthĩanu syumaa ĩũlũ ĩtunĩ; itheeaa kuma kwa Ngai, Mũmbi wa syeni syonthe, ũla ũtaalyũkaa na ũtaetae kĩvindu kwa kũalyũka. 18Kwa kwenda kwake mwene nĩwatũsyaie kwĩsĩla ndetonĩ ya ũla w'o, nĩ kana twĩthĩwe ta ũsyao wa mbee wa syĩndũ ila woombie.
Kwĩw'a Ndeto ya Ngai na Kwĩka ũndũ Ĩkwasya
19Manyai ũũ mbaitũ endwa makwa! Kĩla mũndũ nĩwaĩlĩte kwĩthĩawa eyũmbanĩtye kwĩthukĩĩsya, na ate wa mĩtũkĩ kũneena, na ndaĩlĩte kũthataa na mĩtũkĩ. 20Mũndũ mũthatu ndatonya kwĩka kĩla kĩmwendeeasya Ngai. 21Kwoou tianai vyũ na maũndũ onthe mathũku na mwĩkalo mũthũku, ũla ũendee kwa wingĩ. Ĩnyivyei kwa Ngai na mũyĩtĩkĩla ndeto yake ĩla ũvandĩte nthĩnĩ wenyu, ĩla nĩyo yĩ na ũtonyi wa kũmũtangĩĩa.
22Mũikekenge kana mwaĩlĩte o kwĩthukĩĩasya ndeto ya Ngai kwĩ kw'oka; no nginya mũkekaa ũndũ ĩkwasya. 23Mũndũ ũla wĩthukĩĩasya ndeto ya Ngai na ndekaa ũndũ ĩkwasya, avw'ana o ta mũndũ ũkwĩsisya kĩoonĩ. 24#Ĩsa 40.6-8 Nĩwĩsiasya akona ũndũ ũilyĩ na aithi, ĩndĩ ayũlĩlwa o vau ũndũ woona ailyĩ. 25Ĩndĩ mũndũ ũla ũsiasya kĩ-nthĩnĩ kya mwĩao mwĩthĩanu, ũla nĩw'o ũetae ũthasyo kwa andũ, na aiendeea kũsũanĩa ĩũlũ waw'o, mũndũ ũsu ethĩwa ndekaa o kwĩthukĩĩsya na ayũlwa, ĩndĩ nĩwĩkaa ũndũ mwĩao ũsu ũkwasya, akaathimwa mũno nĩ Ngai maũndũnĩ make onthe.
26Ethĩwa ve mũndũ wĩw'aa ta Mũklĩsto mũseo, nake ndeũsũvĩa mũneenele wake, mũndũ ũsu eĩkenga mwene na Ũklĩsto wake nĩ wa mana. 27Ũklĩsto ũla Ngai Asa wonaa wĩ mũseo vyũ na wa w'o nĩw'o ũũ: Kũtethya syana ndiwa na aka ndiwa mathĩnanĩ moo, na mũndũ kwĩsũvĩa ndakalike maũndũnĩ mathũku.
BIBLE SOCIETY OF KENYA © 2011