Nimi Tolumaḅọ 11
11
Ịnyọ Kpọmatẹ Tọrụ Kẹ Tọrọkọ Mẹ daa
1Ị́ igbigi kẹ igoniapụ tuḅo ḅụ suu, anịsakị mịna ene ma ḅẹ gbọrụ ene ḅụ ị́ sọye mịẹ ḅa. 2Kịrị-kịrị tọnwa anga ḅụ igbigi kẹ suu wẹrịị — karakara-ḅara-ḅụ tọnwa anga — kẹ gotẹ ọkọ ḅẹẹarị, gbala-gbala í nimi-a mịẹ tomikiri mẹ ḅụ ḅo ị́ la ḅarị si-fụḅara sime-ḅara. 3Kpiti so mẹ ḅụ eene ḅin, ḅin, anị tomikiri mẹ ḅụ sara ḅa; anịsakị gbọrụ opu sịn nwẹnị ḅịkị suku-jụ, anịanịa ọgọnọ-jụ da, daa, opu sịn mẹ ḅịkị-koro anga mẹ ḅụ, mie anị koro-sime ḅarịye. 4Fiearị fẹrụ ḍiki ḅọ ḍiki ḅọ, mḅọ fịye ḍiḅi ḅịa; anịsakị kpiti-so kẹ ye-sịn ḅọ sịn ḅọ, fịye soku ḅịa. 5Ị́ wẹrịtẹ fẹrụ mẹ ḅọrọarị etela mẹ, anịanịa ẹrẹḅọ furo ḅio tụḅọ tẹmẹ paka-ḅoarị ḅara mẹ nimi-a ḅara, mie ị́ pịkị inetẹ Tamụnọ, Ye-mamgba Tẹmẹ Ḅọ ḅe kọrịnama mẹ fiearị ye nimi ḅịa ḅara. 6Dede-ḅio ị́ sịnmgbọlị mẹ ḍiḅi tẹ ḅoḅiri-so ḅụ ḅara kẹ ị́ ḅụọ ogbo suu ma; kẹ gotẹ ọkọ ḅẹẹarị, arị ḅụ lolo ḅẹ ye í nimi-a, ḅọrọ miemẹ-o, anịanịa aniemẹ-o, anịanịa maa asakị ḅẹ aị mamgba ḅọrọ gbọrụ ḅara kẹ iḅi ḅarị ḅoto.
Ị́ Asambịrịma Sakị Ḅụ Tamụnọ Nimii
7Bele iḅim, anịsakị tọrụngbọ ma ịrụa mẹ ẹrị mẹ pịkị ḅụụ ḅẹlẹmam. 8Kẹ gotẹ ọkọ ḅẹẹarị, tomḅọ nwẹnị tọnwa akụra kẹ ḍumo sime-sime, yee mḅọ arịmgba ḅụ ḍereku; kụma yee mḅọ kẹ ḅiokoroma mịnẹ kanakana ene ma tọnwa ene mịẹ ḅa. Ḅo ye ḅo ye mẹmgba sọ anie ḅintẹ ḅara kẹ anị fieye nimi-a ye. 9Yei asambịrịma tomḅọ, ị́ asa sakị ḅụ ḍerekuu, anịsakị yee ị́ asambịrịma sakị mẹ ḅụ í ḅioḅẹngbọ ị́ ḅụụ kuroma ye sọ; í ḅioḅẹngbọ tọn ị́ pịrị etela, etela na, ị́ atọrụngbọ ẹrị ye, ẹrị ye na ḅụ mẹnjịị. Kụma nimi mịnẹ, mịna aị mamgba gotẹ, Tamụnọ ị́ kẹ ḅẹrẹkọn ḅo ḅa. 10Í ḅioḅẹngbọ ḅụ ịganị siin, tẹ í oju ḅụ ye ḅụụ ḅụ akụ saakị siin; kẹ gotẹ ọkọ ḅarị, asambịrịma mẹ na ḍumo ḅụ ḅo omongi sọ mẹ na, arịmgba ḅintẹ ḅara kẹ arị fieye nimi-a aị.
(C) The Bible Society of Nigeria