Aev 4
4
Ngwatanĩo ya Aĩkĩĩi Nthĩnĩ wa Klĩsto
1Nyie Vaũlo, ũla novetwe yela nũndũ wa kũmũthũkũma Mwĩai, nĩngũmwĩsũva nĩ kana mwĩthĩwe na mwĩkalo ũendanĩtye na wĩtano ũla Ngai wamwĩtie naw'o. 2#Akol 3.12-13 Ĩkalaai mwĩ na wĩnyivyo mwingĩ na ũuu. Ĩthĩawai na wũmĩĩsyo na mũyũmĩanĩasya ũmwe kwa ũla ũngĩ kwa wendo. 3Tataai ũndũ vatonyeka kwĩkalany'a na ngwatanĩo ĩla mũnengetwe nĩ Veva Mũtheu, na o ta ũu kwĩkalany'a na mũuo ũmwe kwa ũla ũngĩ. 4Aĩkĩĩi onthe nĩ mwĩĩ ũmwe, Veva Mũtheu no ũmwe, na wĩkwatyo ũla mwanengiwe nĩ Ngai yĩla wamwĩtie o naw'o no ũmwe. 5Mwĩai o nake no ũmwe, mũĩkĩĩo o naw'o no ũmwe, ũvatiso nĩ ũmwe, na o ta ũu o nake Ngai no ũmwe, ũla nĩwe 6Ĩthe wa andũ onthe, na wĩ ĩũlũ wa onthe, ũla ũthũkũmaa kwĩsĩla kwa onthe e nthĩnĩ wa onthe. 7Kĩla ũmwe waitũ nũkwatĩte mũthĩnzĩo wa mwanya, kwĩanana na ũndũ Klĩsto ũnenganĩte. 8#Sav 68.18 O tondũ Maandĩko matheu maĩtye,
“Yĩla wambatie ĩũlũ mũno ĩtunĩ,
nĩwambatie na andũ aingĩ ala watavĩte,
na anenga andũ mĩthĩnzĩo.”
9Nayu kwasya, “Nĩwambatie ĩũlũ,” nĩ kwasya ata? Nĩ kwasya kana ambie kũtheea alika kũndũ kũliku na ku nthĩ. 10Ũsu ũla waendie kũndũ kũliku na ku nthĩ, nowe ũla wambatie athi ĩũlũ wa matu onthe, nĩ kana kĩla vandũ matunĩ vausũwe nĩ vinya wake. 11Mĩthĩnzĩo ĩsu wanenganie yaĩ ya amwe methĩwe me atũmwa, angĩ methĩwe me athani, angĩ methĩwe me anyaĩĩkya ma Ũvoo Mũseo, angĩ methĩwe me aĩthi ma ĩkanisa, na o ta ũu angĩ mayĩthĩwa me amanyĩsya ma Ũvoo mũseo. 12Eekie ũu nĩ kana ombany'e aĩkĩĩi kwondũ wa ũthũkũmi wa ĩkanisa, nĩ kana mwĩĩ wa Klĩsto wakwe. 13Ũthũkũmi waendeea, tũkavikĩa kwĩthĩwa na ngwatanĩo ya mũĩkĩĩo ũmwe maũndũnĩ ma kũmũmanya Mwana wa Ngai, na tũitw'ĩka andũ aima na kwĩana tũvikĩe wĩanĩu wa mwĩkalo wa Klĩsto. 14Kwa nzĩa ĩsu tũikethĩwa twĩ syana ĩngĩ, tũyangangw'a kũũ na kũũ na momanyĩsyo ma ũvũngũ nĩ andũ nzeleke, mausũĩtwe nĩ ũvũngũ na ũkengani wa kwasya andũ. 15Ĩndĩ twaneena ũla w'o nthĩnĩ wa wendo, no nginya twĩane maũndũnĩ onthe tũvikĩe wĩanĩu wa mwĩkalo wa Klĩsto ũla nĩwe mũtwe wa ĩkanisa. 16#Akol 2.19 Ungu wa ũtongoi wa Klĩsto, mwĩĩ w'onthe nũtũngĩanĩawa na kũkwatanw'a vamwe nĩ kĩla lenyũ waw'o. Ethĩwa kĩla mutha ũkatethya wĩa waw'o nesa, ũkatuma mwĩĩ w'onthe wĩana na kwĩyaka w'o mwene nthĩnĩ wa wendo.
Thayũ Mweũ Nthĩnĩ wa Klĩsto
17Kwoou ĩndĩ nĩngũmũtavya na kũmũkany'a kana mũyaĩlĩte kũendeea na kwĩkala ta Andũ-ma-mbaĩ-ingĩ, ala mosũanĩo moo nĩ ma mana, 18na masũanĩaa mothũku. Andũ ma mũthemba ũsu mai na thayũ wa w'o ũla Ngai ũnenganae, nũndũ nĩ atumanu na nĩ ang'endu. 19Nĩ andũ mate nthoni o na vanini, na matongoeaw'a nĩ mawendi ma mwĩĩ na kwĩka maũndũ onthe mathũku matekwĩanĩwa.
20Ũu ti w'o mweemanyĩisye ĩũlũ wa Klĩsto! 21Kwa w'o nĩmwĩw'ĩte ũvoo ĩũlũ wake, na mũkamanyĩw'a ũw'o ũla wĩ nthĩnĩ wa Yesũ. 22#Akol 3.9 Ekanai na mwĩkalo wenyu wa tene, ũla wusũĩtwe na ũkathũkw'a nĩ ĩtomo na mawendi. 23Ĩthĩwai mwĩ athasye ilĩkonĩ syenyu, 24#Mwa 1.26; Akol 3.10 na mũyĩkalaa thayũ mweũ ũla wumaa kwa Ngai, naw'o nĩ wa ũlũngalu na ũtheu.
25 #
Nzek 8.16
Kwoou kĩla ũmwe nĩaekane na ũvũngũ, na mũineenaa ũw'o ũmwe kwa ũla ũngĩ, nĩkwĩthĩwa tũilyĩ ta mamutha ma mwĩĩ ũmwe. 26#Sav 4.4 Thataai, ĩndĩ mũikekae naĩ, na mũiketĩkĩlae syũa yĩthũe mũthatĩte. 27Mũikanenge Satani kamwanya o na kanini. 28Mũndũ ũla wũyaa nĩaekane na mwĩkalo wa kwĩthĩwa e kĩng'ei, na ayambĩĩa kũtethya wĩa nĩ kana akwate syĩndũ syake mwene, na kwĩthĩwa atonya kũtethya ala mate na kĩndũ. 29Mũikaneenae ndeto nthũku; neenaai o ila nzeo sya kwaka mathayũ ma ala angĩ kwĩanana na mavata ala me namo, nĩ kana kĩla mũũneena kĩmeke nesa ala meũmwĩthukĩĩsya. 30Mũikew'ĩthye Veva Mũtheu wa Ngai woo, ũla nĩwe ũvano mweekĩiwe nĩ Ngai kwonany'a kana mwĩ ma Ngai, na mweteelete kũkwata ũtangĩĩo mũthenya wa mũthya. 31Ekai kwĩthĩwa mwĩ na ũthatu, kwĩw'anĩa woo, kũneenanĩa naĩ, kũumangana, kana kũmenana na kũvũthany'a ũmwe kwa ũla ũngĩ. 32#Akol 3.13 Ĩkalaai mũyĩw'anĩa tei, mũyũmĩanĩasya na kũekeanĩa o tondũ Ngai wamũekeie naĩ kwĩsĩla kwa Klĩsto.
BIBLE SOCIETY OF KENYA © 2011