2Sam 16
16
Ndeviti na Nziva
1 #
2Sam 9.9-10
Ndeviti amina kũvĩtũka kĩĩma na kũthi mũendo mũnini, nĩwakomanie na Nziva mũthũkũmi wa Mevivosethi, e na mang'oi elĩ malanĩtw'e matandĩko. Mang'oi asu makuĩte mĩkate maana elĩ, itũngo ĩana sya nzavivũ mbovu, na itũngo ĩana sya matunda ala mew'aa ĩvinda ya syũa, na kĩkuu kĩseũvĩtw'e na kĩthuma kĩkĩĩtwe ndivai kĩkausũa. 2Mũsumbĩ Ndeviti nĩwamũkũlilye atĩĩ, “Syĩndũ ii syonthe waete nĩ syakĩ?”
Nziva amũsũngĩa, “Mang'oi nĩmaũkũkuaa we mũsumbĩ na andũ ma mũsyĩ waku, na matunda na mĩkate nĩ sya kũĩwa nĩ aũme, nayo ndivai nĩyo ya kũnyw'a yĩla manoa me weũnĩ.”
3 #
2Sam 19.26-27
Mũsumbĩ amũkũlya atĩĩ, “Aĩva Mevivosethi mwĩsũkũũe wa mũnene waku Saũlo?”
Nziva amũsũngĩa, “E Yelũsalemu, nũndũ esũanĩa kana andũ ma Ĩsilaeli meenda kũmũtũngĩa ũsumbĩ wa ĩthe wake Saũlo.”
4Mũsumbĩ eea Nziva atĩĩ, “Syĩndũ syonthe ila syaĩ sya Mevivosethi nĩ syaku.”
Nziva amũsũngĩa, “Nyie nĩ mũthũkũmi waku. Nĩenda ũkwendeeasya ĩvinda yonthe we mũnene wakwa mũsumbĩ!”
Simei Ayĩuma Ndeviti
5Yĩla Mũsumbĩ Ndeviti wavikie Mbaulimu, mũndũ ũmwe kuma mũsyĩ wa Saũlo weetawa Simei mwana wa Ngela, nĩwamũthaũie amũumangĩte. 6Nĩwambĩĩie kũkimanga Ndeviti na anini make onthe na mavia, o na vala Ndeviti nĩwathyũlũlũkĩtwe nĩ andũ onthe vamwe na andũ maĩ ngũmbaũ. 7Nĩwaumangie Ndeviti aimwĩa atĩĩ, “Umaala! Umaala! Mũaani! Kĩng'endilĩ! 8Mwĩai Ngai nũkũkũĩvanĩsya kwondũ wa andũ ala wũaĩte ma mũsyĩ wa Saũlo, na ũkosa ũsumbĩ wake. Mwĩai Ngai nũnenganĩte ũsumbĩ waku kũla kwĩ mwana waku Avisalomu. Yu ũendee kwanangĩka, nũndũ wĩ mũaani!”
9Nĩvo ĩndĩ Avisai mwana wa Nzeluia wakũlilye mũsumbĩ atĩĩ, “Mũsumbĩ, mũndũ ũũ wa mana ta ngitĩ ngw'ũ ekũumanga nĩkĩ? Nĩngũkwĩsũva, eka nĩthi vo nĩmũtile mũtwe!”
10Ĩndĩ mũsumbĩ nĩweeie Avisai na mwana-a-inyia Yoavu atĩĩ, “Ũsu ti wĩa wenyu. Ethĩwa enumanga nũndũ Mwĩai Ngai nĩwamwĩa eke ũu, nũũ ũla ũtonya ũmũkũlya eĩka ũu nĩkĩ?” 11O ta ũu Ndeviti nĩweeie Avisai na anini make onthe atĩĩ, “Mwana wakwa mbene nũkwenda kũmbũaa; kwoou mwĩseng'wa nĩ mũndũ ũũ wa mbaĩ ya Mbengyameni nĩkĩ? Mwĩai Ngai amwĩie anumange, kwoou ekanai nake eke ũu. 12Mwĩai Ngai nũtonya kwona thĩna wakwa na kũngathima vandũ va nĩkwatwe nĩ kĩumo.” 13Kwoou Ndeviti na aũme make nĩmaendeeie na kyalo mesĩlĩte nzĩanĩ. Simei nĩwamaatĩĩie esĩlĩte nguumo wa kĩĩma; nĩwaumanganĩte na nĩwamakimangaa na mavia na kũmekĩsya mũthanga maendete. 14Mũsumbĩ e vamwe na andũ ala waĩ namo nĩmavikie kũla maendete me na mĩnoo mingĩ. Me vau mũsumbĩ nĩwathũmũie.
Avisalomu e Yelũsalemu
15Avisalomu na andũ onthe ma Ĩsilaeli nĩmalikile Yelũsalemu, na Aithoveli aĩ vamwe namo. 16Nĩvo ĩndĩ Usiai mũnyanyae wa Ndeviti waendie vala ve Avisalomu na amwĩa atĩĩ, “Mũsumbĩ ĩkala thayũ tene na tene! Mũsumbĩ ĩkala thayũ tene na tene!”
17Avisalomu akũlya Usiai atĩĩ, “Ũũ nĩw'o wendo ũla ũkwony'a mũnyanyau Ndeviti? Ũleile kũendany'a nake nĩkĩ?”
18Usiai amũsũngĩa, “Ndonya ata kwĩka ũu? Nyie nĩ ngalĩkonĩ ya ũla ũnyuvĩtwe nĩ Mwĩai Ngai, na nĩ andũ aa onthe, na andũ ma Ĩsilaeli onthe. Kwoou nĩĩkalany'a naku. 19Ũu wĩ o vo, naĩlĩte kũthũkũma ũũ, ethĩwa ti mwana wa mũnene wakwa? O tondũ nathũkũmie ĩthe waku, now'o yu ngũũthũkũma.”
20Nĩvo ĩndĩ Avisalomu wakũlilye Aithoveli atĩĩ, “Tũtavye ũndũ twaĩlĩte kwĩka. Wĩona twaĩlĩte kwĩka ata?”
21Aithoveli amũsũngĩa, “Enda ũkamanyane kĩ-mwĩĩ na iveti sya ndũsyo sya ĩthe waku, ila itiĩtwe isũvĩae nyũmba ya kĩ-ũsumbĩ. Nĩvo ĩndĩ andũ onthe ma Ĩsilaeli meũmanya kana ĩthe waku akwosaa ta wĩ mũmaitha wake, na o ta ũu aatĩĩi maku meĩthĩwa makwata vinya.” 22#2Sam 12.11-12 Kwoou nĩmambĩie Avisalomu ĩeema kĩalanĩ kya nyũmba ya kĩ-ũsumbĩ, nake athi kũmanyana kĩ-mwĩĩ na iveti sya ndũsyo sya ĩthe wake andũ onthe mene.
23Ĩvindanĩ yĩu ũtao o na wĩva ũla Aithoveli wanenganae nĩweetĩkĩlawa ta w'o ndeto ya Ngai; Ndeviti e na Avisalomu nĩmaũatĩĩaa.
BIBLE SOCIETY OF KENYA © 2011