- पैलो इतिहास 17
17
दाऊद हों नातान आगमवक्ता कौ संदेसो
1जब दाऊद अपने भवन में रैन लगो, तौ दाऊद ने नातान आगमवक्ता सें कओ, “हेर, मैं तौ देवदार के बने भए घर में रैत आंव, परन्त यहोवा परमेसुर की बाचा कौ संदूक तम्बू में रैत आय।” 2नातान ने दाऊद सें कई, “जौन कछु तोरे हिया में होए ऊहों कर, कायसे यहोवा परमेसुर तोरे संगै आय।”
3ओई रात यहोवा परमेसुर कौ बचन नातान के लिगां पोंचो, “जाकें मोरे दास दाऊद सें कै, 4यहोवा परमेसुर एैसो कैत आय:” “मोरे रैबे के लाने तें घर नें बनवा पाहै।” 5कायसे जी दिना सें मैं इस्राएलियन हों मिस्र सें ल्याओ, आज के दिना लौ मैं कभऊं घर में नईं रओ; परन्त एक तम्बू सें दूसरे तम्बू हों और एक निवास सें दूसरे निवास हों आओ जाबो करत आंव। 6जितै जितै मैंने सब इस्राएलियन के मजारें आबो-जाबो करो, का मैंने इस्राएल के न्याय करबेवारन में सें जिनहों मैंने अपनी परजा की चरवाही करबे हों ठैराओ हतो, कौनऊं सें कभऊं ऐसी बात कई कि, “तुमोंरों ने मोरे लाने देवदार कौ घर काए नईं बनवाओ?” 7सो अब तें मोरे दास दाऊद सें एैसो कै कि, सेनाओं कौ यहोवा परमेसुर एैसो कैत आय कि मैंने तौ तोहों भेड़शाला सें और गाड़र-छिरियों के पाछें-पाछें फिरबे सें ई मनसा सें बुला लओ, कि तें मोरी परजा इस्राएल कौ परधान हो जाए; 8और जितै कऊं तें आओ और गओ, उतै मैं तोरे संगै रओ, और तोरे सबरे बैरियन हों तोरे सामूं सें नास करो आय। अब मैं तोरे नाओं हों पृथ्वी के बड़े-बड़े मान्सन के नाओं जैसो बड़ो कर दैहों। 9मैं अपनी परजा इस्राएल के लाने एक जागां ठैराहों, और ऊहों स्थर करहों कि ऊ अपनी जागां में बसी रए और कभऊं नें डिगै, और दुस्ट ऊहों नास नें कर पाहें, जैसे कि पैलां करत हते। 10बल्कि ऊ बेरा भी जब मैं अपनी परजा इस्राएल के ऊपर न्यायी ठैरात हतो; सो मैं तोरे सबरे बैरियन हों दबा दैहों। फिन मैं तोहों जौ भी बतात आंव, कि यहोवा परमेसुर तोरो घर बनाए रखहै। 11जब तोरी उमर पूरी हो जैहै और तोहों अपने स्यानों के संगै जाने पड़है, तब मैं तोरे बाद तोरे बंस हों जौन तोरे मोंड़ों में सें हुईयै, ठांड़ो करके ऊके राज हों स्थर करहों। 12मोरे लाने एक घर ओई बनाहै, और मैं ऊकी राजगद्दी हों हमेसा स्थर रखहों। 13मैं ऊकौ बाप ठैरहों और ऊ मोरो मोंड़ा ठैरहै, जैसे मैंने अपनी करुना शाऊल पै सें जौन तोए सें पैलां हतो हटाई हती, बैसे मैं ऊपै सें नें हटाहों, 14बल्कि मैं ऊहों अपने घर और अपने राज में हमेसा स्थर रखहों और ऊकी राजगद्दी हमेसा लौ अटल रैहै। 15इन सबरी बातों और ई दरसन के अनसार नातान ने दाऊद हों समझा दओ।
दाऊद की धन्नवाद की बिन्तवाई
16तब दाऊद राजा भीतर जाकें यहोवा परमेसुर के सामूं बैठो, और कैन लगो, “हे यहोवा परमेसुर! मैं का आओं? और मोरो घराना का आय कि तेंनें मोहों इतै लौ पोंचाओ आय? 17हे यहोवा परमेसुर! जा तोरी नज़र में हल्की बात भई, कायसे तेंनें अपने दास के घराने के बारे में भविस्य के बिलात दिनों लौ की चरचा करी आय, और हे यहोवा परमेसुर! तेंनें मोहों ऊंचे पद कौ मान्स जैसो जानो आय। 18जौन मईमा तोरे दास पै दिखाई गई आय, ऊके बारे में दाऊद तोए सें और का कै सकत आय? तें तौ अपने दास हों चींनत आय। 19हे यहोवा परमेसुर! तेंनें अपने दास के लाने और अपने हिया के अनसार जौ बड़ो काम करो आय कि तोरो दास ऊहों जान लैबे। 20हे यहोवा परमेसुर! जौन कछु हमने अपने कानों सें सुनो आय, ऊके अनसार तोरे बरोबर कौनऊं नईंयां, और नें तोहों छोड़ और कौनऊं ईसुर आय। 21फिन तोरी परजा इस्राएल के भी बरोबर को आय? बा तौ पृथ्वी भर में एकई जात आय, ऊहों यहोवा परमेसुर ने जाकें अपनी निज परजा करबे हों छुड़ाओ, ई लाने कि तें बड़े और डरावने काम करके अपनो नाओं करे, और अपनी परजा के सामूं सें जौन तेंनें मिस्र सें छुड़ा लई हती, जात-जात के मान्सन हों काड़ दे। 22कायसे तेंनें अपनी परजा इस्राएल हों अपनी हमेसा की परजा होबे के लाने ठैराओ, और हे यहोवा परमेसुर! तें खुद ऊकौ पिरभु ठैरो आय। 23ई लाने, अब हे यहोवा परमेसुर, तेंनें जौन बचन अपने दास के और ऊके घराने के बारे में दओ आय, ऊ हमेसा बनो रए, और अपने बचन के अनसारई कर। 24और तोरो नाओं हमेसा अटल रए, और जौ कहकें तोरी बड़ाई हमेसा करी जाए, कि सेनाओं कौ यहोवा परमेसुर इस्राएल कौ पिरभु आय, बल्कि ऊ इस्राएल के लाने यहोवा परमेसुर आय, और तोरे दास दाऊद कौ घराना तोरे सामूं स्थर रए। 25कायसे हे मोरे यहोवा परमेसुर, तेंनें जौ कहकें अपने दास पै परगट करो आय कि मैं तोरो घर बनाए रखहों, ई कारन तोरे दास हों तोरे सामूं बिन्तवाई करबे की हिम्मत भई आय। 26अब हे यहोवा परमेसुर तेंई ईसुर आय, और तेंनें अपने दास हों जा भलाई करबे कौ बचन दओ आय; 27और अब तेंनें खुस होकें, अपने दास के घराने पै एैसी आसीस दई आय, कि ऊ तोरे सामूं हमेसा बनो रए, कायसे हे यहोवा परमेसुर, तें आसीस दै चुको आय, ई लाने ऊ हमेसा आसीसित बनो रए।”
Valgt i Øjeblikket:
- पैलो इतिहास 17: BHB
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
New Testament books: © 2018 Central India Christian Mission.
Old Testament books: © 2018 Central India Christian Mission and Pioneer Bible Translators