2Sam 17
17
Usiai Ainenga Avisalomu Ũtao Ũtaĩlĩte
1Ĩtina wa ĩvinda ĩkuvĩ, Aithoveli nĩweeie Avisalomu atĩĩ, “Eka nĩnyuve aũme ngili ĩkũmi na ilĩ, na ũmũnthĩ ũtukũ nĩngũatĩĩa Ndeviti. 2Nĩngũthi nĩmũvithũkĩe yĩla ũkwĩthĩwa anoete na ate na vinya. Nũkũtelema, na aũme make onthe nĩmeũsemba makĩe. Nĩũaa mũsumbĩ e weka, 3na ĩndĩ ngĩtũnga aũme make onthe kũla ũĩ, o tondũ mũndũ mũka ũsyokaa kwa mũũme wake.#17.3 o tondũ mũndũ mũka ũsyokaa kwa mũũme wake: Kĩthyomo kya Kĩevelania kyaĩtye ta kũsyoka kwa andũ onthe, nĩ ũndũ ũmwe na mũndũ ũla ũũmantha. Nũndũ wĩenda kũaa o mũndũ ũmwe, andũ ala angĩ onthe nĩmeĩthĩwa me ũsũvĩonĩ.” 4Avisalomu na atongoi onthe ma Ĩsilaeli, nĩmoonie mũvango ũsu wĩ mũseo.
5Nĩvo ĩndĩ Avisalomu waisye atĩĩ, “Endai mwĩte Usiai o nake twĩw'e ũndũ ũkwasya.” 6Yĩla Usiai wavikie, Avisalomu nĩwamwĩie atĩĩ, “Ũũ nĩw'o ũtao ũla Aithoveli watũnenga. Wĩona twaĩlĩte kwĩka ũu watũtavya?” Ethĩwa ti ũu tũtavye woni waku. 7Usiai amũsũngĩa amwĩa atĩĩ, “Ũtao ũla Aithoveli wakũnenga ti mũseo kwa ĩvinda yĩĩ.” 8Nĩwaendeeie kũneena amwĩa atĩĩ, “We nowĩsĩ kana ĩthe waku Ndeviti, na aũme make nĩmokitaa na kĩthito, me na woo mwingĩ ta nduva nga yavenwa tũswii. Ĩthe waku nĩ mũsikalĩ wĩsĩ kũkita na ndekalanasya na aũme make ũtukũ. 9Yu Ndeviti evithĩte ngunganĩ kana vandũ vangĩ. Yĩla ũkuma vo avithũkĩe asikalĩ maku na ayũaa amwe, mũndũ o na wĩva ũla ũkũmanya easya, ‘Asikalĩ ma Avisalomu nĩmoaiwe aingĩ mũno.’ 10Nĩvo ĩndĩ o na mũsikalĩ ũla ngũmbaũ ata; ũte w'ĩa ta mũnyambũ wĩkĩa, nũndũ andũ onthe ma Ĩsilaeli nĩmesĩ kana ĩthe waku nĩ mũsikalĩ wĩ nguma, na aũme make nĩmokitaa na kĩthito. 11Ũtao wakwa nĩ, enda ũkombany'e andũ ma Ĩsilaeli onthe kuma Ndani ngalĩko ya ĩũlũ, kũthi kũvika Mbeeli-sieva ngalĩko ya ĩtheo, methĩwe me aingĩ ta kĩthangathĩ kĩla kĩ ũtee wa ũkanga, na kũmatongoesya we mwene kũthi kaũnĩ. 12Nĩtũũmantha vala Ndeviti ũĩ, na kũmũvithũkĩa atanamba kũmanya kĩla kĩendee. E vamwe na aũme make, vai ũmwe evonoka. 13Ethĩwa nũkũlika ndũanĩ, nĩvo andũ ma Ĩsilaeli onthe makaete makanda ndũanĩ ĩsu, na kũmĩkusya ĩlike mwandanĩ, nginya wĩthĩe vai kĩsio kyayo kĩtonya kwoneka.”
14Avisalomu na andũ onthe ma Ĩsilaeli nĩmaisye atĩĩ, “Ũtao wa Usiai nĩw'o mũseo kwĩ wa Aithoveli.” Mwĩai Ngai nũvangie kana ũtao wa Aithoveli nĩ mũseo, ĩndĩ ndwĩatĩĩwa nĩ kana Avisalomu akwatwe nĩ mathĩna.
Ndeviti Aikĩa ĩtina wa Kũtavw'a Mũvango wa Avisalomu
15Usiai nĩwatavisye mũthembi Nzatoki na mũthembi Aviathali ũtao ũla wanengete Avisalomu, na atongoi ma andũ ma Ĩsilaeli, na o ta ũu nĩwamatavisye ũtao ũla Aithoveli o nake wanenganĩte. 16Nĩvo ĩndĩ wameie atĩĩ, “Tũmanai kũla kwĩ Ndeviti mĩtũkĩ akewe ndakakomele weũnĩ vala ũsĩ ũingĩlawa, ĩndĩ nĩainge Ũsĩ wa Yolotani na mĩtũkĩ, nĩ kana we vamwe na aũme make maikakwatwe na kũawa.”
17Yonathani na Aimaasi meeteelete me Eni-lokeli. Mũthũkũmi wa mũndũ mũka nĩwakothaa kũthi kũmatavya maũndũ ala maendee, namo maithi kũtavya Mũsumbĩ Ndeviti, nĩkwĩthĩwa mayaaĩlĩte kwoneka mailika Yelũsalemu. 18Ĩndĩ mũthenya ũmwe nĩmoonekie nĩ kamwana, na kathi kũtavya Avisalomu. Kwoou nĩmaendie mekalaatĩte mathi kwĩvitha Mbaulimu nyũmba kwa mũndũ. Mũndũ ũsu aĩ na kĩthima vakuvĩ na nyũmba yake. Nĩmatheeie mathi kũlika kĩthimanĩ kĩu. 19Kĩveti kya mũndũ ũsu nĩkyoosie kĩndũ kyakunĩka kĩthima kĩu, na kyeta ngetha ya mbaa mbeke yanyaĩĩkĩa kĩndũnĩ kĩu. Vai mũndũ waĩ atonya kũmanya kana vaĩ andũ nthĩnĩ. 20Yĩla aũme ma Avisalomu mookie mũsyĩ kwa kĩveti kĩu nĩmakĩkũlilye atĩĩ, “Aimaasi na Yonathani maĩva?”
Nakyo kyamasũngĩa kyamea, “Nĩmaingie kalũsĩ mathi.”
Aũme asu nĩmamanthanie namo, ĩndĩ mayaamona, na kwoou masyoka Yelũsalemu. 21Aũme asu mamina kũthi, Yonathani na Aimaasi nĩmaumie kĩthimanĩ, na mathi kũtavya Mũsũmbĩ Ndeviti. Nĩmamwĩie atĩĩ, “Ũkĩla ũinge ũsĩ mĩtũkĩ, nĩkwĩthĩwa Aithoveli nũnengete Avisalomu ũtao mũthũku ĩũlũ waku.” 22Kwoou Ndeviti na aũme make nĩmambĩĩie kũinga Ũsĩ wa Yolotani, na kĩoko kũikya onthe maĩ manamina kũinga.
23Yĩla Aithoveli woonie kana ũtao wake ndũnaatĩĩwa, nĩwailĩĩile matandĩko ĩng'oinĩ yake, na aumaala athi mũsyĩ kwake ndũanĩ ya mũsyĩ. Nĩweeyĩaie nesa ĩũlũ wa maũndũ ma mũsyĩ wake, na eesũsya. Nĩwakwie na athikwa vala andũ ma mũsyĩ wake mathikawa.
24Ndeviti aĩ anavika ndũanĩ ya Maanaimu yĩla Avisalomu na andũ ma Ĩsilaeli maingie Ũsĩ wa Yolotani. 25Avisalomu nĩwanyuvĩte Amasa ethĩwe mũtongoi wa asikalĩ vandũ va Yoavu. Amasa aĩ mwana wa mũndũ weetawa Ithala, waĩ Mũĩsumaeli ũla watwaĩte Avikaili mwĩĩtu wa Naasu, na mwĩĩtu-a-inyia wa Nzeluia inyia wa Yoavu. 26Avisalomu na andũ ma Ĩsilaeli nĩmambie maeema nthĩ ya Ngileati.
27Yĩla Ndeviti wavikie ndũanĩ ya Maanaimu, nĩwakomanie na Sovi mwana wa Naasu kuma ndũanĩ ya Lava ĩla yĩ nthĩ ya Aamimoni. O ta ũu Ndeviti nĩwakomanie na Makili mwana wa Amieli kuma Londevali, na Mbalisilai kuma Lokelimu nthĩ ya Ngileati. 28Nĩmaeteie Ndeviti ngũa sya kĩtanda, masaani, na syĩndũ iseũvĩtw'e na yũmba. O ta ũu nĩmaetie nganũ, na nganũ yĩtawa mbaale, mũtu, ngetha mbĩvye ya mbaa mbeke, mboso, ndengũ, 29ũkĩ wa nzũkĩ, mauta ma ĩia, malondu na mauta ma ng'ombe. Syĩndũ isu syaĩ sya Ndeviti na aũme make sya kũya. Andũ asu mamaeteie nĩmamanyie kana Ndeviti na aũme make maĩ na nzaa, waũni, na maĩ ma mĩnoo mingĩ me weũnĩ.
BIBLE SOCIETY OF KENYA © 2011