1 Tesalonicenses 3
3
1Qamkuna kaqman shamïta mana puëdirmi alläpa llakikurqü. Tsëmi Atenas#Hech. 17.15. markachö japalläkuna kayänäpaq kaptinpis 2qamkunaman wawqintsik Timoteuta kachamurqä. Musyayashqëkinöpis Timoteuqa Diospa sirwiqnin karmi Jesucristupa alli willakïninta willakur purikan. Pëmi Jesucristuman mas markäkuyänëkipaq yachatsiyäshunki y kallpatsayäshunki.
3Tsënö kallpatsayäshuptikim nunakuna chikiyäshuptikipis llakikuyankinatsu. Musyayankim Jesucristuta chaskikushqantsikpita nunakuna jipatsimänantsikpaq kashqanta. 4Jina qamkunawan këkarpis willayarqaqmi Jesucristuman markäkushqantsikpita chikimänantsikpaq kashqanta. Y niyanqaqnöllam llapanpis pasëkan. 5Tsëmi llakiyarniki Teyta Diosman markäkïkäyashqëkita musyanäpaq Timoteuta kachamurqä. Alläpam llakikurqä Satanás tentayäshuptiki Jesucristuman manana markäkuyanqëkita yarpar. Tsënö kaptinqa alli willakïta willapäyashqaqpis manakaqllapaqchi kanman karqan.
Tesalónicapita Timoteo kutinqan
6Qamkunapita Timoteo kutimurmi willamashqa Teyta Diosman shumaq markäkïkäyashqëkita y kuyanakïkäyashqëkitapis. Jina willamashqam llakiyämar kutiyämunäta munëkäyashqëkita. Tsëmi noqakunapis watukakuq kutimïta yarpëkäyä.#Hech. 18.5. 7Shumaq markäkïkäyashqëkita willayämaptinmi imata jiparpis kushishqa këkäyä. 8Alli këkäyashqëkita musyarirmi shonqükunapis atsikyärishqa.
9Teyta Diosnintsik yanapayäshushqëkipita alläpa kushikurmi llapan shonqükunawan pëta payllä nikuyä. 10Tsëmi paqaspa y junaqpa llapan shonqükunawan pëta mañakïkäyä qamkunaman kutiyämunäpaq. Chäramurnam masta yachatsiyashqëki Teyta Dios munashqannö kawakuyänëkipaq.
11Yayantsik Teyta Dios y Señornintsik Jesucristo yanapëkayämätsun qamkunaman watukakuq kutirayämunäpaq. 12Señor Jesucristo yanapëkuyäshï qamkunata kuyashqänölla kikikikunapurapis y wakin nunakunawanpis kuyanakuyänëkipaq. 13Jina yanapëkuyäshï llapan shonqïkikunawan markäkur pë munashqannö kawakuyänëkipaq. Tsënöpam salvashqan nunakunawan Señornintsik Jesucristo kutimuptin Yayantsik Teyta Diospa nöpanchö jutsannaq kayanki.
Právě zvoleno:
1 Tesalonicenses 3: qwhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.