- पैलो इतिहास 13
13
बाचा की पेटी कौ किर्यत्यारीम सें लाओ जाबो
1दाऊद ने सहस्रपतियों, शतपतियों और सबरे परधानों सें सलाह लई। 2तब दाऊद ने इस्राएल की सबरी मण्डली सें कई, “जदि जौ तोहों अच्छो लगै और हमाए यहोवा परमेसुर की इच्छा होबै, तौ इस्राएल के सबरी जागांओं में जौन हमाए भईया आंय और उनके संगै जौन याजक और लेवीय अपने अपने चराईवारे नगरों में रैत आंय, उनके लिगां भी जौ कहला पठैव कि हमाए लिगां इकट्ठे हो जाओ, 3और हम अपने यहोवा परमेसुर के संदूक हों अपने इतै लै आएं; कायसे शाऊल के दिनन में हम ऊके लिगां नें जात हते।” 4तब सबरी मण्डली ने कओ कि बे एैसईं करहें, कायसे जा बात उन सबई की नजर में अच्छी लगी।
5सो दाऊद ने मिस्र देस के शीहोर सें हमात की घाटी लौ के सबरे इस्राएलियन हों ई लाने इकट्ठो करो कि यहोवा परमेसुर के संदूक हों किर्यत्यारीम सें ल्याए। 6तब दाऊद सब इस्राएलियन हों संगै लैकें बाला हों गओ, जौन किर्यत्यारीम भी कहात हतो और यहूदा के हींसा में हतो कि यहोवा परमेसुर कौ संदूक उतै सें ल्याए; ऊ तौ करूबों पै बिराजबेवारो आय और संदूक कौ नाओं भी यहोवा परमेसुर के नाओं सें लओ जात आय। 7तब उनोंरन ने यहोवा परमेसुर के संदूक हों एक नई गाड़ी पै चढ़ाकें, अबीनादाब के घर सें काड़ो और उज्जा और अह्यो ऊ गाड़ी हों हांकन लगे। 8दाऊद और सबरे इस्राएली यहोवा परमेसुर के सामूं तन मन सें गीत गात और बीणा, सारंगी, डफ, झांझ और तुरहियां बजात हते।
9जब बे कीदोन के खलिहान लौ आए, तब उज्जा ने अपनो हाथ संदूक हों पकड़बे के लाने बढ़ाओ, कायसे बैलों ने ठोकर खाई हती। 10तब यहोवा परमेसुर कौ खुन्स उज्जा पै भड़क उठो; और ऊने ऊहों मारो कायसे ऊने संदूक पै हाथ लगाओ हतो; ऊ उतईं यहोवा परमेसुर के सामूं मर गओ। 11तब दाऊद नाराज भओ, ई लाने कि यहोवा परमेसुर उज्जा पै टूट पड़ो हतो; और ऊने ऊ जागां कौ नाओं पेरेसुज्जा धरो, जौ नाओं आज लौ बनो आए। 12ऊ दिना दाऊद यहोवा परमेसुर सें डरकें कैन लगो, “मैं यहोवा परमेसुर की संदूक हों अपने इतै कैसे लै आओं?” 13तब दाऊद संदूक हों अपने इतै दाऊदपुर में नें लाओ, परन्त ओबेदेदोम नाओं गती के घरै लै गओ; 14और यहोवा परमेसुर की संदूक ओबेदेदोम के इतै ऊके घराने के लिगां तीन मईना लौ रओ, और यहोवा परमेसुर ने ओबेदेदोम के घराने पै और जौन कछु ऊकौ हतो ऊपै भी आसीस दई।
Valgt i Øjeblikket:
- पैलो इतिहास 13: BHB
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
New Testament books: © 2018 Central India Christian Mission.
Old Testament books: © 2018 Central India Christian Mission and Pioneer Bible Translators