Kururu Owu-apọkọ 4
4
Jeruselemu Anị Ḅẹ Ḅịkị Ḅọrọ Tẹrẹmẹ Sime Ḅara
1Ndẹẹ golu mẹ ḅo ḅutuḅutu tẹ ḅara,
ndẹẹ karakara golu mẹ ḍima ḅara!
Fịafịa aḍụḅarị ma gala-gala mu etela
goyegoye sịḅị ḅụ sara wararị.
2Zayọnị ḅẹ ḅụụ ḅụ yela owiapụ-awọmẹ ma,
karakara golu iku na gbẹẹya apụ ma,
tọ-ḅara kẹ ini ịn kẹ aram-ḅẹlẹ tọnma kịẹn-arị,
ḅẹlẹ tẹmẹḅọ aḅara ḅẹ kọrịnama!
3Jakalị nwẹn-sịn obiri kịkarị piri-ḅio-ḅẹ nama ḅe sọ ndo pịrịarị,
tẹ ndo kẹ ịna awọmẹ pịrịarị,
kụma ị̀ atomi ma ẹrẹḅọtụḅọ ḅo guda-guda ḅara sime tẹẹ,
ịkpa ḅio okpo ma sime-ḅara.
4Minji pọkọ-tarị ḅụ ịn ḍikiḍikiarị awọmẹ ma ḅẹlẹ
samụnọ tẹ ịna ḅịḅị oḅolom;
awọmẹ ma sisi tẹkẹ tẹ fịye ḅiim,
kụma gbọrụḅọ-sọ fịye kẹ in pịrị-a.
5Inima tẹ iḅi afịaị kẹ alalị fị apụ ma,
etela ma ḅụ fịị-faa tẹẹ;
inima tẹ ịn ḅụụ-ḅẹlẹma ḅara kẹ ḍikiḍiki pakama-ḅo apụ ma,
fọọn-fọọn-fọọn sara ọgọnọ ḅụ ḅọlọlọ tẹẹ.
6 #
Suk 19.24
Gbala ị̀ atomi ma ẹrẹḅọtụḅọ ma fomu-ḅara mẹ
ḍụḅa Sọdọmụ tẹ gbọrụ sakị ngẹrị ḅụ fa ye mẹ
fomu-ḅara nẹngị tẹ ẹrẹsị,
ḅara kẹ anị ọgọnọ gbana jụmọ ofori.
7Árị amadapụ owiapụ-awọmẹ ma ịn kịọnkịọn eene-mgbọlị nẹngịm,
ịn pịna-pịna ndo-minji nẹngịm;
ịna oju-kiri minimini kịlalị nẹngịm,
ịna sime-ḅara ḅẹ iḅi ḅụ ịn safaya nwẹn-sịn ḍụḅarị mẹ iḅi ḅara iḅim.
8Mịọkụ ịna tọrụkuḅu kurukuru orumapamba nẹngị tẹ,
etela-ogbo ḅụ kịnị ḅarị ịn lekiri-a;
ịna oju-apara mu ịna mgbe ma oḅolo tẹ
anị samụnọ ḅo tọnọ-fịnị ḅịya ḅara ḅịya tẹ.
9Okologie fịị kọn apụ ma ḅioḅẹlẹ
inima tẹ fịye pọkọ-tarị tẹ
ịn ḍụọ mẹ ḅio ḅẹ sịnmgbọlụ kẹ
pịrị fị-a, tẹ ḅuru-pọkọtarị ḅụ fịị apụ ma nẹngịm.
10 #
Dit 28.57; Izi 5.10 Ḍiki-ḅụụjịrị nyana kịnị pịrịarị ereme,
ini ḅarana iyi awọmẹ kẹ ḅẹlẹ ḅio sụa sọọm
ini ḅo ịna fịye sọm
ị̀ atomi ma ẹrẹḅọtụḅọ ma fịị mẹ ḅụ.
11KỊNỊNYANAḄỌ ḅe ọ̀ kụrọ ịganị ịḅụkụ mẹ finji koromam,
ori ori ọfịrị ịganị mẹ sara pakamam;
Tẹ ọ̀ Zayọnị ḅụ fịnị kẹngẹma saram,
aniemẹ tẹ anị ḅẹ sukutarị-ḍụḅarị dọkịma ye mẹ.
12Tomikiri mẹ ḅe amadapụ ma,
anịanịa ḅẹḅọ-ḅẹḅọ tẹ tomikiri mẹ angarị apụ ma ḅụ minini ḅọ ofori,
mịnẹ, ọmụḅọ, anịanịa kịnị-na-fịya-a ḅọ,
inetẹ Jeruselemu ḅẹ ogigo-aḅọkọ ma ḅio sọ-mu ḅa.
13Miemẹ anie árị ịkịankoroapụ asi ma na,
árị agbamịẹapụ amịẹ-irima ma na gotẹ,
inima tẹ árị ogboku ḅụ,
karakaraye-mịẹapụ ḅaa apụ ma.
14Etela ma ḅụ ịn tọrụngbọ pụụn ḅara kẹ mẹnjị ikele-ikelem,
ọmbie gbọrụ sịḅị ịn pilema fama wararị,
tẹ gbọrụḅọ-sọ inetẹ ḅara kẹ ịna opu akapa lama ḅịa.
15“Ó soo! Ọmịnị fịafịa-a apụ,” tomi ọkọ oloku ịn pịrịm
Ó soo! Ó soo! Ọ́ ḅara kẹ wa lama ma!
Mie ḅụ ịn ḅo karakara nimi-a apụ na, ikele-ikelema
ḅọrọarị apụ na sọm;
opu asịẹ ma ogbo-ḅio ḅụ tomi ḅẹm,
“Ịn ḅarị jen-maaịn kẹ Wamịnị na gboloma tẹ anga ḅịa.”
16KỊNỊNYANAḄỌ ḅe ḅioju ḅarana ịn gala-galama tẹ,
ọ̀ ḅarị jen-maaịn kẹ ịn kẹ ye-sịn ḅịa
ọ̀ ḅarị kụn nyana agbamịẹapụ ma pịrị-a,
ọ̀ ḅarị tọrụ-ḅẹlẹ nyana omongiapụ ma pịrị-a.
17Wa ḅarasụa gotẹ papaa ḍiki-ḍiki-siḅiya,
wamịna atọrụngbọ kọrị-kọrịm,
wamịna ḍiki mẹ, opu sịẹ tẹ kịnị ḅọrọma ḅịa sịẹ,
mie wa ḍiki ye.
18Tomi wamịna mẹnjị-aḅụọ sọ ẹbịm
anie mịẹ tẹ wamịna etela ḅụ sọ wa inetẹ mẹnjị-a;
wamịna kunoma-a sọma kpekim;
wamịna ene ma kịẹn-ḅịḅị kịsịm
gbala wamịna kunoma-a ḅo la tẹ ẹrẹsị.
19Wa ḍukarị apụ ma,
sarama mangị So-tọrụ fiin-arị igo nẹngịm;
ini tụndụ ma ọgọnọ ḅụ wa ḍukam,
tẹ ḅo ịkpa mẹ ḅio sime wa korum.
20Wamịna anini ḅẹ ọwụ mẹ,
KỊNỊNYANAḄỌ ḅe sẹlẹ ọkị tẹ ye mẹ,
ịna aḍịẹịn ḅio ini anị kun ọkịm,
oriḅe tẹ wa ḅẹẹm,
“Ò suku-ḅio ḅụ wa opu asịẹ ma ogbo-ḅio,
ḍumo-sime ḅa ḅẹ ḅọ ḅe.”
21Ḍereku tẹ ḅioḅẹlẹẹ, yei Idọmụ ḅe ẹrẹḅọtụḅọ,
Uzu nwẹn-sịn ama mẹ ḅụ angarị ḅọ;
kụma ị́yẹrị sọ iru sụa ḅuu ye mẹ ḅọrọ ḅo ị́ la ḅa,
í ḅuu tọrụ-ḅaama tẹ ị́ ḅụụ paụma sara ḅa.
22Yei kpọma-ḅẹlẹmarị Jeruselemu,
ị́ mịẹ-irima mẹ ḅẹ fomu-ḅara mẹ í fomu tẹẹ;
ọ̀ ḅarị jen-maaịn kẹ ị́ kẹ omoni sọma kun ḅara-ḅio suu ḅịa.
Kụma yei Idọmụ ḅẹ ẹrẹḅọtụḅọ,
ị́ mịẹ-irima mẹ, ori anị fomu ḅa,
ori ị́ asi ma kẹ ama ḍie ḅa.
(C) The Bible Society of Nigeria