1 Corintios 12
12
Espíritu Santu yachëta qomanqantsik
1Wawqikuna y panikuna, Espíritu Santu yachëta qomashqantsikpaqmi musyatsiyënikita munä. 2Musyayashqëkinömi Jesucristuta manaraq chaskikur mana käyikur ïdulukunata adorar kawayarqëki. 3Tsëmi shumaq käyikuyänëkita munä. Espíritu Santuta chaskishqa këkarqa manam pipis <<Jesucristo maldisishqa katsun>> nintsu. Tsënöllam Espíritu Santuta manaraq chaskir <<Jesucristo Señornïmi>> nita puëdintsu.
4Espíritu Santupita juknöpa juknöpa yachëta chaskishqapis pëqa jukllëllam këkan. 5Tsënöllam Señor Jesucristuta juknöpa juknöpa sirwishqapis#Efe. 4.11. pëqa jukllëlla këkan. 6Yanapamaqnintsik Teyta Diosta sirwishqantsik juknöpa juknöpa kaptinpis pëqa jukllëllam këkan.
7Llapantsikmi Espíritu Santupita yachëta chaskintsik juknintsik juknintsik yanapanakunantsikpaq. 8Wakinnintsikmi yachëta chaskintsik shumaq käyikur wakinta käyitsinantsikpaq. Wakinnintsikmi yachëta chaskintsik yachakurir wakintapis yachatsinantsikpaq. 9Wakinnintsikmi yachëta chaskintsik Teyta Diosman shumaq markäkunantsikpaq. Wakinnintsikmi yachëta chaskintsik qeshyaqkunata kachakätsinantsikpaq. 10Wakinnintsikmi yachëta chaskintsik milagrukunata ruranantsikpaq. Wakinnintsikmi yachëta chaskintsik Teyta Diospa willakïninta willakunantsikpaq. Wakinnintsikmi yachëta chaskintsik pipis llutanta o rasun kaqta yachëkätsishqantapis käyikunantsikpaq. Wakinnintsikmi yachëta chaskintsik mana yachashqantsik idiömakunachö parlanantsikpaq. Wakinnintsiknam yachëta chaskintsik tsë parlayashqanta wawqikunata y panikunata käyitsinantsikpaq. 11Juknöpa juknöpa yachëta chaskishqapis Espíritu Santuqa jukllëllam këkan. Pëmi kikin munashqannö juknintsik juknintsikta yachëta qaramantsik.#Rom. 12.6-8.
Jesucristupa cuerpun kanqantsik
12Cuerpuntsikchö peqantsik, rikrantsik y chankantsik kaptinpis juk cuerpullam kantsik. Tsënöllam noqantsikpis Jesucristuwan juk cuerpulla kantsik.#Rom. 12.4-5; Efe. 4.15-16. 13Tsëmi Israel nuna kashqapis y mana Israel nuna kashqapis, esclävu kashqapis y mana esclävu kashqapis bautizakushqa llapantsikta Espíritu Santu churamarquntsik pëpa cuerpun kanantsikpaq. Tsë cuerpulla kashqam llapantsikta Teyta Dios Espíritu Santuta qomarquntsik.
14Cuerpuqa manam peqallatsu ni rikrallatsu ni chankallatsu, sinöqa maspis kanran. 15Chakipis <<mana maki karqa manam cuerpupatsu kä>> nirpis manam cuerpupitaqa yarquntsu. 16Tsënöllam rinripis <<mana nawi karqa manam cuerpupatsu kä>> nirpis manam cuerpupitaqa yarquntsu. 17Cuerpuntsik nawilla kaptinqa ¿imawanraq wiyashwan? Jina cuerpuntsik rinrilla kaptinqa ¿imawanraq pukutaqtapis mäkushwan? 18Teyta Diosmi cuerpuntsikkunachö llapan partintsikkunata kamashqa pë munashqannölla kayänanpaq. 19Llapan cuerpuchö juk partilla kaptinqa manam cuerputsu kanman. 20Tsëmi atska parti karpis rasunpaqa juk cuerpulla këkan.
21Manam nawintsikpis makintsikta kënö ninmantsu: <<Manam qamta wanaqtsu>>.
Peqantsikpis chakintsikta manam ninmantsu: <<Manam qamta wanaqtsu>>.
22Tsëpa rantinmi cuerpuntsikchö mas delicädu kaq partikunata mas wanantsik. 23Cuerpuntsikchö mana rikätsikushqantsik partikunatapis ¿manaku ratashwan shumaq tsapantsik? 24Alëru rikakuq partikunataqa manam tsapantsiktsu. Cuerpuntsikchö mana rikätsikunantsikpaq kaq partikunata tsënö mas cuidanantsikpaqmi Teyta Dios kamashqa. 25Tsënö kamashqa kaptinmi cuerpuntsikchö kaq partikuna chikinakuyantsu, sinöqa jukninpis jukninpis yanapanakuyanmi. 26Cuerpuntsikchö juk parti nanaptinqa llapan cuerpuntsikmi llakikun. Cuerpuntsikchö juk parti alli rikashqa kaptinqa llapan partim kushikuyan.
27Qamkunaqa Jesucristupa cuerpunmi kayanki. Jukniki juknikikunam tsëchö juk parti kayanki. 28Tsëmi iglesiachö Teyta Dios puntata churashqa apostolkuna kayänanpaq, tsëpita profëtakuna kayänanpaq y tsëpita yachatsikuqkuna kayänanpaq. Tsënöllam wakinta churashqa milagrukunata rurayänanpaq, wakinta churashqa qeshyaqkunata kachakätsiyänanpaq, wakinta churashqa waktsakunata yanapayänanpaq, wakinta churashqa imatapis alli ruraq kayänanpaq y wakintanam churashqa mana käyiyashqan idiömakunachö parlayänanpaq.#Efe. 4.11.
29Manam llapantsu apóstol, ni profëta ni yachatsikuq këkäyan. Manam llapantsu milagrukunata rurayan, 30ni qeshyaqkunata kachakätsiyan ni mana yachayashqan idiömakunachö parlayan. Tsë idiömakunachö parlayashqantapis manam llapantsu käyitsikuyan. 31Tsënö këkaptinqa Teyta Diospita mas allin yachëta chaskiyänëkipaq yarpakachäyë.
Kananmi mas allin kaqta käyitsiyashqëki.
Právě zvoleno:
1 Corintios 12: qwhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.