Loma 3
3
1No manoyong kakman na sang am ikongo peypeypangayan no ka tao do Yotay da kano kayongkad da do kataotao da. 2Yaro peypeypangayan no nang. O ney manma na am na nitoro jira ni Ama ta do to o ciriciring na. 3Tana yamyan jira so yatatasa yaji nganoyong do ciriciring na am cinakongo na. Manngwa, ablisen na pa o nakenakem na ni Ama ta do to? 4Jyabo kakman na sang a. Tana todamimin o tao a mangalalas am jyabo kapangalalas na ni Ama ta do to a. Akman so ciring na do Seysyo. Ta maniring am,
“No mehtaw o ciring mo am yamo pangononongan an. No kapacici da jimo am ji ka nikapatawan.”#3:4 Anwanood 51:4.
5Ala yamyan so tao a manci no, “Apya o keyyan no raraten ta. Ta o raraten ta am ipakateneng da no tao ji Ama ta do to a ji meyraraten a kazwazway da sya. So ikalas na ni Ama ta do to a mapasingsingkad jyaten.” 6Beken a akman sang an. Ta no si malas o kapasingsingkad na jyaten ni Ama ta do to am makongo so wanjin a mapeykapyapinpin so tao do karawan.
7Ala yamyan pa so tao a yamanci no, “Si malas o ciring ko am jyabo kaji da makatenngan jya no tao si Ama ta do to a yajyalas so ciring a. No akman sang am ikongo pasingsingkadan na jyaken ni Ama ta do to.” 8“Ikongo ta jyangai a meyraraten a kapeypapya ta nya.” So da iyan no tao a yamanci no kapeyciring ko so sang, do da karaherahet jyaken. So ikanoyong da no akman sang a tao a peydednan na no oyaoyyan na ni Ama ta do to.
Abo ji meyraraten a tao
9Manngwa, namen apyapya pa tao do Yotay a kano karwan no tao do tangain na ni Ama ta do to? Jyabo kakman na sang a. Nipanci ko na o tao do Yotay a kano beken a tao do Yotay a yameyyangay a yameysaod pa so raraten. 10Akman so ipanci na do Seysyo. Ta maniring am,
“Abwata o yasa ka tao abo so raraten.
11Abwata o yasa ka tao a yamakateneng ji Ama ta do to. Yabo o yasa ka tao a yamakza no na kararalay ni Ama ta do to.
12Yamamimin o tao a yamlikod ji Ama ta do to a yamangay do da peyraratenan. Yabo o yasa ka tao a apya so nakenakem.#3:12 Anwanood 14:13; 53:1-3; Sin Taw Pyan 7:20.
13O ciriciring da am ikarahet no tao. Sya mangononong so yamalas.#3:13 Anwanood 5:9. So na icyakmey mavowaw no ciriciring da a tey manginanawa.#3:13 Anwanood 140:3.
14Ta mamimin a ipangangavay o ciriciring da.#3:14 Anwanood 10:7.
15No meyoyaoya sira am panwakwakan da rana so tao.
16O angayan da nira ori am abo o ji da peyrarehta tao.
17Ji da tenngi o kapya no onowned da do icyatatao da.#3:17 Isayya 59:7-8.
18Ji da anyaheyan o peyoyaoyyan na ni Ama ta do to.”#3:18 Anwanood 36:1.
19O iwawalam na ni Moyse am itoro na ni Ama ta do to do tao do Yotay a pangozayan da. So ikabo no tao do karawan a omalalas do raraten da do tangain na ni Ama ta do to. 20Abo asa ka tao a mangozay do iwawalam na ni Moyse a manoyong a manci no kabo no raraten na do tangain na ni Ama ta do to. Ta o iwawalam na ni Moyse am kapanidong na so tao a makateneng do raraten da.
O ikapya ta do tangain na ni Ama ta do to
21Sicyaikwaya am na rana nipananao jyaten o na kabnek jyaten ni Ama ta do to a abo so raraten do tangain na. Ori rana am beken a iwawalam na ni Moyse, ta monganay do kapeyhanhan ni Yeso Kizisto akman so mina ciring da no panoyonoywan na so ciring ni Ama ta do to. 22Si ipeyhanhan ta si Yeso Kizisto am abneken na rana yaten ni Ama ta do to a abo so raraten do tangain na. So ipeyyangangay na no nang a itoro na do meyhanhan nya tao. 23Ta tanyo mamimin a yameyraraten a yaji makanet so nakenakem do tangain na ni Ama ta do to. 24So na nitovoyan si Yeso Kizisto a yasomidong jyaten a komaro do raraten ta do na karilaw nyaten. So ikanoyong ta na abo so raraten do tangain na ni Ama ta do to. 25Nitovoy na si Yeso Kizisto a mangay mawakwak no raraten ta. So ikanoyong no meyhanhan nya tao a mavonas rana so raraten. O ikakman na sang ni Ama ta do to am ipacita na o kaji na alasan a mapeykapyapinpin so tao. Ta o pangangasyan na am ori o ji na rana mapasingsingkaji do meyhanhan nya tao no kakwa. 26Am sicyaikwa rana ya am na nyahap ni Yeso Kizisto o raraten no tao. So ikanoyong da no meyhanhan nya tao a mavonas rana so raraten ji Ama ta do to a kabnek na sira a abo so raraten do tangain na. Ori na ikatey yapya no na ahahapan sya ni Ama ta do to.
27Am ikongo ipakazwazway ta. Jyabo a. O ko pancyan no nang am beken a ta kahap so iwawalam na ni Moyse o yata ikapya do tangain na ni Ama ta do to. Ta yaomagaz do yata kapeyhanhan ni Yeso Kizisto. 28O ikabo no raraten no tao do tangain ni Ama ta do to am meykasaha. Ori rana am ipeyhanhan si Yeso Kizisto. So ikabeken a kahap ta so iwawalam na ni Moyse. 29Jyabo ka tao do Yotay no mapeytao do to si Ama ta do to a. Ta Tao do to da no beken a tao do Yotay. So na ikanoyong no nang. 30Yasa si Ama ta do to. O ikapya namen a tao do Yotay do tangain na am akman sang, ta inyo rana beken a tao do Yotay am no si anoyngan nyo si Ama ta do to am akman kamo sang a vonasen na so raraten. 31No akman sang am manngwa, todabo rana o oyowyat na no iwawalam na ni Moyse? Jyabo kakman na sang a. Ta o manoyong a meyhanhan ni Yeso Kizisto a tao am ori o ipanci a manoyong a mangononong do iwawalam na ni Moyse.
Valgt i Øjeblikket:
Loma 3: snt
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
The Bible Society in Taiwan