Aev 3
3
Wĩa ũla Vaũlo Watethasya kwa Andũ-ma-mbaĩ-ingĩ
1Kĩĩ nĩkyo kĩtumi nyie Vaũlo novetwe kwondũ wa kũmũthũkũma Klĩsto, na o ta ũu kwondũ wa kũmũthũkũma inyw'ĩ Andũ-ma-mbaĩ-ingĩ. 2Nĩ wĩkwatyo wakwa kana nĩmwĩw'ĩte ĩũlũ wa ũthũkũmi wa mwanya, ũla Ngai ũnengete kwa mumo wake nĩmũthũkũme inyw'ĩ. 3Ngai nĩwambuanĩisye mũvango wake wa kĩmbithĩ, na nĩw'o nĩandĩkĩte ĩũlũ wa w'o kwa ũkuvĩ. 4#Akol 1.26-27 Mwasoma valũa ũũ mũkeethĩwa mũtonya kũmanya kĩmbithĩ ĩũlũ wa Klĩsto, 5kĩla kĩtaamanyĩthw'a andũ ma nzyawa o na yĩva, ũndũ yu kĩvuanĩtw'e nĩ Veva Mũtheu kwa atheu ma Ngai atũmwa na athani. 6Kĩmbithĩ kĩu nĩ kana kwa nzĩa ya Ũvoo Mũseo wa Yesũ Klĩsto, Andũ-ma-mbaĩ-ingĩ ala aĩkĩĩi, nĩmakwataa moathimo kuma kwa Ngai vamwe na Ayuti ala aĩkĩĩi; onthe me vamwe nĩ mwĩĩ ũmwe, na makakwata kĩla Ngai wathĩte aĩkĩĩi kwĩsĩla kwa Yesũ Klĩsto.
7Natw'ĩkĩthiw'e mũthũkũmi wa Ũvoo ũũ Mũseo kwa mumo wa Ngai, ũla nĩ mũthĩnzĩo Ngai wanengie kwa vinya wake mũnene. 8O na kau nyie ndi nguma katĩ wa aĩkĩĩi ala angĩ onthe, Ngai nĩwanengie mumo ũsu wa kũtavany'a Ũvoo Mũseo wa syĩmbithĩ sya Klĩsto kwa Andũ-ma-mbaĩ-ingĩ. 9O ta ũu Ngai nĩwanengie kũvuanĩsya andũ mamanye ũndũ mũvango ũũ wa kĩmbithĩ ũkeanĩĩaw'a, ũla ũtwĩe ũvithanĩtw'e kwa ĩvinda yĩasa nthĩnĩ wa Ngai ũla woombie syĩndũ syonthe. 10Ngai eekie ũu nĩ kana kwĩsĩla kwa ĩkanisa, yĩla nĩyo andũ make, ũĩ wake ũmanyĩke kwa nzĩa syĩ kĩvathũkany'o nĩ monene na mokũmũ ala masumbĩkĩte yayayanĩ. 11Ũu weekĩkie kwĩanana na mũvango wa Ngai wa kuma tene, ũla weanĩie kwĩsĩla vala ve Klĩsto Yesũ Mwĩai waitũ. 12Nthĩnĩ wa Klĩsto Yesũ na kwĩsĩla kwake, twĩ na ũthasyo wa kũthi vala ve Ngai tũte na nzika. 13Kwoou nĩngũmwĩsũva mũikakw'e ngoo, nũndũ wa kwona mathĩna ala ngũthĩna kwondũ wenyu; onthe nĩ kwondũ wa ũunĩko wenyu.
Vaũlo Aivoyea Aĩkĩĩi ma Eveso
14Kwa kĩtumi kĩu, ndulasya ndu na kũvoya Ngai ĩthe waitũ, 15ũla woombie syĩndũ syonthe ila syĩ ĩtunĩ na ila syĩ kũũ ĩũlũ wa nthĩ. 16Nĩvoyaa nĩ kana kuma ũthwiinĩ wake wusĩe ũkumyo, Ngai amũnenge kwĩsĩla vala ve Veva Mũtheu vinya nthĩnĩ wa mathayũ menyu, 17nĩ kana Klĩsto ekalae nthĩnĩ wa mathayũ menyu kwa mũĩkĩĩo. O ta ũu nĩnĩvoyaa nĩ kana mwĩthĩwe mwĩ alũmu na mũtathingithĩka nthĩnĩ wa wendo wake, 18na inyw'ĩ o vamwe na aĩkĩĩi ala angĩ onthe, mũyĩthĩwa mwĩ na ũtonyi wa kũmanya kana wendo wa Klĩsto nĩ mũnene mũno vyũ. 19Nĩvo ĩndĩ mũkamanya ĩũlũ wa wendo ũsu wa Klĩsto o na kau ndũmanyĩka vyũ nĩ mũndũ, na mũyĩkalaa nthĩnĩ wa wĩanĩu wa Ngai w'onthe.
20Kwake ũsu, ũla kwĩsĩla vinyanĩ wake ũla ũtethasya wĩa nthĩnĩ waitũ, na wĩna ũtonyi wa kwĩka maũndũ manene kwĩ ala tũvoyaa kana kũsũanĩa, 21nĩkwĩthĩwe ũkumyo nthĩnĩ wa ĩkanisa, na nthĩnĩ wa Klĩsto Yesũ ĩvinda yonthe kũvika tene na tene! Ameni.
BIBLE SOCIETY OF KENYA © 2011