Xo̱jo̱n Salmoo̱ 5
5
Nga kónná Néná
Só xi katsꞌénda Ndabii̱.
1Ji Ne, ndaꞌyé Ji énna,
kó chꞌi̱e̱ ji xki̱ ni xi si̱e̱n si̱e̱n tsꞌénchji̱a̱ an,
2ji Re ko̱jo Ne xi tsa̱ꞌa̱n,
ti̱ꞌinsénní kjiꞌanga ni̱ma̱ xián án,
ngatꞌa̱ Jí boá xi kuichjiaá.
3Ji Ne, ta̱niꞌin si̱sién, kó ko̱nda̱ꞌyé Ji nda̱na,
nga ta̱jño̱ó kjuín án ngindyikin Ji, kó skoya an.
4Ngatꞌa̱ Ji Ne, tsjajín maá ni xi ndajiín.
Kuíni nga xota̱ xi ndajiín ki̱a̱jín nijan kꞌuíndotꞌaa̱.
5Xota̱ xi nkꞌakoo̱n ka̱májín ki̱a̱ kjo̱chó ngindyikin Ji,
chꞌoóri ngayeje xota̱ xi tsꞌén ni xi ꞌniú ndajiín.
6Jí boá xi niꞌínkjié Ji xota̱ xi ꞌbindísoó,
kó niꞌínchꞌí Ji xota̱ xi tsꞌenkꞌién ini̱ma̱a̱, ko̱jo xi ꞌboṉcha̱a̱.
7Ta̱nga an ki, kꞌosꞌi̱e̱n an Ndiꞌáa̱ ta̱ngatꞌanii̱ kjo̱a̱ni̱ma̱takón jèe̱,
kó nga bendikoón Jí, kosien an tikóna ki̱a̱ xtji̱e̱e̱n na̱ngo̱xi̱ tsjiée̱.
8Ji Ne, tꞌenje̱ní ndi̱ya̱à kjo̱a̱kixìi̱,
kó ta̱ngatꞌanii̱ xota̱ xi kondra̱na,
ti̱ꞌinna̱xe̱ Ji ndi̱yàa̱ xí tikón tji̱e̱e̱n kje̱n án.
9Ngatꞌa̱ jmí kjo̱a̱kixi̱jiín ni xi chji̱a̱ tsꞌoa kui xotaa̱,
ni xi ndajín boá ngayeje ni xi ndyi̱a̱ nga̱ntsꞌo̱a̱,
nga̱tsjò xí tji̱e̱nti̱xa̱ boá na̱xo̱o̱,
kó ta̱soboá ni ndiso boá xi chji̱a̱ na̱je̱n.
10¡Ti̱ꞌinjée̱ Ne! ¡Ti̱kuii ni xi atíxoma xi ngatixóni!
¡Ngachaja ta̱ngatꞌanii̱ nga ꞌniú katsꞌénjé,
ngatꞌa̱ Jí boá xi ndyi̱kjánjo̱o̱!
11Ta̱nga tsjangatamaa̱ ngayeje xota̱ xi Ji ꞌniákoón.
¡Ngatsjéni̱xtjin nga tsjatsꞌèn nga sie, ngatꞌa̱ Jí boá xi ꞌnaxiéꞌé Ji!
¡Ngatsjaá kjo̱a̱tsja Ji, ngayeje xota̱ xi tjoó Jaꞌée̱n!
12Ngatꞌa̱ Ji Ne, Jí boá xi niꞌínchikonñí xota̱ xi kixi̱i̱,
kó kjo̱a̱nda xi tjiín jí foaꞌatjiyajoo̱n kui, xikoó ngo ni xi ꞌbíchjaá ni xi ndajín.
Valgt i Øjeblikket:
Xo̱jo̱n Salmoo̱ 5: MAIX
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014