1Sam 3
3
Mwĩai Ngai Aimwĩta Samũeli
1Kamwana Samũeli nĩkathũkũmaa Mwĩai Ngai katongoew'e nĩ Eli. Ĩvindanĩ yĩu, motũmani kuma kwa Mwĩai Ngai maĩ mwoo na kũyeethĩawa na woni kaingĩ. 2Ũtukũ ũmwe Eli, ũla waĩ anambĩĩa ũkũa ũkethĩa ndekwona nesa, nĩwakomete kasũmbanĩ kake. 3Samũeli nake nĩwakomete Ĩkalũnĩ vala Ĩsandũkũ ya Ũtianĩo ya Mwĩai Ngai yaiĩtwe. Kũtanamba kũkya, taa wa Mwĩai Ngai o ũendee na kwakana, 4Mwĩai Ngai nĩweetie Samũeli. Samũeli nĩwasũngĩie asya atĩĩ, “Ninyioo!” 5Nĩwasembie athi vala ve Eli na amwĩa, “Nĩwambĩta, na ninyioo.”
Ĩndĩ Eli amũsũngĩa amwĩa, “Ndinakwĩta syoka ũkome.” Kwoou Samũeli nĩwasyokie akoma.
6Mwĩai Ngai nĩweetanie ĩngĩ, “Samũeli!” Samũeli nĩwaamũkie athi vala ve Eli na amwĩa, “Nĩwambĩta, na ninyioo.”
Eli nĩwamũsũngĩie amwĩa, “Mwana wakwa, ndinakwĩta, syoka ũkome.”
7Samũeli ndaĩ anamba kũmanya kana eĩtwa nĩ Mwĩai Ngai, nũndũ Mwĩai Ngai ndaĩ aaneena nake vau mbeenĩ.
8Mwĩai Ngai nĩweetie Samũeli ĩvinda ya katatũ; Samũeli nĩwaamũkie athi vala ve Eli na amwĩa, “Nĩwambĩta, na ninyioo.”
Nĩvo ĩndĩ Eli wamanyie kana Mwĩai Ngai nĩwe weetaa kamwana Samũeli. 9Kwoou eea Samũeli atĩĩ, “Syoka ũkakome; na weew'a aikwĩta ĩngĩ sũngĩa wasye, ‘Mwĩai Ngai neena nũndũ mũthũkũmi waku nũkwĩw'a.’ ” Kwoou Samũeli nĩwasyokie akakome.
10Mwĩai Ngai nĩwookie aũngama vau na eetana o ũndũ weekĩte vau mbeenĩ ayasya, “Samũeli! Samũeli!”
Nĩvo ĩndĩ Samũeli wasũngĩie asya, “Neena, nũndũ mũthũkũmi waku nũkwĩw'a.”
11Mwĩai Ngai nĩwamwĩie atĩĩ, “Nĩngilĩlye kwĩka andũ ma Ĩsilaeli ũndũ wĩ w'ĩa mũno, wĩse kwĩthĩa mũndũ o na wĩva ũla ũkũwĩw'a nũkũtelema. 12Mũthenyanĩ ũsu, ngeeka Eli mothũku onthe ala nĩneenete ĩũlũ wa andũ ma mũsyĩ wake, kuma ũndũ ũla wa mbee nginya ũla wa mũthya. 13Nĩnĩminĩte kũmũtavya kana ngakany'a andũ ma mũsyĩ wake ĩvindanĩ yonthe yĩla yũkĩte, nũndũ ana make nĩmaneenete ndeto nthũku ĩũlũ wakwa. Eli nũweesĩ kana ana make nĩmekwĩka ũu ĩndĩ alea kũmasiĩĩa. 14Kwoou ĩndĩ nĩngwĩvĩta kwa andũ ma mũsyĩ wa Eli kana vai nthembo yumĩtw'e kwa kũvĩvw'a kana nthembo ĩngĩ o na yĩva ĩkethwa ĩtonya kũveta ĩvĩtyo yoo.”
15Samũeli nĩwakomie nginya kwakya. Nĩvo ĩndĩ wookĩlile na avingũa mĩomo ya nyũmba ya Mwĩai Ngai. Nĩwakĩaa kũtavya Eli ĩũlũ wa woni ũsu. 16Eli nĩwamwĩtie ayasya, “Samũeli mwana wakwa!”
Nake Samũeli asũngĩa asya, “Ninyioo.”
17Eli nĩwamũkũlilye atĩĩ, “Mwĩai Ngai akwĩie ata? Ndũkatate kũmbitha kĩndũ. Mwĩai Ngai nũkũũkany'a na ũkany'o mũthũku mũno, walea kũndavya maũndũ onthe ala ũkũtavisye.” 18Kwoou Samũeli nĩwamũtavisye maũndũ onthe; ndaamũvitha ũndũ o na ũmwe. Eli nĩwaneenie asya, “Nũndũ nĩwe Mwĩai Ngai, nĩeke ũndũ ũla ũkwona wĩ ũseo.”
19Samũeli aendee kwĩana, Mwĩai Ngai aĩ vamwe nake, na atuma maũndũ onthe ala Samũeli waneenete mekĩka. 20Kwoou andũ onthe ma Ĩsilaeli, kuma kĩsionĩ kya nthĩ ya mbaĩ ya Ndani kĩla kĩ ngalĩko ya ĩũlũ, kũthi kũvika Mbeeli-sieva ĩla yĩ ngalĩko ya ĩtheo, nĩmamanyie kana kwa w'o Samũeli nĩ mwathani wa Mwĩai Ngai. 21Mwĩai Ngai nĩwaendeeie kumĩla kũu Silo, na vau aendeea kwĩvuany'a kũla kwĩ Samũeli kwĩsĩla ndetonĩ yake.
BIBLE SOCIETY OF KENYA © 2011