Éxodo 26
26
Sagrädu Tolduta rurasinanpaq tantiyasishqan
Éxodo 36.8-38
1<<Sagrädu Toldupaq llanula puskash lïnu jïlupita y azul, granäti y puka milwa jïlukunapita chunka bayëtakunata awasinki. Nirkur say bayëtakunaman bordasinki ishkay querubinkunata. 2Say chunka bayëtakunata rurasinki say tamäñulata. Larguyninmi kanqa chunka ishkay metru pulannin (12.5). Anchuyninnami kanqa ishkay metru.
3<<Pisqa bayëtakunata larguynin kaqpa jirasinki juk bayëta kananpaq. Saynöla pisqa kaqtapis jirasinki juk bayëtala kananpaq. 4Say ishkay bayëtakunapa larguynin kaq kuchunman azul jïlukunata pataparkur ojalnin kananpaq churasinki. 5Pisqa chunka (50) kanqa jukaq bayëtapa kuchunpaq y pisqa chunkanami kanqa jukaq bayëtapa kuchunpaq. Saynöpami ishkan bayëtakunapa ojalninkuna frenti frenti shequräyänanpaq kayanqa. 6Ojalninkunapita shequnaykipaq qoripita pisqa chunka ganchukunata rurasinki. Say ganchukunawan shequsinki ishkan jirayashqan bayëtakunata. Saynöpami juk toldulana kanqa.
7<<Say jananman qatanaykipaq cabrapa aqsanpita chunka juk bayëtakunata awasinki. 8Say bayëtakunaqa lapanpis say tamäñulami kayanqa. Cada bayëtapa larguynin kanqa chunka kimsa metru pulan (13.5). Anchuyninna kanqa ishkay metru.
9<<Nirkurna pisqa bayëtakunata larguynin kaqpa jirasinki juklaylano kananpaq. Saynöla soqta kaqkunatapis larguynin kaqpa jirasinki juklaylano kananpaq. Say bayëtakunawan qatasiptikimi soqta kaq jirash bayëtaqa punku yaykunacho päsaränanpaq kanqa. Say päsaraq kaqta jananman doblasinki.
10<<Ojalkunata jïlupita rurarkur say jirashqan bayëtakuna tinkuränanpaq kaq kuchunman churasinki. Pisqa chunka (50) ojalkunata churasinki jukaq jirashqan bayëtapa kuchunman y pisqa chunkatanami churasinki jukaq bayëtapa kuchunman. 11Say ojalkunapita shequnaykipaq broncipita rurasinki pisqa chunka ganchukunata. Saywan shequptikimi juk bayëtanölana kanqa.
12<<Say bayëtakunawan qatasiptiki mas jatulan kar pusuq kaqqa Sagrädu Toldupa lädunkunapa päsaranqa. 13Say qataraykaq bayëtami rurin kaq bayëtata ishkan lädunpa päsaranqa chusku chunka pisqa (45) centïmetru.
14<<Say bayëtakuna jananman qatasinki pukaman tiñish uysha pirqashpita rurash tolduwan. Say pirqashkuna jananmanna fïnu qarakunawan qatasinki.
15<<Sagrädu Tolduta ichisinaykipaqqa acacia qerupita shumaq derëchu marcukunata rurasinki. 16Cada marcuta rurasinki chusku metru pulan altuta. Anchuynintana rurasinki soqta chunka pisqa (65) centïmetruta. 17Marcupura laqaränanpaq cada marcupa chakincho ishkay espïgata rurasinki. Lapan marcukunatapis saynöla rurasinki. 18Ishkay chunka (20) marcukunata rurasinki sur kaqläman ichisinaykipaq. 19Say marcukuna ichiyänanpaq chusku chunka (40) jawiräkunanta qellaypita rurasinki. Cada marcupa ishkay espïgan kaptinmi cada marcupa ishkay jawiräkunanpis kanqa. 20Saynöla ishkay chunka (20) marcukunata rurasinki norti kaqläman ichisinaykipaqpis. 21Saykuna ichiräyänanpaqpis qellaypita rurasinki chusku chunka (40) jawiräkunanta. Saynöpami cada marcupaq kanqa ishkay jawiräkunan.
22<<Inti jeqananläpa ichisinaykipaqpis soqta marcukunata rurasinki. 23Qepan kaq esquïnankunapaq mas ishkay marcukunata rurasinki. 24Say marcukunami esquïnacho tinkuq marcukunaman shumaq laqaranqa. Jana kaq esquïnachömi juk arguëllawan shequranqa. Ishkan esquïnanchöpis marcukunata saynöla ichisinki. 25Saymi puwaq marcukuna saylächo kanqa. Cada marcupami qellaypita rurash ishkay jawiräkunan kayanqa. Saynöpami saylächo chunka soqta jawiräkunan kanqa.
26<<Sagrädu Toldupa jukaq lädun marcukunata sakraränanpaq acacia qerupita pisqa travesäñukunata rurasinki. 27Saynöla jukaqläpaqpis pisqa travesäñukunata rurasinki. Sagrädu Toldu qepanpaqpis pisqa mas travesäñukunata rurasinki. Say kanqa inti jeqananläpami. 28Chawpi kaq travesäñuqa juk kuchunpita jukaq kuchunyaqmi marcukunapa päsaranqa. 29Say marcukunata y travesäñukunatapis qoriwan enchapasinki. Travesäñukuna päsayänanpaqqa qoripita arguëllankunata rurasinki. 30Kay jirkacho rikasishqätanöla Sagrädu Tolduta rurasinki.
31<<Nirkur cortïnata awasinki azul, granäti y puka milwa jïlukunapita y llanula puskash lïnu jïlupitapis. Sayman ishkay querubinkunata shumaq bordasinki. 32Say cortïnata qoripita rurash ganchukunawan acacia qerupita rurash chusku jorconkunaman shequsinki. Say jorconkuna qoriwan enchapashqami kanqa. Jorconkunapa jawiräkuyänan qellaypita rurashqami kanqa. 33Cortïna qepanmanna churanki Pactu Babulta. Say cortïnami Lugar Santïsimupita Lugar Santuta rakinqa.#Heb. 6.19; 9.3. 34Nirkurna Lugar Santïsimucho Pactu Babulta sapananwan saparkunki. 35Lugar Santuchöna mësatawan candelabruta churanki. Mësata churanki norti kaqläman y candelabrutana churanki sur kaqläman.
36<<Juk cortïnatana awasinki tolduman yaykuna punkupaq. Sayta awasinki azul, granäti y puka milwa jïlukunapita y llanula puskash lïnu jïlupitapis. Say cortïna kuyaylapaq kananpaq shumaq bordasinki. 37Cortïna waqiränanpaq acacia qerupita pisqa jorconkunata rurasinki. Say jorconkunata qoriwan enchapasinki. Nirkur ganchunkunatapis qoripita rurarkasir jorcón puntanman churasinki. Saynöpis jorconkuna ichiräyänanpaq pisqa jawiräkunanta broncipita fundisinki.
Právě zvoleno:
Éxodo 26: qvhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2003, Wycliffe Bible Translators, Inc. All rights reserved.