Éxodo 35
35
Jamakï junaq jamayänanpaq käyitsinqan
1Llapan Israel nunakunata juntarirmi Moisés nirqan: <<Këkunatam Teyta Dios mandamashqantsik: 2Semänachö joqta junaq uryayanki. Qanchis kaq junaqqa sagrädu kanqan rëkur Teyta Diosta adorarnin jamakuyanki.#Éxo. 20.8-11; 23.12; 31.15; 34.21; Lev. 23.3; Deut. 5.12-14. Tsë junaqchö pipis uryaq kaqtaqa wanutsiyanki. 3Jamakï junaqchöqa mëchö tsëchö tärarpis ama ninallatapis tsaritsiyankitsu>>.
Sagrädu Tolduta rurayänanpaq ofrendayanqan
Éxodo 25.1-7
4Israel nunakunatam Moisés kënö nirqan: <<Teyta Dios kënömi nishqa: 5Teyta Diospaq ofrendata qoyämïta munaq kaqqa llapan shonqunwan apayämutsun qorita, qellëta, broncita, 6azul, granäti y puka millwa jïlukunata, llanulla putskashqa lïnu jïluta, chiwapa aqtsanpita putskashqa jïlutapis. 7Jina apayämutsun pukaman tiñishqa üsha pergashta, fïnu qarakunata, acacia qeruta, 8candelabru rawrananpaq aceitita, sagrädu aceitimanpis inciensumanpis takutsiyänanpaq pukutaqkunata, 9ónice rumikunata y wakin kuyëllapaq rumikunatapis. Tsë rumikunaqa kayanqa sumo sacerdötipa efodnintawan pechëranta#Éxo. 28.6-30. adornayänanpaqmi.
Sagrädu Tolduchö kaqkunata rurayanqan
Éxodo 39.32-43
10<< <Qamkunachö mëqëkipis imapis rurëta yachaq kaqkunaqa shayämunki Teyta Dios nimanqankunata shumaq rurayänëkipaq. 11Pëmi nimashqa Sagrädu Tolduta ruranantsikpaq. Tsëmi ruranantsikpaq këkan cuartukuna, qatanankuna, ganchukuna, marcukuna, traviskuna, jorcunkuna y jawiränankunapis. 12Tsënöllam ruranantsikpaq këkan Pactu Baúl, puritsikunantsik mantëkuna, baúlpa tsapanan, cuartuta ishkëman rakinanpaq cortïna, 13mësa puritsikunantsik mantëkuna, mësachö inshinankuna, mësachö churaränanpaq jatusaq tantakuna, 14aktsi rawrananpaq candelabru, candelabrupa inshinankuna, mechërunkunata aktsi rawrananpaq aceiti, 15inciensuwan sawmana altar, tsë altarta puritsikuyänan mantëkuna, sagrädu aceiti, pukutaq inciensu, Sagrädu Tolduman yëkuna cortïna, 16sacrificiuta kayana altar, broncipita rurashqa rejïlla, altarta puritsikuyänan mantëkuna, altarchö inshinankuna, broncipita lavatoriu täkunantin, 17patiupa cortïnankuna, patiupa jorcunninkuna, jorcunkunapa jawiränan, patiupa punkunta tsaparaq cortïna, 18Sagrädu Tolduta shäritsinanpaq estäcankuna waskantin y patiupa tumariq shätsinanpaq estäcankuna waskantin. 19Tsënöllam ruranantsikpaq këkan Tinkunantsik Sagrädu Tolduchö sacerdöti Aarón yakakunanpaq kaq sagrädu ratashkuna y tsurinkuna yakakuyänanpaq ratashninkunapis> >>.
Ofrendata apayanqan
20Moisés tsënö niriptinmi Israel nunakuna ewkuyarqan kapuyashqanpita apayänanpaq. 21Tsëpitanam Tinkuna Tolduta sharkatsiyänanpaq ofrendata churëta munaq kaqkuna Teyta Diospaq apayarqan. Tsënöllam apayarqan inshinakunata rurayänanpaq y sacerdöti yakakunan sagrädu ratashkunata rurayänanpaqpis. 22Tsëmi ofrendëta munaqkunaqa ollqupis warmipis apayarqan timpinankunata, zarcïllunkunata, sortïjankunata, wallqankunata y qoripita ima rurashqakunatapis. Llapan tsëkunatam Teyta Diospaq apayarqan. 23Tsënöllam kapuyanqanpita apayarqan azul, granäti y puka millwa jïlukunata, llanulla putskashqa lïnu jïluta, chiwapa aqtsanpita putskashqa jïluta, pukaman tiñishqa üsha pergashta y fïnu qaratapis. 24Tsënöllam kapuyanqanpita Teyta Diospaq apayarqan qellëtawan broncita. Wakinnam acacia qeruta apayarqan Tinkuna Sagrädu Tolduta shäritsiyänanpaq.
25Putskëta yachaq warmikunapis apayarqan azul, granäti y puka millwa jïlukunata y llanulla putskashqa lïnu jïlutapis. 26Tsënöllam putskëta yachaq warmikunapis chiwapa aqtsanta putskayarqan. 27Israel nunakunapa mandakuqninkunanam apayarqan ónice rumikunata y wakinnam kuyëllapaq rumikunata. Tsë rumikunaqa karqan sumo sacerdöti yakaränan efodnintawan pechëranta adornayänanpaqmi. 28Tsënöllam apayarqan candelabru rawrananpaq aceitita. Tsënölla sagrädu aceitita rurayänanpaq y inciensuman takuyänanpaq pukutaq montikunapa weqinta y qaranta apayarqan. 29Ofrendëta munaqkunam ollqupis warmipis kikinkunapa voluntäninpita apayarqan Moisésta Teyta Dios ninqannö Tinkunantsik Sagrädu Tolduta sharkatsiyänanpaq.
Tsë oficiuta yachaq nunakunata uryayänanpaq Moisés churanqan
Éxodo 31.2-6
30Israel nunakunatam Moisés nirqan: <<Sagrädu Tolduta rurananpaq Uripa tsurin y Hurpa willkan Bezaleeltam Teyta Dios akrashqa. Pëqa Judá trïbupitam. 31Bezaleeltaqa Teyta Dios yachënin qoshqa kaptinmi ima rurëtapis alli yachan. 32Qoripita, qellëpita y broncipita kuyëllapaq inshinakunata rurëtapis pëqa yachanmi. 33Kuyëllapaq rumikunatapis llaqllëta yachanmi. Shumaq llaqllarirmi tsaraqninwan laqëtapis yachanmi. Tsënömi qerukunapitapis llaqllëta yachan y tukïläya kuyëllapaq inshinakunatam rurëta yachan.
34<<Bezaleelta y Ahisamacpa tsurin Aholiabtapis Teyta Diosmi tsë yachëninkuna qoshqa wakin nunakunatapis yachatsiyänanpaq. Aholiabqa Dan trïbupitam. 35Ishkantam Teyta Dios yachëta qoshqa imëkakunatapis kuyëllapaqta rurayänanpaq, azul, granäti y puka millwa jïlukunawan y llanulla putskashqa lïnu jïlukunawan imëkatapis bordayänanpaq y kuyëllapaqta imëkatapis awayänanpaq.
Právě zvoleno:
Éxodo 35: qwhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.