Nimi Tolumaḅọ 10
10
1Fịtẹ ọmọmọ mịẹ tẹ kụnụ-olo fụrụ ḅara,
mie kala ḅara kẹ oḅori-sọ nimi na kụn na gulugulumarị ḅara.
2Ye-nimi tomḅọ ḅe, ò ḅioḅẹngbọ ọ̀ daa karakaramatẹ ò kuraye mịẹarị;
kụma oḅori tomḅọ ḅe, ò ḅioḅẹngbọ ọ̀ daa irimatẹ ò siye mịẹarị.
3Oḅori tomḅọ etela ogbo mẹnjịarị sọ,
anị ḍie-pakarị mịnẹ ori apantu;
tẹ ọ̀ pịkị ḅẹḅọ-ḅẹḅọ ḍiearị mịnẹ
ori apantu.
4Ḅẹrẹtọnḅọ ịganị ị́ pịrị-pịrị,
í sime-kiri ḅụ saakị so ma;
ị́ yaụ-simem ḅẹḅẹ, anị jen gburo-gburotẹ ịganị dogi-ḅo ḅịa. 5Tomikiri mẹ ḅụ àrị ẹrị gbọrụ siye emi. Anị sime-ḅara gbala ḅẹrẹtọnḅọ ḅe ḅara saakị paka-ḅoarị ye ọkụ: 6ini apantu kẹ kụrọ nyana opu akiri ḅụ koroma tẹ ngọ-kọn wararị ḅọ ḅe ideri kiri ḅụ lẹgị wararị. 7Arị omoniapụ ẹrịm, ini asụ ọgọnọ dọkụarị; anịsakị sịḅịdapụ ma nwẹnị ḅụọ kẹ omoniapụ mẹnjị ḅara mẹnjịarị.
8 #
Dev 7.15; Egb 26.27 Olulu soku ḅọ soku ḅọ, ḅịkị anị ḅio koro ḅa;
anịsakị warị-anga kan tẹ sọ ḅọ, sọ ḅọ
oronwi mḅọ gbọn ḅa.
9Ḍụḅarị pẹlẹ ḅọ mie ḍụḅarị ye kẹ lamarị ḅọ;
anịsakị sịn ḅiri puu ḅọ mie ḍụḅọ ye kẹ lamarị ḅọ.
10Kumbu mẹ kpingbiri tẹ mḅọ anị farị-a ḅẹḅẹ,
mḅọ ịwọ ịnyọ fama ḅa;
kụma nimi ḅarasụa mḅọ pịrị tẹ,
mḅọ mịẹ sọma ḅa.
11Oronwi ọ̀ gbọn ḅẹ ye gbọn tẹrẹmẹ
ò pile ḅẹ ḅọ ò pile-pile,
pile ḅọ ḅe gbọrụ sọye sọ mịẹ-a.
12Ye-nimiḅọ ḅịḅị ḅẹ ẹkwẹn,
ḍiki-ḅụụjịrị ọkị-ḅo ọ̀ pịrịm;
kụma apantu ḅe ḅịḅị-ḅọkọ,
ò sama-mẹnịm.
13Ọ̀ ḅịḅị ḅẹ ẹkwẹn ma Suku-saakị anie nimi-a;
anịsakị ori ẹkwẹn kunoma
anie si-sịḅịḅio nọmụ.
14Oḅori tomḅọ ḅe ẹkwẹn tẹ
pịkị siin ẹkwẹn-ẹkwẹnm;
paka ḅẹ ye nimi ḅọ ofori ḅẹsọ;
anịsakị tụḅọ inetẹ ori ọḅụ gbin
tẹ paka ḅẹ ye ḍuko ọ̀ pịrị ḅẹ
15Oḅori tomḅọ ḅe kọrịnama anie lịlị ḅụụ ḅaa
tẹ ḅarị etela nimi tẹ so ama mu-a.
Kọrịnama Nyana Iḅi
16Sule-ḅịḅị sime ị́ pịrịị, opu sịẹ,
ị́ amadaḅọ kala wararị sakị ḅụ;
tẹ ị́ amadapụ awọmẹ ma
dede kẹ alalị fịarị ḅẹḅẹ.
17Ḅioḅẹlẹ sime í pịrịm, opu sịẹ,
ị́ amadaḅọ ama mẹ ḅio ḅẹ sịḅị nyana
atomi ma ḅẹ tụḅọ;
tẹ ị́ amadapụ awọmẹ ma ịnyọ nyana gotẹ karakara sakị ḅụ alalị fịarị;
tẹ iru ḅuu tọrụ-ḅaama gotẹ fịya-a ḅẹḅẹ!
18Ḅụụ sarasara-a gotẹ warị isun mẹ poom,
anịsakị ḅụụ lọkọ ḅụ warị isun mẹ firim.
19Alalị sime ḅioḅẹlẹ ḍẹrị-ḅịḅị pịrịm;
tẹ iru ḍumo ḅụ ḅioḅẹlẹmam;
anịsakị igbigi ye goyegoye ḅịḅị pakịrịm.
20Í kuroma ḅụ sọ, amadaḅọ ḅe wori ma,
anịanịa ị́ kala-ḅio ḅụ ngọ-kọn ḅọ ḅe wori;
gbala So-tọrụ ḅẹ feni í ḍuko ye dogi-so ḅa,
anịanịa pamba-sụa jaị mu ḅẹrẹ mẹ ḍuko ḅa.
(C) The Bible Society of Nigeria