1Sam 2
2
Mboya ya Ana
1 #
Lk 1.46-55
Nĩvo ĩndĩ Ana wavoyie ayasya:
“Mwĩai Ngai nĩwusũĩtye ngoo yakwa na ũtanu,
nĩna ũtanu mwingĩ nũndũ wa ũndũ ũmbĩkĩte!
Nĩngũthekeea amaitha makwa,
nĩna ũtanu nũndũ Ngai nũndethetye!
2“Vai o na ũmwe mũtheu ta Mwĩai Ngai,
vai ũngĩ ũilyĩ take,
vai ũtonya kũsũvĩa ta Ngai waitũ.
3Ekai kwĩkathĩĩa,
ekanai na ndeto syenyu sya mĩkathĩĩo,
nũndũ Mwĩai Ngai nĩ Ngai ũla wĩsĩ,
na nũsilĩlaa maũndũ onthe ala andũ mekaa.
4Nũtũlangaa mbũta sya ngũmbaũ,
ĩndĩ ala onzu nĩmameasya vinya.
5Andũ ala ĩvindanĩ yĩmwe maĩsaa makavũna,
yu meĩthoosya mathũkũme nĩ kana manengwe lĩu,
ĩndĩ ala maĩ na nzaa, yu nĩmavũny'e.
Kĩveti kĩla kyaĩ ngũngũ, yu nĩkĩsyaĩte syana mũonza,
ĩndĩ nyinyia wa syana mbingĩ, yu nũtiĩtwe ate kamwe.
6Mwĩai Ngai nĩwũaa na akathayũũkya,
nũtumaa andũ mathi vala maveva ma ala akw'ũ mekalaa,
na kũmatũnga thayũ ĩngĩ.
7Nũtumaa amwe methĩwa me ngya na angĩ me athwii,
amwe nũmanyivasya na angĩ aimanenevya.
8Nĩwũkĩlasya ngya kuma kĩtoonĩ,
nĩwũkĩlasya athĩni kuma thĩnanĩ woo;
nũmatw'ĩkĩthasya anyanyae ma anene,
na nũtumaa mekala kũndũ kwa ndaĩa.
Ituĩ sya nthĩ nĩ sya Mwĩai Ngai
na ailĩĩle nthĩ ĩũlũ wasyo.
9“Nũsũvĩaa mathayũ ma andũ make ala aĩkĩĩku,
ĩndĩ ala athũku makavindĩthĩw'a kĩvindunĩ;
mũndũ ndakwataa ũsindi na vinya wake mwene.
10Amaitha ma Mwĩai Ngai makaminwa,
akamatundumĩa e ĩtunĩ.
Mwĩai Ngai akasilĩla nthĩ yonthe;
akanenga mũsumbĩ wake vinya,
na akatuma mũsumbĩ wake ũla ũnyuvĩte ethĩwa na ũsindi.”
11Elikana nĩwasyokie mũsyĩ kwake Lama, ĩndĩ kavĩsĩ Samũeli nĩkatiiwe Silo na kathũkũmaa Mwĩai Ngai katongoew'e nĩ Mũthembi Eli.
Ana ma Eli
12Ana ma Eli maĩ athe mũno. Mayanengae Mwĩai Ngai ndaĩa, 13o na mayaatĩĩaa motw'ĩo ĩũlũ wa kĩla athembi maaĩlĩte kwĩtya kuma andũnĩ. Vandũ va kwĩka ũu, mũndũ o na wĩva aumya nthembo, mũthũkũmi wa mũthembi nĩwookaa akuĩte kĩndũ kya kũtonya nyama kĩna mĩthya ĩtatũ. Nyama iendee na kũtheũkw'a, 14nĩwalikasya kĩndũ kĩu kya kũtonya nyama mbisũnĩ ĩla ĩkũua; nyama o na yĩva ĩla kĩndũ kĩu kyaumaa kĩtonyete nĩyatw'ĩkaa ya mũthembi. Andũ onthe ma Ĩsilaeli ala mookaa kumya nthembo kũu Silo meekawa ũu. 15Ĩndĩ o na mathunya matanamba kũvĩvw'a, mũthũkũmi wa mũthembi nĩwookaa na ayĩa mũndũ ũla ũkumya nthembo atĩĩ, “Nenga mũthembi nyama ĩmwe akavĩvye, mũthembi ndeĩtĩkĩla nyama ya kũtheũkw'a kuma vala ũĩ ĩndĩ eenda nyama mbĩthĩ.”
16Ethĩwa mũndũ ũsu ũkumya nthembo nĩwasũngĩa mũthũkũmi wa mũthembi amwĩa atĩĩ, “Eka mathunya mambe kũvya vyũ, na ĩndĩ ũyosa kĩla ũkwenda,” Mũthũkũmi ũsu nĩwasũngĩaa akasya atĩĩ, “Aiee, ete nyama ĩsu oyu! Ethĩwa ti ũu nĩngũmyosa na vinya!”
17Naĩ ĩsu ya ana ma Eli yaĩ nthũku mũno vyũ methonĩ ma Mwĩai Ngai, nũndũ nĩmavũthasya nthembo ya Mwĩai Ngai.
Samũeli e Silo
18Ĩvindanĩ yĩu, kavĩsĩ Samũeli nĩkathũkũmaa Mwĩai Ngai kekĩĩte ngũa ya ĩũlũ yĩtawa evoti ĩtumĩtwe na ndii nzeo ndũmu. 19Kĩla mwaka, inyia wa Samũeli nĩwamũtumĩaa ngũa nini ndaasa na aimũtwaĩa yĩla waendany'a na mũũme wake kumya nthembo ya kĩla mwaka. 20Eli nĩwaathimaa Elikana na mũka wake ayasya atĩĩ, “Mwĩai Ngai nĩakũnenge syana ingĩ kuma kwa mũndũ mũka ũũ, nĩ kana syose mwanya wa kana kaa mwavathie kwondũ wa Mwĩai Ngai.”
Ĩtina wa ũu, nĩmenũkaa mũsyĩ kwoo.
21Mwĩai Ngai nĩwaathimie Ana na amũnenga syana; ana atatũ, na eĩtu elĩ. Kamwana Samũeli nĩkeanie kaendee na kũthũkũma Mwĩai Ngai.
Eli na Ana Make
22Ĩvindanĩ yĩu Eli aĩ mũkũũ mũno. Nĩwaendeeie kwĩw'a maũndũ onthe ala ana make meekaa andũ ma Ĩsilaeli. O ta ũu nĩweewie kana ana asu nĩmamanyanaa kĩ-mwĩĩ na aka ala mathũkũmaa mũvĩanĩ wa Ĩeema ĩtheu ya kũkomanĩa na Mwĩai Ngai. 23Kwoou nĩwaneenie na ana make amea atĩĩ, “Mwĩĩka maũndũ aa nĩkĩ? Andũ onthe mendavya ĩũlũ wa mothũku ala mũkwĩka. 24Ana makwa, ekai kwĩka ũu! Ũndũ ũũ andũ ma Mwĩai Ngai meũweta nĩ mũthũku. 25Ethĩwa mũndũ nĩwavĩtĩsya ũngĩ, mũndũ nũtonya kũthi kũla kwĩ Mwĩai Ngai akesũvanĩe ũla ũvĩtĩtye. Ĩndĩ ethĩwa mũndũ nĩwavĩtĩsya Mwĩai Ngai, nũũ ũtonya kũthi kũmwĩsũvanĩa?”
Ĩndĩ ana asu mayaaĩthukĩĩsya ũkany'o wa ĩthe woo, nũndũ Mwĩai Ngai nĩwavangĩte kũmoaa.
26 #
Lk 2.52
Kamwana Samũeli nĩkaendeeie kwĩana kendetwe nĩ Mwĩai Ngai o vamwe na andũ.
Wathani Mũthũku ĩũlũ wa Mũsyĩ wa Eli
27Mwathani ũmwe nĩwaendie kũla kwĩ Eli na amwĩa atĩĩ, “Mwĩai Ngai easya: ‘Nyie nĩneevuanisye kũla kwĩ Alũni ũmae waku, yĩla e na andũ ma mũsyĩ wake makwatĩtwe ũkombo nĩ mũsumbĩ wa nthĩ ya Misili. 28#Kuma 28.1-4; Ali 7.35-36 Kuma mbaĩnĩ syonthe sya andũ ma Ĩsilaeli nĩnanyuvie andũ ma mũsyĩ wake methĩwe athembi makwa nĩ kana mathũkũmae kĩthembeonĩ, mavĩvasye ũvani, na mayĩkĩa ĩla ngũa ya ĩũlũ yĩtawa evoti maneene nakwa. O ta ũu nĩnamanengie mwanya wa kwosaa nthembo ila ivĩvĩaw'a kĩthembeonĩ. 29Yu ĩndĩ nĩkĩ mwĩ na ĩtomo nthembonĩ syakwa sya kũvĩvw'a na ila ingĩ nendaa numĩw'e nĩ andũ makwa? We Eli, nĩ kyaũ kĩũtuma ũnenga ana maku ndaĩa mbee wakwa, kwa kũmaeka methĩwe me anou nũndũ wa kũya ilungu ila nzeo sya nthembo syonthe, ila andũ makwa mambumĩasya?’ 30Nyie Mwĩai Ngai, Ngai wa Ĩsilaeli nĩnathanie ĩvindanĩ ĩvĩtũku kana andũ ma mũsyĩ waku na mbaĩ yaku, nĩmo makathũkũmaa ta athembi ĩvindanĩ yonthe. Ĩndĩ yu nĩngwasya kana nĩnakola ũu vyũ! Vandũ va ũu, nganengae ndaĩa ala manengae ndaĩa, na ala mambũthasya ngamavũthasya. 31Ĩthukĩĩsye, ĩvinda nĩyũkĩte yĩla nyie ngoaa anake onthe ma mũika mũsyĩnĩ waku na mbaĩnĩ yaku, wĩthĩe vaikethĩwa mũtumĩa katĩ wa aũme ma mũsyĩ waku. 32Ũkeethĩawa wĩ mũvũavũanu na ũkeew'ĩaa ala angĩ kĩwĩu, nũndũ wa moathimo maingĩ ala nĩnenga andũ ma Ĩsilaeli, ĩndĩ vaikethĩwa mũtumĩa o na ũmwe katĩ wa aũme ma mũsyĩ waku. 33Ĩndĩ ũu wĩ o vo, ngatialya ũmwe wa nzyawa syaku aendee kwĩkala thayũ, nake ainthũkũmaa ta mũthembi. Ĩndĩ nake akatw'ĩka kĩlalinda na ayĩthĩwa ate na wĩkwatyo. Nzyawa ila ingĩ syaku syonthe ikakw'a kĩkw'ũ kya mathĩna. 34#1Sam 4.11 Yĩla ana maku elĩ Ovini na Vineasi mekw'a mũthenyanĩ o ũmwe, ũsu ũkeethĩwa wonany'o kana maũndũ onthe ala naneena makeanĩa. 35Nganyuva mũthembi ũla wĩĩthĩwa e mũĩkĩĩku kwakwa, na ayĩkaa maũndũ onthe ala ngwenda eke. Ngamũnenga nzyawa, ila syĩthũkũmaa ĩvindanĩ yonthe yĩla yũkĩte, syĩ mbee wa mũsumbĩ ũla nĩnyuva. 36Nĩvo ĩndĩ kĩla ũmwe wa andũ ma mũsyĩ waku ũla wĩtiala wĩendaa mbee wa mũthembi ũsu na aimwĩsũva amũnenge mbesa, kana lĩu, na ayĩa mũthembi ũsu atĩĩ, ‘Mwa nĩngũkwĩsũva ũndikye wĩanĩ ũmwe wa mawĩa ma athembi, nĩ kana nĩthĩwe nongi ngwata kĩndũ nĩya.’ ”
BIBLE SOCIETY OF KENYA © 2011