Hechos 11
11
Mana Israel nunakunapis Jesústa chaskiyanqanta Pedro willanqan
1Mana Israel nunakunapis Teyta Diospa willakïninta chaskiyashqantam apostolkuna y Judea provinciachö markäkuqkunapis musyayarqan. 2Tsëmi Jerusalénman Pedro kutïkuptin señalashqa kaq wakin wawqikuna penqapar 3niyarqan: <<¡Imanirtaq mana Israel nunakunapa wayinman yëkur pëkunawan mikurqunki!>>
4Pedrunam ima pasanqantapis willapar nirqan: 5<<Jope markachö Teyta Diosta mañakïkashqächömi ciëlupita chuskun kuchunpa watashqa jatun qepina niraq urëkämuqta revelacionchö rikarqä. 6Tsë qepinanö urëkämuqchömi rikarqä tukïläya wätana kaq y mana wätana kaq animalkunata, lätëpa puriqkunata y päriqkunatapis#11.6 Wakin nunakunaqa bolaqkunapis niyanmi.. 7Tsëta rikarëkaptïmi ciëlupita kënö nimurqan: <Pedro, tsëkunata pishtarir mikï>.
8<<Tsënö nimaptinmi nirqä: <Teyta, manam tsëkunata mikümantsu. Impüru animalkunataqa manam imëpis mikurqütsu>.
9<<Tsëmi ciëlupita yapë kënö nimurqan: <Mikunëkipaq püru kashqanta Teyta Dios nikäshuptikiqa ama impüru kashqanta nitsu>. 10Tsë revelacionta kima kuti rikäratsimarmi qepinata ciëlupa kutitsikurqan.
11<<Tsë höram Cesarea markapita kachamushqan kimaq nunakuna ashiyämar posadarëkashqä wayiman chäyämurqan. 12Tsëmi Espíritu Santu nimarqan mana mantsakushpa pëkunawan ëwayänäpaq. Tsënö nimaptinmi kë joqta wawqikunawan ëwar qayatsimaq nunapa wayinman yëkuyarqä. 13Tsëchömi willayämarqan wayinchö juk ángel yuripïkur kënö nishqanta: <Simón shutiyuq nunata pushayämunanpaq Jope markaman kachë. Pëpa juk kaq shutinmi Pedro. 14Pëmi käyitsishunki qamta y wayikichö täraqkuna imanöpa salvakuyänëkipaqpis>.
15<<Tsëchö willapar qallarëkaptïmi noqantsikman chämushqannölla pëkunamanpis Espíritu Santu chashqa. 16Tsëchömi yarparkurqä Señor Jesucristo kënö nishqanta: <Juanqa yakullawanmi bautizarqan. Qamkunaqa Espíritu Santuwanmi bautizashqa kayanki>.#Hech. 1.5. 17Señor Jesucristuman markäkushqa Espíritu Santuta qaramashqantsiknöllam pëkunatapis Teyta Dios qarashqa. Tsënö këkaptinqa ¡noqa pitaq kä Teyta Diosta michänäpaq!>>
18Tsënö willakunqanta wiyarmi Pedruta ni imapis niyarqannatsu. Tsëpa rantinmi kushikur niyarqan: <<¡Mana Israel nunakunatapis Teyta Dios käyikätsinmi jutsa rurëkunata jaqirir wiñë kawëta tariyänanpaq!>>
Jesucristuta Antioquíachö chaskikuyanqan
19Estebanta wanuratsiyaptinmi Jerusalénpita safar ëwaqkuna Feniciaman, Chipriman y Antioquíamanpis#Hech. 8.1-4. chärir Israel mayinkunallata alli willakïta willapäyarqan. Mana Israel nunakunataqa manam pitapis willapäyarqantsu. 20Chipripita y Cirenipita wakin wawqikunaqa Antioquíaman chärir mana Israel nunakunatapis Señor Jesucristupa alli willakïninta willapäyarqanmi. 21Tsënö willakuyänanpaq Teyta Dios yanapaptinmi atskaq nunakuna creyikur Jesucristuta chaskikuyarqan.
22Tsëta wiyarmi Jerusalénchö këkaq wawqikuna y panikuna Bernabéta Antioquíaman kachayarqan. 23Tsëchö mana Israel nunakunatapis Teyta Dios ankupashqanta rikarmi Bernabé alläpa kushikurqan. Tsëmi pëkunata kallpatsarqan shumaq cäsukur Teyta Diosman imëpis markäkuyänanpaq. 24Bernabéqa alli nunam karqan. Tsënöllam Teyta Diosman markäkur Espíritu Santupa poderninchö imëpis kawakuq. Tsëchö yachatsikuptinmi atskaq nunakuna Señor Jesucristuta chaskikuyarqan.
25Tsëpitanam Bernabéqa Sauluta ashiq Tarso markaman ëwarqan. 26Taririrnam Antioquíaman kutir Sauluwan Bernabé juk wata wawqikunawan y panikunawan ëllukäyarqan. Tsë watam atskaq nunakunata yachatsiyarqan. Antioquíachöran Jesúspa discïpulunkunata#11.26 Discïpulukunapaq parlarqa Jesucristuta chaskikuqkunapaqmi parlëkan. cristiänu nita qallëkuyarqan.
27Tsë witsanmi Jerusalénpita Antioquíaman profëtakuna ëwayarqan. 28Tsëchömi Espíritu Santu käyitsiptin profëta Agabo#Hech. 21.10. willakurqan jinantinchö alläpa muchï kananpaq kashqanta. Willakushqannöllam muchï karqan Romachö Claudio César mas mandakuq kashqan witsan. 29Muchï kananpaq willakuptinmi discïpulukuna parlayarqan imallatapis kashqanpita ëllurir Judeachö kaq wawqikunaman y panikunaman apatsiyänanpaq. 30Parlayashqannö ëllurirnam Judeachö kaq anciänukunaman Bernabéwan y Sauluwan apatsiyarqan.
Právě zvoleno:
Hechos 11: qwhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.