Nda 3
3
Mũsumbĩ Nevukatinesa Ayĩaa Andũ onthe Mathaithe Mũvw'anano
1Mũsumbĩ Nevukatinesa nĩwaseũvisye mũvw'anano wa thaavu wĩ na ũasa wa mita mĩongo ĩlĩ na mũonza, na ũthanthau wa ta mita itatũ. Nĩwaũũngamisye ũiĩnĩ wa Ndula ũla wĩ kĩsionĩ kya Mbavilonĩ. 2Nĩvo ĩndĩ Nevukatinesa weeaie andũ aa mombane vamwe: Anini make, anini moo, makavana, asili, aii ma kĩnandũ, atai, asilany'a na asumbĩki onthe ma isio sya nthĩ yake. Asu onthe meetĩtwe nĩ kana moke kwambĩlĩĩlya ũthaithi wa mũvw'anano ũla Nevukatinesa waseũvĩtye. 3Kwoou anini make, anini moo, makavana, atai, aii ma kĩnandũ, andũ ma kumya ũtw'ĩo, asili na atongoi ma isio moombanĩie vala Nevukatinesa waũngamĩtye mũvw'anano ũsu, nĩ kana mambĩlĩĩlye kũũthaitha, na maũngama mbee waw'o. 4Nĩvo ĩndĩ mũndũ ũla watavanasya maũndũ waneenie na wasya mũnene asya atĩĩ, “Inyw'ĩ andũ ma nthĩ syonthe, mbaĩ na ithyomo syonthe mwĩĩaĩwa kana 5mwamina kwĩw'a wasya wa soo, mũtũlilũ, ngitaa nini, kĩnanda, ngitaa nene, mĩtũlilũ ya mũthemba ũngĩ na wathi wa kĩla mũthemba, no nginya mũkome nthĩ mũthaithe mũvw'anano wa thaavu ũla Mũsumbĩ Nevukatinesa ũũngamĩtye. 6Mũndũ ũla ũkũlea kũkoma nthĩ aũthaithe, nũkwĩkw'a ĩikonĩ yĩ mwaki wakanĩte mũno.” 7Yĩla andũ meewie wasya wa soo, mũtũlilũ, ngitaa nini, kĩnanda, ngitaa nene na mĩtũlilũ ya mũthemba ũngĩ na wathi wa kĩla mũthemba, andũ ma kĩla nthĩ, mbaĩ na kĩthyomo nĩmakomie nthĩ mathaithe mũvw'anano wa thaavu ũla Nevukatinesa waũngamĩtye.
Anyanyae ma Ndanieli Maisikatwa nũndũ wa kwĩthĩwa mate Ewi
8Nĩvo ĩndĩ andũ amwe ma Mbavilonĩ makwatie mwanya wa kũsikata Ayuti. 9Nĩmaneenie na Mũsumbĩ Nevukatinesa mamwĩa atĩĩ, “We mũsumbĩ ĩkala thayũ tene na tene! 10We mũsumbĩ nũminĩte kumya mwĩao kana kĩla mũndũ eew'a wasya wa soo, mũtũlilũ, ngitaa nini, kĩnanda, ngitaa nene na mĩtũlilũ ya mũthemba o na wĩva na wathi wa kĩla mũthemba, no nginya makome nthĩ na kũthaitha ũla mũvw'anano wa thaavu. 11Ũla ũkũlea kũkoma nthĩ aũthaithe nĩwĩaĩte kana aĩlĩte kwĩkw'a ĩikonĩ yĩ mwaki wakanĩte mũno. 12Ve Ayuti ũnanyuvie maũngamĩe maũndũ ma kĩsio kya Mbavilonĩ. Ayuti asu nĩ Satalaki, Mesaki na Avetineko. We mũsumbĩ, andũ asu nĩmaleete ũkwĩw'a. Maithũkũmaa ngai syaku kana kũthaitha ũla mũvw'anano wa thaavu ũnaũngamisye.”
13Yĩla mũsumbĩ weewie ũu, nĩwathatie mũno na eeyĩaa Satalaki, Mesaki na Avetineko maetwe. Kwoou aũme asu nĩmaetiwe mbee wa mũsumbĩ. 14Nevukatinesa nĩwaneenie namo amea atĩĩ, “Satalaki, Mesaki na Avetineko, nĩmũkũlya atĩĩ, nĩw'o kana nĩmũleaa kũthũkũma ngai syakwa, o na kũlea kũthaitha mũvw'anano wa thaavu ũla nĩnaũngamisye? 15Yu mweew'a wasya wa soo, mũtũlilũ, ngitaa nini, kĩnanda, ngitaa nene na mĩtũlilũ ya mũthemba ũngĩ na wathi wa kĩla mũthemba, ethĩwa nĩmũkwĩtĩkĩla kũkoma nthĩ mũthaithe mũvw'anano ũla nĩnaseũvisye nũseo, ĩndĩ mwalea kũthaitha mũvw'anano ũsu, kwa mĩtũkĩ nĩmũkwĩkw'a ĩikonĩ ya mwaki wakanĩte mũno. Mwĩsũanĩa kana ve ngai ĩkũmwovosya kuma vala nĩĩ?”
16Satalaki, Mesaki na Avetineko nĩmasũngĩie mũsumbĩ mamwĩa atĩĩ, “Mũnene waitũ mũsumbĩ, tũi na kĩtumi kya ũkũsũngĩa ũndũnĩ ũũ. 17Ethĩwa ũu nũkwĩkĩka, Ngai waitũ ũla tũthũkũmaa e na ũtonyi wa kũtwovosya kuma ĩikonĩ ya mwaki wakanĩte mũno; nũkũtũtangĩĩa kuma ũtonyinĩ waku we mũsumbĩ. 18Ĩndĩ o na alea kwĩka ũu, we mũsumbĩ manya nesa kana tũithũkũma ngai syaku, na tũithaitha mũvw'anano waku wa thaavu ũla ũnaũngamisye.”
Anyanyae Atatũ ma Ndanieli Maitw'ĩĩwa Kũawa
19Nevukatinesa nĩwathatie mũno na ũthyũ wake waalyũka nĩ woo nũndũ wa Satalaki, Mesaki na Avetineko. Nĩweeaie yĩla ĩiko yĩvyũvw'e mavinda mũonza mbee wa ũndũ yeethĩawa yĩvyũvĩte. 20Nĩweeaĩie aũme amwe ngũmbaũ katĩ wa asikalĩ make move Satalaki, Mesaki na Avetineko na maimekya yĩla ĩikonĩ yakanĩte mwaki mũno. 21Kwoou nĩmooviwe mekĩĩte makanzũ moo, makoti moo, masuka moo, na ngũa ingĩ syoo na mekw'a yĩla ĩikonĩ yaĩ mwaki wakanĩte mũno. 22Nũndũ wa kwĩthĩwa mwĩao wa mũsumbĩ waĩ na vinya, na mwaki ũsu waĩ mũvyũ mũno, mũĩ syaw'o nĩsyavĩvisye aũme ala mekisye Satalaki, Mesaki na Avetineko makw'a. 23Satalaki, Mesaki na Avetineko nĩmavalũkile mwakinĩ ũsu wakanĩte mũno me ove.
24Nĩvo ĩndĩ Mũsumbĩ Nevukatinesa aseng'ete mũno wookĩlile mĩtũkĩ na akũlya atai make atĩĩ, “Tũinekya andũ atatũ me ove mwakinĩ wakanĩte?”
Nĩmasũngĩie mamwĩa, “Ĩĩ, mũsumbĩ nĩw'o.” 25Nĩwameie atĩĩ, “Mbona nĩona andũ ana mate ove makinyĩle mwakinĩ katĩ? Andũ asu o na ti avye na mũndũ wa kana ailyĩ ta mwana wa i ngai.”
Ala Aũme Atatũ Mailekw'a na Kũnengwa Wĩa Mũnene
26Nĩvo ĩndĩ Nevukatinesa waendie vakuvĩ na mũomo wa yĩla ĩiko yaĩ na mwaki wakanĩte mũno na asya atĩĩ, “Satalaki, Mesaki na Avetineko, athũkũmi ma Ngai Ũla wĩ Ĩũlũ Mũno, umai na mũyũka vaa!” Satalaki, Mesaki na Avetineko nĩmaumie ũla mwakinĩ. 27Anini ma mũsumbĩ, anini moo na makavana vamwe na atai ala angĩ ma mũsumbĩ nĩmoombanĩie vamwe, na moona kana aũme asu atatũ mayaavĩvw'a nĩ ũla mwaki. Nzw'ĩĩ sya mĩtwe yoo iyaavya, makanzũ moo mayaavya o na mayaĩ na mũuke wa syũki nongi.
28Mũsumbĩ Nevukatinesa nĩwaneenie asya atĩĩ, “Nĩataĩwe Ngai wa Satalaki, Mesaki na Avetineko, ũla ũtũmie mũlaĩka wake na atangĩĩa athũkũmi make ala mamũthũkũmaa na kũmwĩkwatya. Aũme aa nĩmaleile kwĩw'a mĩao yakwa na malikya mathayũ moo mũisyonĩ, vandũ va kũthũkũma na kũthaitha ngai ĩngĩ o na yĩva ate o Ngai woo. 29Kwoou yu nĩngumya mwĩao ũũ: Mũndũ wa nthĩ, mbaĩ kana kĩthyomo o na kĩva ũla ũkũneena ũndũ o na wĩva ũũleana na Ngai wa Satalaki, Mesaki na Avetineko, no nginya atilangwe ilungu na nyũmba yake ĩiomboangwa ĩtw'ĩke kĩvumbu. Vai ngai ĩngĩ ĩtonya kũtangĩĩa ũu.” 30Ĩtina wa ũu mũsumbĩ nĩwanenevisye Satalaki, Mesaki na Avetineko kĩsionĩ kĩu kya Mbavilonĩ.
BIBLE SOCIETY OF KENYA © 2011