Kururu Owu-apọkọ 3
3
Fomu-ḅara Na, Si Ḅụ Pịkị Na, Ḅiokpọ Na
1Yẹrị anie tomḅọ tẹ tọrụngbọ kẹ ḅụụ-fụka ẹrị tẹ ḅọ
ọ̀ kụrọ ịganị mẹ ḅẹ fomuye suku-ḅio ḅụ.
2Ori ì dee tẹ ì ọkị-ḅo bele kalịye sọ
ofori kanakana ḅio suu tẹ;
3tẹ ọkụrụkụrụ nyana-a ḅara kẹ mgbụlụḅa kẹ ị̀ ḅakụ, pịkị siin ị̀ ḅakụm.
4Ọ̀ mịẹ tẹ ì oju meni na, ì oju apara na gulugulu fa tẹẹ,
tẹ ị̀ mgbe ma anyị tẹẹ.
5Ori ikelema-koro tẹ owu kẹ ị̀ pakam,
tẹ akụ na, ḅụụ-fụka na kẹ ị̀ gbaịn-kpịtịpụma tẹ
6Ori ị̀ mịẹ tẹ à kanakana ḅio angarị, fịị ḅọrọtẹ apụ ma angarị kanakana mẹ sime-ḅara.
7Ori onu gbori ì ikelema tẹẹ,
arị inetẹ mangị-so ḅịa ḅara;
ori iku-ikutẹ ikoli kẹ ị̀ sụa tẹẹ.
8Arị owu tẹ ḅarasụa sịnm ḅẹsọ,
ori ị̀ tẹkẹ mẹ ịkasị pakamam.
9Ọ̀ pẹlẹ wararị aḍụḅarị kẹ ì etela ma pụnma tẹẹ,
ọ̀ mịẹ tẹ ị̀ ḅụọ mẹnjị kpakụrụtẹ etela ma ḅarị gono-gono-a.
10Ori ị̀ ḅụụ simearị ḅara anie gbala nama ẹbịarị tuu,
ḅụụ kikima wararị ọkụkụ sime-ḅara.
11Ori ì etela ḅụ ị̀ da ḅelema tẹ ị̀ kẹ pakịrị, pakịrị kanị-kọsịmam,
ọ̀ mịẹ tẹ ị̀ tọrụ fa tẹ.
12Ori ori iboli anda tẹ ị̀ kẹ tọrụ-ḅaamam,
ori ọ̀ ḍiein kẹ ị̀ tẹịn ḅarị ḅara.
13Ọ̀ ḍiein sụa igbe ḅio ḅẹ aḍịẹịn ma,
ọ̀ tẹịn-tẹịn ì ḅioḅẹngbọ ḅụ suu tẹẹ.
14À ḅo kịnị-ḍẹrịmaḅọ sọ tomi-kụlọkụlọ mamgba pịrị tẹẹ,
pịkị ene-ḅaaene-ḅaaene ịna gbaịnma kombo anume sịḅị na.
15Ori akụ kẹ ì ḅio ḅụ ḅinma tẹ,
ori akụarị iru na fịye na kẹ ị̀ pịrị furo ḅinma tẹ.
16Ọ̀ mịẹ tẹ ị̀ aka onwimgbọlị tokuru tẹ,
tẹ mịẹ tẹ à fọọn ḅio ḅụụ kikimam.
17Ị̀ ḅala ḅụ í dein ḅaa siin tẹ,
ḅioḅẹlẹ nwẹn-sịn ye à kẹ ḅioḅọrọma tẹ.
18Yẹrị mẹẹ: Ì ebube mẹ anie so tẹ ye,
pịkị à KỊNỊNYANAḄỌ ḅara nyana ḅẹ ḍikiarị ye sọ.
19Ị̀ ḅụụ-fụka na, ị̀ ikele-ikele na kẹ ḅiokoromaa
pịkị akụarị ịnyịnya mẹ na, akụarị kịnị-ḅa ye mẹ na sọ.
20À sịkọpẹlẹ-a ḅara kẹ anị kẹ ḅiokoromarị,
anị nwẹnị ị̀ tẹmẹ lọkọmarị,
21Kụma miemẹ à nwẹn kẹ ḅiokoromam,
tẹ anị ẹrẹsị à ḅiokpọ nyanam.
22KỊNỊNYANAḄỌ ḅe jike-a ḅẹlẹma mẹ
gbala-gbala daasịẹ-sịẹ-a,
ori ọkụrụkụrụ mẹ gbala-gbala kunoma kunoma-a.
23Dede goyegoye arị ịwọarị,
í nyana minini mẹ gburo-gburo wararị.
24Ị̀ tẹmẹ mẹẹ, “KỊNỊNYANAḄỌ ḅe anie ì ḍiekiri
anịẹrẹsị arị ị̀ ḅiokpọ kẹ ọ̀ ḅụụ wẹrị ḅa.”
25KỊNỊNYANAḄỌ ḅe sime ò koru apụ ḅụụ ori iḅim
ọ̀ ḍọkị ḅala ḅụụ ḅụ
26Anị iḅim mịnẹ tomḅọ dein ḅara kẹ sime
KỊNỊNYANAḄỌ ḅe ḅọrọma mẹ koru
27Anị iḅim mịnẹ tomḅọ mẹ asambịrịma wararị sakị
ikuye mẹ dogi.
28Yee ori ngẹrị ẹkwẹn-a ḅara kẹ lẹgị-sime,
ori anị kẹ ori ọgọnọ gbana sakị.
29Yee ori ọ̀ ḅịḅị kẹ fọọn ḅio ḍiḅi,
anịsọ ḅiokpọ paa paka ḅa.
30Yee oriḅe ori amgba kẹ ḅara finji kịnị amgba ḅọrọ ḅọ ḅe pịrị,
tẹ gọlị ẹkwẹn da ḅinma.
31Kẹ gotẹ ọkọ ḅẹẹarị, KỊNỊNYANAḄỌ ḅe ọ̀ wakị nguma gbamaso ḅịa.
32Kụma, ò kururu pakama sọ,
ọ̀ sịḅị-kụrụkụrụ nyana ḅa,
ò jike-a ḅẹlẹma mẹ wẹrịtẹ ḍụḅa la ḅara ḅụ.
33Gbala ori ọ̀ ḅụụ-ḅẹlẹ ḅara ḅụ tomina awọmẹ
ma ḅụụ fụka ma,
anịanịa in kururuma-a ẹrẹsị.
34Ḅụọ kẹ tomikiri simearị ikoliapụ mamgba
nanga kọsịma mẹ;
35Geletẹịn Ḅọ ḅe tọrọkọ tomḅọ karakara
daa akaka pịrị mẹ;
36Amịna karakara ḅụ simearị tomḅọ etela pịkị-iḅo mẹ
KỊNỊNYANAḄỌ ḅe arị ḍụkụ-a.
37KỊNỊNYANAḄỌ ḅe anị minini sikima,
tụḅọ tọn tẹ anị ḅo pakarị?
38Geletẹịn Ḅọ ḅe ḅịḅị mẹ ḅụ,
mie iḅiye na, siye na ḅoarị ye anị-a?
39Ḍumo wararị tomḅọ tiegotẹ ḅẹrẹ ḍuko sụarị,
tomḅọ nwẹnị mḅọ asi ḅụ ḅẹ fomu-ḅara daarị kụma?
40Ó yee wa wamịna etela ma sọkịrị tẹ arị pekele-ḍiki,
tẹ pịkịma KỊNỊNYANAḄỌ ḅe ḍọkụma-ḅo!
41Ó yee wa wamịna aḅioḅẹngbọ na, wamịna aḅara na,
saakị-gelema So-ḅio Tamụnọ da.
42Wa mịẹ-irima tẹ sịḅị-kụrọma tẹ,
tẹ amụ si-wẹrịso wa pịrị-a.
43Ị́ ịganị kẹ ị́ ḅụụ gbaịn tẹ wa ḍuka tẹ,
tẹ sịḅị-jịrị-a ḅara kẹ wa ḅaarị
44Í kpiti-so kẹ ị́ ḅụụ gbaịn tẹ
mịẹ tẹ gbọrụ tẹkẹ sọ inetẹ tolu-ḅọrọ ḅịa ḅara
45Ị́ wa kẹ sara na, fun na sọma tẹ,
tomi-kụlọkụlọ ma ogboku ḅụ.
46Wamịnị na fịya-a apụ mamgba,
ḅịḅị ḅẹ sọ ye, sọ ye kẹ wa worim.
47Bẹkẹ tẹmẹ-naịn-naịn na, ọkpaị-na-okuro-na,
sima na, guluguluma na ḅo wamịna ọgọnọ gbanam.
48Ị̀ atomi ma ẹrẹḅọtụḅọ ma gotẹ,
owu-minji nwẹnị ị̀ atọrụngbọ ḅụ tọrụkuḅu ḅẹ minji
sara ḅara kẹ sara.
49Owu-minji daasịẹ-a ḅara, sakị ḅọrọma-a ḅara
kẹ ị̀ atọrụngbọ ḅụ sara ḅa;
50Nwenii So-ḅio ḅụ KỊNỊNYANAḄỌ ḅe
ḍiki iderima tẹ ẹrị ḅa.
51Ì opu ama mẹ ḅẹ iriawọ mamgba la ye mẹ ḅụ,
ị̀ atọrụngbọ ị̀ mịẹ tẹ à ḅioḅuarị.
52Inima tẹ ị̀ na fịya-a apụ ma, à mịẹ ye ofori ḅara ḅụ
ḅaa ḅẹ feni ḍuka ḅara kẹ ì ḍuka tẹ.
53Ḍumo tọrụ ḅụ ini ị̀ kẹ wakị olulu mẹ ḅio suum,
tẹ ḍụḅarị amẹẹ kẹ ì gbinm.
54Minji kọpụ ḅo ị̀ sịḅị ḅilemam,
à ḅẹẹm, à fa tẹẹ.
55Olulu mẹ ḅẹ pokolo mẹ ḅụ,
arị ị́ ẹrẹ sịnm, Yei KỊNỊNYANAḄỌ.
56À ḅii ye mẹ ị́ naam,
í ḅeri gbaịn à ḅarasụa gotẹ kọn-arị owu mẹ pịrị ma!
57Àrị ị́ sịn sakị, í ḅo kpekim;
Ị́ ḅẹẹm: Ḅalafa ma!
58Yei KỊNỊNYANAḄỌ, ị́ sịẹ ị̀ pịrị tẹ
ị́ ì ḍumo mẹ pakịrị ọkị tẹ
59Yei KỊNỊNYANAḄỌ, kura-aye tẹ ịn kẹ ị̀ mịẹ ye mẹ ị́ ẹrị tẹẹ,
ị̀ ḅẹrẹ mẹ kọn ị̀ pịrịị.
60Ịna gbẹẹfị mamgba ị́ ẹrị tẹẹ,
ịn ḅiya ị̀ pịrị ḅẹrẹ mamgba sọ.
61Yei KỊNỊNYANAḄỌ, ịna wori-anume ma ị́ naa tẹ,
ịn ḅiya ị̀ pịrị ḅẹrẹ mamgba sọ.
62Ị̀ na fịya-a apụ ma kẹ ene-ḅaaene-ḅaaene
ẹkwẹn-ẹkwẹn tẹ kuroma ị̀ pịrịarị aị ma
63Ịna lẹgị na, ịna saakị-sịẹ na ḍikii,
yẹrị anie ịna anume mẹ ḅẹ sịḅị.
64Yei KỊNỊNYANAḄỌ, ị́yẹrị ịna aḅara ḅẹ kọrịnama
sime-ḅara ḍiki ịn gbẹẹ ḅa.
65Ị́yẹrị yefieye naa-a ḅioḅẹngbọ kẹ ịn pịrị ḅa;
Í wori-nume ịna ọgọnọ gbana ḅa.
66Yei KỊNỊNYANAḄỌ, í so mẹ suku-ḅio ḅụ
ịganị ḅụ in ḍuka tẹ ịn ḅaa ḅa.
(C) The Bible Society of Nigeria