Éxodo 24
24
Tayta Diosta Israel runakuna promitiyashqan
1Moiséstami Tayta Dios nirqan: <<Aarónta, Nadabta, Abiúta y qanchis chunka (70) Israel mayor runakunata pushakurkur noqa kaykashqä puntaman wisäyämunki. Paykunaqa manaraq chämur karulachöna qonqurpakuyanqa. 2Saypita mastaqa noqa kaqman ama witiyämunqasu. Paykunata saycho kachaykur japalaykina wisämunki>>.
3Sayno niptinmi puntapita Moisés kutiykur Tayta Dios nishqankunata y leyninkunatapis runakunata wilarqan. Saymi lapan niyarqan: <<Tayta Dios nishqankunataqa lapantami cumpliyäshaq>>.#Éxo. 19.8; Deut. 5.27.
4Awniyaptinmi Tayta Dios nishqankunata Moisés lapanta qelqarqan. Saypita waraynin tutami saka sakala jirka chakincho altarta perqarqan. Nirkurmi Israel runakunapa trïbunkuna chunka ishkay kaptin chunka ishkay wankakunata ichisirqan. 5Saypitanami maqtakunata nirqan törukunata pishtarkur rupasina sacrificiuta y jawka kawakuy sacrificiuta rupasiyänanpaq.
6Törukunata pishtayaptinmi yawarninta matikunaman Moisés chaskirkur altarman pulanta saqsurqan. 7Saypitanami Pactu Libruta runakunata liyiparqan. Sayta wiyarmi niyarqan: <<Tayta Dios nishqankunata lapantami cumpliyäshaq>>.
8Sayno awnirkuyaptinmi matikunaman chaskishqan yawarta runakunapa jananman saqsupar Moisés nirqan: <<Kay yawarqa noqansiwan Tayta Dios pactuta rurashqan yawarmi kaykan.#Mat. 26.28; Mar. 14.24; Luc. 22.20; 1Cor. 11.25; Heb. 10.29. Mandamientunkunata y leyninkunata qomashpansimi noqansiwan pactuta ruraykan>>.#Heb. 9.19-20.
9Saypitanami Sinaí jirkaman wisäyarqan Moisés, Aarón, Nadab, Abiú y qanchis chunka (70) Israel mayor runakunapis. 10Saychömi rikayarqan yärakuyashqan Tayta Diosta. Chakin jarurashqanchömi zafiro rumipita rurashno chipipiykaq kaykarqan. Colorninpis ciëlu niraqmi karqan. 11Tayta Diosta rikarpis say mayor runakuna manami wanuyarqansu. Saychömi mikuyarqan upuyarqan.
Sinaí jirkacho chunka mandamientukunata Moisés chaskishqan
12Moiséstami Tayta Dios nirqan: <<Jirka puntaman wisarkamur shuyämay. Saychömi parara rumicho qelqashqä leykunata y mandamientukunata entregashayki. Saytami Israel runakunata yachasinki>>.
13Sayno niptinmi Tayta Dios kaykashqan puntaman Moisés wisäyarqan yanapaqnin Josuéwan. 14Manaraq aywarmi mayor runakunata nirqan: <<Kutiyämushqäyaq kaylacho shuyaraykäyämay. Qamkunawanmi Aarónwan Hur quëdayanqa. Imapis kaptinqa paykunaman quejakuyanki arreglayäshunaykipaq>>.
15Sayno yäsirkur jirkaman Moisés wisaykaptinmi jirkata pukutay sapakurkurqan. 16Soqta junaqmi Sinaí jirkata pukutay sapararqan. Say pukutaypitami Tayta Diospa chipipiyninpis rikakämurqan. Qanchis kaq junaqchönami pukutay rurinpita Moisésta Tayta Dios qayarqan. 17Tayta Diospa chipipiynintami Israel runakuna rikayarqan nina bunyaypa bunyar rupaykaqtano. 18Moisésta Tayta Dios qayamuptinmi puntaman wisashpan pukutay rurinman yaykurqan. Say puntachömi chusku chunka (40) junaq y chusku chunka paqas qoyarqan.#Deut. 9.9.
Právě zvoleno:
Éxodo 24: qvhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2003, Wycliffe Bible Translators, Inc. All rights reserved.