Romanos 2

Dio jȩti̧nü̧'a̧kuä̧ pä̧kuȩ wȩnȩ

1Ukututtü ya̧tȩ, kka̧ra̧ suronä̧ jȩü̧ päkuomȩnä̧mä̧, kua̧mü̧nä̧ pa̧ja̧tü̧tä̧ pä'äujä̧. Jua'amä̧ uku'i̧nä̧ ja̧'wa̧nü̧tä̧ wa̧ kua'attü̧. Ja̧'wa̧nü̧ jo̧mȩttü̧ kka̧ra̧rü̧ päkua pä'ümä̧ jui̧'a̧jä̧. 2Ja̧'wa̧nü̧ ja̧'a̧nä̧ Dio-mä̧ ya̧tȩ suronä̧ jȩü̧ ro̧ȩpo̧mȩnä̧mä̧, adiwomȩnä̧ jueünä̧tä̧ ro̧'ȩpü̧ pä'ü wo̧juä̧tü̧jä̧. 3Ja̧'wa̧nü̧ ja̧'a̧ttü̧ uku'i̧nä̧ ja̧'wa̧nü̧ suronä̧ jȩpü̧ kkä̧nü̧, kkorotü suronä̧ jȩtti̧yä̧ku̧ päkuttümä̧, Dio ro̧ȩpü̧ttü̧ kki̧'o̧kü̧ kuä̧kua̧jä̧. 4Dio-mä̧ juiyo adiwä i̧sa̧ ja̧'a̧ttü̧, jurunä̧mä̧ ra̧wä̧ri̧po̧kü̧ ja̧'a̧ttü̧, a̧mi̧ 'ki'ächi'ü ukutu suronä̧ jȩ'kuä̧tu̧kua̧'a̧nä̧'i̧nä̧. Ja̧'wa̧nü̧ ja̧'a̧nä̧ suronä̧ jȩ'kuä̧tu̧ku̧mä̧ rü̧ȩnä̧mä̧ jo̧kü̧ 'kua̧ra̧'a̧ pä'ümä̧ kuamükuädätukuä. Jua'amä̧ Dio-mä̧ repe'ü jȩä̧u̧jä̧, suronä̧ jȩ'kuä̧tu̧ku̧ käkuädi'iyätukuarü pä'ü. 5Ja̧'wa̧nü̧ ja̧'a̧nä̧, surojü käkuädi'ätukuoka'a, yaboku jarodi'ü jȩ'kuä̧tu̧ku̧ttü̧mä̧ Dio-mä̧ ukuturu ro̧ȩpä̧kuȩmä̧ yabonü̧ rü̧ä̧dä̧kua̧. Rüjí mo̧ro̧ päi'omȩnä̧ o'katoi'ünä̧rü̧ suronä̧ jȩtti̧nü̧ttü̧'i̧nä̧, adiu jȩtti̧nü̧ttü̧'i̧nä̧, jȩtti̧nü̧'a̧kuä̧ Dio-mä̧ pä'ü u̧ju̧nä̧kuä̧u̧, 6Isopäi'ünä̧ Dio-mä̧ yotukunä̧ jȩtti̧nü̧'a̧kuä̧ i̧mi̧tä̧kua̧. 7Tturuwo, wa'ü ikuäwokü, ukuo jäwä Dio iyatü pä'ü tta̧'ä̧rü̧nü̧ adiwä juei jȩpü̧ kki̧nä̧tü̧rü̧mä̧, Dio-mä̧ kkä̧kuä̧wä̧ i̧yä̧kuä̧u̧. 8Ja̧'wa̧nü̧ ja̧'a̧nä̧ jarodi'ü, tturuwonä̧ ukuo te'äkuäu, jueü wȩnȩ ukuotü jui'ü, suronä̧ jȩä̧kuä̧wä̧tä̧ ukuotätürümä̧ Dio-mä̧ rü̧ȩnä̧ ra̧wä̧rü̧ ro̧ȩpä̧kuä̧u̧. 9O'katoi'ünä̧ surojü jȩpä̧tü̧rü̧mä̧, usurä ȩmä̧kuä̧u̧, barawä̧u̧ a̧'u̧ ttuäwänä̧tä̧ ro̧ȩkuä̧kua̧'a̧, ä̧kuo̧mȩnä̧ judío'i̧nä̧ ja̧'wa̧ta̧nü̧ judío pokotürü'i̧nä̧, jü̧nä̧. 10Ja̧'wa̧nü̧ ja̧'a̧nä̧ adiwä juei jȩpi̧nä̧tü̧rü̧mä̧, tturuwotä, ttukuotä, yo̧mȩtȩnä̧ eseu kkä̧kuä̧wä̧tä̧ i̧yä̧kuä̧u̧, ä̧kuo̧mȩnä̧mä̧ judío-rü'i̧nä̧ ja̧'wa̧ta̧nü̧ judío pokotürü'i̧nä̧, jü̧nä̧. 11Isopäi'ünä̧ Dio-mä̧ yoräteunä̧tä̧ ȩmü̧ ja̧'a̧ttü̧.

Moisé weinü̧ wȩnȩ

12Isopäi'ünä̧ Moisé weinü̧ wȩnȩ ttieruwa'anä̧ surojü jȩpä̧tü̧rü̧mä̧, weäwä wȩnȩ juiyünä̧tä̧ totte'ächäkuotü; ja̧'wa̧ta̧nü̧ o'katoi'ünä̧ Moisé weinü̧ wȩnȩ ttu̧wo̧jua̧'a̧nä̧ surojü jȩpä̧tü̧rü̧mä̧, jua̧u̧nä̧tä̧ ro̧ȩkuä̧kuo̧tü̧; 13Isopäi'ünä̧ Dio-mä̧ ȩmü̧, adiwä juei jȩpä̧tü̧mä̧ Moisé weinü̧ wȩnȩ ä̧ju̧ku̧tä̧ ä̧ju̧kuä̧tü̧tä̧mä̧kü̧ ja̧'a̧, ji̧nä̧somä̧ weäwä wȩnȩ ukuotätürü. 14Isopäi'ünä̧ judío pokotümä̧, Moisé weinü̧ wȩnȩmä̧ juitta'anä̧, ä̧tȩkuä̧nä̧tä̧ weäwä wȩnȩ weü jȩpä̧tü̧, jitünä̧tä̧ adiu'i̧nä̧, surojü'i̧nä̧ jȩpü̧ amükuädäkuäwä kka̧'a̧ttü̧, 15Ja̧'wa̧nü̧ jȩtto̧mȩnä̧ tta̧mi̧'iso'kinä̧ wȩyu̧kuä̧, kkü̧ weäwä wȩnȩmä̧ i̧jȩkuä̧cha̧'a̧. Ja̧'wa̧nü̧ ja̧'a̧ tta̧mi̧'iso'kinä̧ tta̧mü̧kuädümä̧ jiäwä̧u̧, adiu jȩtta̧ja̧ pä'ü'i̧nä̧, suronä̧ jȩtta̧ja̧ pä'ü'i̧nä̧, jü̧nä̧. 16Dio ro̧ȩpü̧ mo̧ro̧ rȩbȩä̧kuä̧wä̧kua̧'a̧, ttü̧ja̧ ttü̧dä̧pä̧rȩ, ttü jidäu Jesucrito i̧wȩnȩ jareü wȩnȩnä̧.

17Ukumä̧ judío i̧sa̧sä̧ pä'äkuäu, Moisé weinü̧ wȩnȩnä̧ kua̧'kua̧ wȩnä̧rü̧ ukuo te'äujä̧ ku̧ä̧nä̧wa̧ Dio-rü. 18Ja̧'wa̧ta̧nü̧ Dio-rü pä̧wä̧rü̧jü̧'i̧nä̧ wo̧juö̧ kkä̧nü̧, weäwä wȩnȩttü̧mä̧ wo̧jui̧pü̧jä̧ ji̧yȩja̧tä̧ ja̧'a̧ adiwä jueimä̧ pä'üjä̧. 19Ja̧'wa̧ta̧nü̧ kua̧mü̧nä̧ wo̧juä̧u̧mä̧, ä̧to̧kä̧tü̧rü̧ oikuä i̧sa̧sä̧ pä'äkuäu kkä̧nü̧, yo̧ü̧nä̧ kka̧kuä̧tü̧rü̧'i̧nä̧ tȩya̧u̧ku̧ oikuä i̧sa̧sä̧ pä'äkuäujä̧. 20Jerupätürü'i̧nä̧ wo̧juȩkuä̧ i̧sa̧sä̧ pä'ü kkä̧nü̧, ppo̧'ä̧tü̧rü̧'i̧nä̧ wo̧juȩkuä̧ i̧sa̧sä̧ pä'äkuäujä̧, jua'amä̧ weäwä wȩnȩnä̧, ji̧yȩnä̧tä̧ wo̧juä̧wä̧'i̧nä̧, jueü wȩnȩ'i̧nä̧ kka̧'a̧ päkua'attü̧. 21Ukú ja̧'wa̧nü̧ kkorotürü wo̧juȩkuä̧ i̧sa̧ kua'anä̧, ¿tta̧'a̧nü̧ pä'ü kua̧mü̧nä̧mä̧ ku̧wo̧juȩkuo̧ka̧'a̧jä̧ttü̧? Nä̧u̧kuä̧rä̧kuä̧wo̧kü̧ pä'ü jikuäwa'anä̧, ¿tta̧'a̧nü̧ pä'ü ku̧nä̧u̧kuä̧ra̧'a̧jä̧ttü̧? 22Ttirekua pokajuku ä'ä'chäkuäwokü pä'ü jikuäwa'anä̧ ¿toku pä'ü jȩ'kua̧'a̧jä̧ttü̧? Ttü̧ä̧nä̧wa̧tü̧ jü̧nä̧ tätäwä o'kamä̧ kuju'koka'anä̧, ¿tta̧'a̧nü̧ pä'ü judío pokotü ttü̧ä̧nä̧wa̧rü̧ ttukuokuinode jakuä kka̧ku̧ mikuäumä̧ ku̧nä̧u̧kuä̧ra̧'a̧jä̧ttü̧? 23Weäwä wȩnȩ ukuo tekuäwa'anä̧, Dio-rümä̧ ukuotoküjä̧, weäwä wȩnȩ kukuotoka'attü̧. 24Ja̧'wa̧nü̧ jo̧mȩnä̧ wȩyu̧kuä̧ wȩnȩmä̧ pä'ija'a: «judío pokotümä̧, Dio-rü ya̧'a̧wä̧'chä̧tü̧ ukutu jäwänä̧.»

25Isopäi'ünä̧ circuncisión#2.25 Circuncisión Pi̧yȩmä̧ glosario-ra̧'a̧ räopa'a. pättümä̧ mikuäwäkujä̧, weäwä wȩnȩ kukuotüttütä; ja̧'wa̧nü̧ ja̧'a̧nä̧ weäwä wȩnȩ kukuotokomȩnä̧mä̧ circuncisión jȩ'kuä̧kuä̧wi̧nü̧mä̧, jui̧'a̧ 'kua̧rü̧nä̧tä̧ wa̧jä̧. 26Ja̧'wa̧nü̧ ja̧'a̧ttü̧ circuncisión pättü jȩpä̧kuä̧wo̧kü̧ ja̧'a̧nä̧, weäwä wȩnȩ weü'anü̧ jȩpü̧ ü̧jo̧mȩnä̧mä̧, circuncisión pättü jȩpä̧kuä̧wa̧ 'kua̧rü̧nä̧ wa̧. 27Ja̧'wa̧ta̧nü̧ idepänä̧mä̧ circuncisión pättü jȩpä̧kuä̧wo̧kü̧ ja̧'a̧nä̧, weäwä wȩnȩ päü'anü̧ jȩpü̧mä̧, jua̧u̧ jä̧kua̧'a̧ ukuru suronä̧ jȩ'kuä̧'i̧ja̧'a̧ ro̧ȩpä̧kua̧mä̧, jua'amä̧ weäwä wȩnȩ'i̧nä̧ ku̧ju̧nä̧ra̧'a̧nä̧, circuncisión pättü'i̧nä̧ jȩpä̧kuä̧wa̧ kua'anä̧ kukuotokomȩttü̧. 28Isopäi'ünä̧ judío jü̧nä̧ kkä̧kuä̧wä̧mä̧ ttidepä wä̧mȩ jäwämä̧kü̧, ja̧'wa̧ta̧nü̧ circuncisión'i̧nä̧ ttidepä wä̧mȩnä̧ jäwämä̧kü̧. 29Isopäi'ünä̧tä̧ judío i̧sa̧mä̧ jakuänä̧ttü̧ wa̧ ja̧'a̧ ja̧'wa̧ta̧nü̧ circuncisión pättü wa̧mä̧, tta̧mi̧ iso'ki jäwä ja̧'a̧: Wȩyu̧kuä̧ jäwämä̧kü̧ ja̧'a̧, epíritu jäwä ja̧'a̧, eseäkuäwämä̧ ttü̧ja̧sa̧ttü̧mä̧ ichokü ja̧'a̧, ji̧nä̧somä̧ Dio-ttütä ichü ja̧'a̧.

Dysgu mwy am Nuevo Testamento Uwotjüja

Romanos 2

Adnodau Beiblaidd Poblogaidd o Romanos 2

Adnodau Beiblaidd Poblogaidd o
Romanos 2