Hpilipi 3
3
Gùngsho Má Lùmhkaû Râ Hkyô A Jòq
1Hau htoq agó, ngá é gu-mang wuì ê, haû Yhûmsîng má gabú nyî keq! Rajung zâ é hkyô lé, núngmòq é matú dum puq ká byi râ gi, ngò má wuî é hkyô haî a jòq, núngmòq é matú a-kyû dùt râ matú shèq ru nghut lhê.
2Haû, hkuî pé lé le; agè ashop é múzó jizó kut é bang lé le; gùngsho yâm é bang lé le; sidìq nyì keq.#3:2 Bun zo shí lhum gi, ahpyo-kuq hpyit hkyô má nòqzùq nyi é bang lé taí nau é nghut lhê. 3Hkâsu mù gâ le, Garai Gasâng é So èq noqkuq é bang, Hkrisidùq Yesuq má gabú myìt taî nghutbûn nyi é bang, gùngsho má a lùmhkau é bang, ngá-nhúng gi, ahpyo-kuq hpyit hkam yu é bang a-kyîng#3:3 Ahpyo-kuq hpyit hkam yu é bang a-kyîng gâ é gi, Garai Gasâng é yhang zo hkyak nghut bê bang lé gâ lhê. nghut lhê. 4Ngò kúm gi, gùngsho má lùmhkaû râ hkyô wó ang sû nghut lhê.
Góbang rayùq yùq, haû gùngsho má lùmhkaû râ hkyô wó âng lhê ga myìt é nghut le gi, ngò gi, je riyhang wó sû nghut lhê. 5Ngò gi, hku lé é htâng shit nyí nghû râ nyí má ahpyo-kuq hpyit bê sû; Isira-elaq a-myû mâ é, Ben-yamin é awùt ashín nghut sû, Hebre byù mâ é Hebre rayùq nghut lhê; jep é târâ dông ga jáng, ngò gi, Hparishe rayùq nghut lhê; 6shîrong é hkyô eq séng luî ga jáng, ngò gi, haû noqkuq hpúng lé zing-rî wú bê nghut lhê; jep é târâ mâ é díngmán hkyô eq séng luî ga jáng, ngò gi, shut é hkyô a bo wú sû nghut lhê.
7Nghut kôlhang, ngá é a-myàt nghu é pé lhúnglháng gi, ahkuî, Hkrisidùq é yánmai sûm byùq é chyat nghut bê nghû myìt yù bê nghut lhê. 8Hau htoq agó, ngò gi, ngá é Yhûmsîng Hkrisidùq Yesuq lé wó sê é kô dik é jeju lé sôn kat jáng, jung hkangmó lé a-pyâng dông myìt yù bê. Hkâsu mù gâ le, lhúnglháng lé ngò tô pyâm é gi, Yhâng é yánmai nghut lhê. 9Ngò gi, Hkrisidùq lé wó yû râ eq, Yhang eq rahá wó nghut nyî râ matú, haû jung hkangmó lé a-pyâng nghû myìt yu pyám bê. Garai Gasâng chyáng mai lo é díngmán hkyô lé ngò jep é târâ dông wó ho yu é a nghut, Hkrisidùq lé lùmjíng é yánmai za wó yu é ru nghut lhê; haû gi, lùmjíng myìt mai wó é nghut lhê. 10Ngò gi, Hkrisidùq lé le, Yhang dui toq hkyo é hpungwup a-tsam lé le, Yhang hpuzô é hkyô má wó zùm yàp râ lé le, Yhang shî hkâm é hkyô lé wó cháng râ lé le, sé nau ri. 11Haû jáng gi, ngò le, shi byùq bê mai dum dui toq é hkyô lé wó myòqbyù râ nghut lhê.
Myìt Myòqbyu Tô É Jowò Shut Din Nyì Râ Hkyô
12Ngò gi, haú pé bànshoq lé wó gû bê le a nghû naù, ngò gúmjùp gù bê le a nghû naù. Nghut kôlhang, Hkrisidùq Yesuq gi, ngo lé lhom yù bê eq rajung za, ngò gi, haû lé wó lhom yù sháng gàq nghû, châng hkat nyi lhê. 13Gu-mang wuì ê, ngò yhang ngò gi, haû lé wó hàp yù bê nghû a myìt; nghut kôlhang, ngò kut é múzó ralhum gi, nùnghtáng mâ é lé tô-myhî pyám mù, myòq hí mâ é lé wó yû shoq nghû shi-kùt luî, 14Hkrisidùq Yesuq má Garai Gasâng èq ngo lé ahtoq shut ji yu é chyûnghuq lé wó yû râ matú, myòqbyu tô é jowò shut châng hkat din nyi lhê.
15Gúmjùp bê bang ngá-nhúng lhúnglháng gi, haû sû é myìt bò râ lhê. Rajung jung má núngmòq myìt é hkyô shai nyì kô é nghut le gi, haû lé le, Garai Gasang gi, núngmòq lé san za tûn shit râ nghut lhê. 16Hká dông nghut kôlhang, ngá-nhúng gi, ahkuî jé shoq châng nyì bê hkyô eq rajung za châng kut nyî sháng.
17Gu-mang wuì ê, núngmòq gi, ngò kut é dông chôm kut nyî keq, ngá-mòq mai núngmòq lé kut shit é alìk eq rajung za châng é bang lé wú yû keq. 18Hkâsu mù gâ le, hí hkûn, ngò, núngmòq lé a-num num taî kyô wú luî, ahkuî lháng, ngaù byî èq dum taî kyô é eq rajung za, Hkrisidùq é tapzîng lé gyè kut é bang myo myo nyi bum akô nghut ri. 19Yhángmòq é jihtûm gi, htên byòq hkyô nghut ri; yhángmòq é garai gi, yhángmòq é wamdau nghut ri; yhángmòq é xânghpoq nge wó hkyô gi, yhángmòq hoq hpu hkyô nghut ri. Yhángmòq é i‑myìt gi, mingkan zè htoq má za nghut ri. 20Nghut kôlhang, ngá-nhûng é yhummau gi, mauhkûng mîngdán má nghut lhê. Ngá-nhúng gi, haú mâ é Yhûmsîng Yesuq Hkrisidùq gâ é hkyi yù Sû lé, myòqbyu láng nyi é bang nghut lhê. 21Yhang gi, jung hkangmó lé, Yhang ùphkang é a‑ô má wó kut tô é Yhâng é a-tsâm èq ngá-nhûng é htên byòq sê é gùngdu lé htaî lhik pyám byi luî, Yhâng é hpungwup bo é gùngdu su dùt nhâng râ nghut lhê.
Právě zvoleno:
Hpilipi 3: znot
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2025, Wycliffe Bible Translators, Inc.